Ewangelscy a katolscy Serbja so w Hrubjelčicach schadźowali
Hrubjelčicy. Je hižo z dobrej tradiciju, zo Maćijec swójba na spočatku šulskeho lěta zhromadnje ze Serbskim ewangelskim towarstwom na dworowy swjedźeń a pućowanje swójbow do Hrubjelčic přeproša. Sobotu popołdnju w dwěmaj zeńdźe so skupina zajimcow, zo by pod nawodom Roberta Maćija do Dobruše pućowała. Tam pozastachu na nawsy při pomniku Marje Simonoweje a jeje ródnym domje. Robert Maćij předstaji skrótka žiwjenje njewšědneje Serbowki, kotraž bě mnohe lěta wójnskich zranjenych zastarowała a so wo wukubłanje hladarkow starała, z čimž je bytostnje k wuwiću Čerwjeneho křiža w Sakskej přinošowała. Po tym nóžkowachu pućowacy k Dobrušanskemu hrodźišću, kotrež běchu słowjanscy sydlerjo něhdy na wysokich skałach nad Sprjewju natwarili.
