Budyšin (DM/SN). Přirada za serbske naležnosće města Budyšin je so wčera z projektom LIPA zaběrała. Iniciator Beno Brězan je wotpowědnu próstwu wo financowanje swojeje ideje Załožbje za serbski lud posrědkował.

Ze swojim projektom sćěhuje Brězan dwaj zaměraj: Na jednym boku dźe wo sylnjenje zhromadnosće mjez němsce a serbsce rěčacymi ludźimi, wosebje wo lěpšu wuměnu. Serbšćina měła so zajimcam w prěnim rjedźe digitalnje spřistupnjeć. Dalši zaměr je, turistiske wobsahi sylnić.

Za zwoprawdźenje ideje chce Beno Brězan wjacore dźělne projekty přewjesć. K nim słuša natwar a wobhospodarjenje digitalneje platformy. Na njej maja so serbske towarstwa a zarjadowanja prezentować. Brězan wabješe dale za serbski festiwal w Budyšinje, kiž móhł přistup k serbskej rěči a kulturje zmóžnjeć. Zdobom chce we wobłuku projekta LIPA ćišćany­ magacin wo łužiskich Serbach wudać.