Swójby a towarstwa na swjedźenju
Kulow (AK/SN). Hižo wjacore lěta podpěruje w Kulowje Załožba Mrs. Nikovich socialne dźěło z dźěćimi, młodostnymi a swójbami. Składnostnje 100. narodnin Herty Nikovich (1923–1994) je so před třomi lětami wulki swjedźeń swójbow a towarstwow na šulskim dworje wotměł. Tajki ma so nětko na samsnym městnje wospjetować, a to sobotu, 20. junija, wot 11.30 hač do 17 hodź..
Wobšěrny program wopřijima mjez druhim rejwansku dźěłarničku a dalšu za nawuknjenje ukulele. Zdobom přihotuja sportowe wubědźowanja. W sportowni budźe koparski parcours natwarjeny. Třělcowske towarstwo přewjedźe třělenje na drjewjaneho worjoła a blidotenisowe towarstwo wuhotuje blidotenisowy turněr. Nimo toho zarjaduja po připołdnju dźěćace čaporowe wiki.
Program wopřijima tež serbske poskitki. W 13 hodź. předstaji Sulšečanska pěstowarnja serbske reje a pěsnje. Z dalšim programom wustupi Kulowska zakładna šula w 15 hodź. Wopytowarjo zbliska a zdaloka su wutrobnje witani.
W prózdninach do Połpicy
Połpica. W serbskim prózdninskim campje wot 9. hač do 14. awgusta 2026 w Połpicy nad Sprjewju su hišće wjacore swobodne městna, kaž regionalna rěčnica Domowiny Katja Liznarjec zdźěli. Prózdninske lěhwo je za dźěći w starobje wot wosom do dwanaće lět a płaći dohromady 349 eurow za přenocowanje, zastaranje a za wulěty. Zhromadnje chcedźa kupać jěć, šulski muzej w Stróži wopytać, za kulisy Serbskeho domu pohladać a plincy pjec. Wězo rěči so w campje serbsce. Lěhwo je za serbsce wuknjace a za maćernorěčne dźěći. Zajimcy njech přizjewja so pola zarjadowarja Schullandheime e. V. pod telefonowym čisłom 03591 22285 abo z mejlku na .
Samuel Koch přednošuje
Wutwar křižowanišća so dlije
Na kromje Rakec chcychu poprawom spočatk junija křižowanišćo před bywšej Munu wutwarić započeć. To pak njeje so poradźiło. Z gmejnskeho zarjadnistwa zhonichmy, kak ma nětko dale hić.
Rakecy (UM/SN). Hižo dołho připowědźeny wutwar křižowanišća při Rakečanskim přemysłownišću, bywšej Munu, měješe so poprawom spočatk junija zahajić. Termin pak njemóžachu dodźeržeć. „Přičina je, zo so planowanje dliješe a zo maja twarske firmy wobmjezowane kapacity. Tohodla so spočatk dróhotwarskich dźěłow do julija 2026 přestorči“, Budyski krajnoradny zarjad jako twarski knjez projekta na naprašowanje zdźěli. Wažne přihoty su porno tomu hižo wotzamknjene. Mjez druhim su někotre štomy podrězali a přepytowali, hač w zemi někajka stara municija njeleži. Tež někotre reptilije na druhe městna přenjesu, štož ma w juniju wotzamknjene być. Potom móža dróhotwarske dźěła zahajić.
Hač do 2027 bjez zadźěwkow
Wojerowske dwórnišćo za 21 milionow eurow wobšěrnje přetwarja
Wojerecy (KD/SN). Dospołnje přetwarjene a ponowjene ma so kónc přichodneho lěta Wojerowske dwórnišćo prezentować. Wot lěta 2024 je Němska železnica, Swobodny stat Sakska a wobchadny zaměrowy zwjazk wuchodna Sakska přetwarjeja. Zhromadnje inwestuja něhdźe 21 milionow eurow, zo bychu wšitke dotalne zadźěwki wotstronili. Tuž budu w přichodźe tež ludźo z handicapom dwórnišćo wužiwać móc.
Po dotwarje ma tunl za pěškow naměsto před dwórnišćom z nastupnišćemi 1/2 a 3/4 zwjazać. Z pomocu třoch liftow dóstanu so pućowacy z kóframi, dźěćacymi wozami, rolatorami abo z jězbnymi stołami k nastupnišćam. Te budu tak natwarjene, zo móžeš bjez dalšeho schodźenka do ćaha zastupić. Wodźenski system za slepych a špatnje widźacych, LED-wobswětlenje a digitalne pućowanske informacije maja serwis skulojćeć, rjekny Heiko Klaffenbach wot Němskeje železnicy wčera, jako nowinarjam aktualny staw twarskich dźěłow rozłožichu.
Krótkopowěsće (17.06.26)
Chorowni kooperujetej
Zhorjelc. Nawodnistwje Zhorjelskeje chorownje swj. Carolusa a tamnišeho klinikuma stej so wčera na krutu zhromadnu kooperaciju dojednałoj. Z njej chcetej předewzaći strowotniske zastaranje w měsće kaž tež w Zhorjelskim wokrjesu trajnje zawěsćić. Zaměr kooperacije mjez druhim je, poskitki wobeju stejnišćow zmysłapołnje mjez sobu wothłosować a na wysokim niwowje dale wjesć.
Ze situaciju njespokojom
Budyšin. Institut za wične slědźenje MAS z Lipska a firma Procesni psychologojo z Łužicy stej so w měrcu a aprylu něhdźe tysac wobydlerjow łužiskich wokrjesow we wobłuku Łužiskeho monitora woprašowałoj. Mjez druhim so wobhonichu, kak spokojom su ludźo ze swojej žiwjenskej situaciju. Wuslědki wotbłyšćuja negatiwne wuwiće: Jenož hišće 66 procentow woprašowanych je ze situaciju spokojom. Loni bě to 79 procentow.
Pancery na awtodróze
Wo serbskich misionarach
Budyšin. Serbski muzej w Budyšinje přeproša we wobłuku swojeho formata Kofej w třoch jutře, srjedu, 17. junija, na hóstny přednošk rjadu Sorabistika po puću. Stawiznarka Serbskeho instituta dr. Lubina Malinkowa wěnuje so ze swojim referatom „Z Łužicy do swěta – Serbscy misionarojo“ słužbje, kotraž je wot 18. lětstotka w nadawku Ochranowskeje bratrowskeje jednoty něhdźe 70 ewangelskich Serbow do tehdy tak mjenowanych zamórskich krajow wjedła. Zarjadowanje započnje so w 15 hodź., zastup płaći 4,50 eurow.
Wo zběrce barbow
Budyšin. We wobłuku kabinetneje wustajeńcy „Barbu dožiwić“ přeprošuje Muzej Budyšin štwórtk, 18. junija, w 19 hodź. na přednošk wo historiskej zběrce barbow Drježdźanskeje techniskeje uniwersity. Prof. dr. Plietker rozłoži nastaće barbneje chemije a nastaće zběrki. Wona wopřijima něhdźe 8 000 barbnych mustrow a dalšich 500 přirodnych barbow.
Rejujo po Budyšinje so wuchodźowali
Ze Strittmatterom so zaběrali
Swjedźeń za swójby w klóštrje
Pančicy-Kukow (SN/MWj). Hry, młode talenty, wjele zabawy a překwapjenki čakaja na wopytowarjow klóšterskeho a swójbneho swjedźenja Budyskeho wokrjesa njedźelu, 21. junija. Budźe to „perfektny wulět za cyłu swójbu“, kaž w nowinskej zdźělence Křesćansko-socialneho kubłanskeho skutka (CSB) rěka. Zastup je darmotny. Kmótřistwo staj abatisa klóštra Gabriela Hesse a krajny rada Udo Witschas (CDU) přewzałoj, kotrajž na teren klóštra Marijina hwězda přeprošujetaj. Zahajić chcedźa swjedźeń w 10.30 hodź. ze swjedźenskej Božu mšu w klóšterskej cyrkwi z generalnym wikarom Drježdźansko-Mišnjanskeho biskopstwa Andreasom Kutschku. Berlinski chór Chorissimo kemše hudźbnje wobrubi.
