Budyšin (CS/SN). Organizatorojo staroměšćanskeho festiwala w Budyšinje, kotryž přewjedu wot 29. do 31. awgusta, su wčera na nowinarskej konferency w Rörscheidtowej bašće lětuši program předstajili. Festiwal, kotryž korjeni w festiwalu Stareje wodarnje, steji lětsa pod hesłom „Woda, wuměłstwo, swěca“. Mnohe twarjenja stareho města na festiwalnym kóncu tydźenja wuměłsce wobswětluja. Předsyda Budyskeho turistiskeho towarstwa Dietmar Stange wuzběhny, zo ma swjedźeń, kotryž mjeztym hižo sedmy raz swjeća, předewšěm zhromadnosć mjez Budyšanami přisporjeć.
Něhdźe 450 čestnohamtsce sobuskutkowacych, kotřiž dohromady 120 towarstwam přisłušeja, wuhotuje lětuši wobšěrny program. Přećeljo hudźby změja na swjedźenju runje tak swoje wjeselo, kaž mali wopytowarjo. Zajimawy poskitk za dźěći je bjezdwěla „Swjedźeń klankodźiwadła“, kotryž budźe w starym měsće Pod hrodom 48. W Lawskej galeriji na Nutřkownej lawskej móža dźěći molować a rysować. Najlěpše wobrazy chcedźa organizatorojo potom w nutřkoměšćanskich wukładnych woknach wustajić.
