Po pjećlětnej přestawce zaso zhromadny swjedźeń wotměli
Worklecy (MČu/SN). Na ležownosći Dubawic swójby – na městnje prěnjeho statoka sydlišća, kotrež Worklečenjo lubosćiwje „Nulik“ mjenuja, zeńdźe so minjeny pjatk wjace hač sto wobydlerjow štwórće, mjez nimi tež něhdźe 33 dźěći. Zo wone wostudu pasć njetrjebachu, to zaručichu organizatorojo swjedźenja z dwěmaj skakanskimaj hrodźikomaj a wulkim poolom. Hladajo na wysoke temperatury mějachu najmjeńši tak swoje wochłódźenje a wulke wjeselo. Wobydlerjo Nulika sami postarachu so na wšelakich kioskach wo derjeměće wopytowarjow a mějachu zymne napoje kaž tež słódne jědźe na poskitk.
Wosebity highlight dnja běše předstajenje historiskeho filma wo Nulikowym swjedźenju před dokładnje 30 lětami. Wón pohnu někotrehožkuli Worklečana k posměwkej a k dopominanju.
