Motorscy a policisća sej zaso z dźěćimi wuleća

Wuježk (CS/SN). Za mnohe dźěći z dźěsćownje we Wuježku a dalšich tajkich socialnych zarjadnišćach je wulět jako socius na motorskim kóžde lěto wjeršk, na kotryž so hižo dołho wjesela. Lětsa wotměje so jězba 17. raz. Štož je so z małym wulětom 20 bikerow započało, je so wuwiło na wulke zarjadowanje. Jeničce jónu – korony dla – je jězba wupadnyła. W dalšich lětach za čas korony su jězbu trochu wobmjezowali. Loni je 280 motorskich sobu jěło. Wěstoty dla pak po zwjazkowych dróhach njejězdźa. A wězo je wažne, zo policija jich přewodźa.

Za Franka Scheibu budźe lětuši wulět wosebity. Policist sej posledni raz takrjec kłobuk staji. Klětu so mjenujcy na wuměnk poda. To pak njewoznamjenja, zo wjace sobu jězdźić njebudźe. Potom pak jako priwatna wosoba a jako rjadowar. Swoje słužbne motorske změni wón klětu na swoju Harley Davidson. Na nju je cyle hordy. Jeho naslědnistwo přewozmje Mirko Martin. Wón je hižo zašły ­tydźeń sobu jěł, jako so organizatorojo z wobstejnosćemi čary zeznajomichu.