Zo bychu so ludźo před wohenjemi škitali, su před něhdźe połdra lětstotkom tež w Hornjej Łužicy wohnjowe wobory załožeć započeli. W našej lětnjej seriji chcemy někotre z nich předstajić a jich stawizny rozłožić. (14)

Wokoło lěta 1880 rozprawja Radworska cyrkwinska chronika wo hašenju. „Zapřijeći běchu kameradojo tehdy we Łupoji. Ničoho njewěmy“, rołoži Stefan Žur, wot lěta 2019 wohnjowoborny nawoda w Radworju. Oficialnje je wohnjowa wobora 1926 z 22 kameradami nastała. Prěni nawoda bě wěsty Bjarš. Wot 1954 hač do 1997 wukonješe tule funkciju Gerat Schmidt. Pozdźišo běchu to Jurij Šipšik, Maćij Žur, Rüdiger Schmidt, Handrij Mjeń a dźensa Stefan Žur.

Prěni domicil ručneje pryskawy bě torožo na nawsy. Hdyž na hašenje jědźechu, ćehnjechu pryskawu z konjemi. „W Radworju běchu wjacore wjetše burske statoki. Wone mějachu konje“, powěda Rüdiger Schmidt, kiž nawjedowaše wot 1997 hač do 2009 Radworsku wjesnu woboru a wot 2006 hač do 2023 gmejnsku woboru. Kóždy tydźeń bě druhi statok konjej woborje přewostajił.