Krótkopowěsće (21.05.26)
Wo nowowólbach rozsudźa
Njebjelčicy. Gmejnska rada w Njebjelčicach rozsudźi w juniju wo terminje za nowowólby wjesnjanosty, po tym zo je André Bulank připowědźił, zo 1. awgusta wotstupi. Kaž předsyda zarjadniskeho zwjazka Při Klóšterskej wodźe Stefan Anders našemu wječornikej wobkrući, maja so wólby najzašo 90 dnjow po rozsudźe gmejnskeje rady a najpozdźišo šěsć měsacow po wotstupje wjesnjanosty wotměć.
Dźiwadźelnik Křesćan Bart zemrěł
Hamburg. Serbski dźiwadźelnik Křesćan Bart je 15. meje w starobje 91 lět w Hamburgu zemrěł. To intendant Němsko-Serbskeho ludoweho dźiwadła Lutz Hillmann dźensa zdźěli. 4. julija 1934 rodźeny Delnjowujězdźan słušeše w lěće 1948 k załožerjam Serbskeho dźiwadła w Budyšinje. Wot hrajneje doby 1958/1959 hač do 2004/05 bě Křesćan Bart z krutym čłonom ansambla NSLDź był.
Warnuje před prawicarjemi
Tři jězdźidła přepodali
Wojerecy. Nad nowymi hašenskimi jězdźidłami typa LF 10 smědźa so wohnjowi wobornicy w gmejnje Sprjewiny Doł kaž tež w Halštrowje a Wojerecach wjeselić. Póndźelu su jim nowe awta we Wojerecach přepodali, kotrež běchu na zhromadnu skazanku třoch komunow wobstarali. Na to běchu so hižo před třomi lětami dojednali. Do třoch nowych jězdźidłow su cyłkownje 1,7 milionow eurow inwestowali. Budyski wokrjes je kóžde jězdźidło z něhdźe 240 000 eurami spěchował, rěka w nowinskej zdźělence města Wojerecy.
Swjedźeń z jubilejom
Šćeńca. Mjeztym 30. raz swjeća wot 22. hač do 24. meje w Šćeńcy (Steinitz) swjatkowny swjedźeń. Tamniša młodźina jón z wjele partnerami přihotuje. Pjatk wot 18 hodź. přeprošuja na koparsku hru tradiciskeho mustwa Dynama Drježdźany přećiwo wubrance Łazowskeje gmejny. Wječor budu reje z doublom Wolfganga Petryja. Sobotu wot 10 hodź. wubědźuja so wohnjowi wobornicy a dźěći smědźa so na swój wosebity swjedźeń wjeselić. Wječor budźe wulka party z wjacorymi sobuskutkowacymi. Njedźelu po Božej słužbje w stanje budźe swjedźeń za swójby z mnohimi poskitkami.
Kurda čuje so ze Serbami zwjazany
Policija (20.05.26)
Wopity z kolesom jěł
Rakecy. Zo tež kolesowarjo bjez rozuma alkohol pić njesmědźa, wě nětko muž w Rakecach. Wodźerja elektrokolesa su zastojnicy Wojerowskeho policajskeho rewěra póndźelu wječor na Nowowjesnjanskej w Rakecach zadźerželi. Při alkoholowym tesće zwěsćichu, zo měješe muž 1,88 promilow alkohola w kreji. Dale jěć wón w tym stawje wězo njesmědźeše. Muž měješe krej wotedać a změje so za swoje přeńdźenje zamołwić.
Awto do sorny prasnyło
Połčnica. 34lětny wodźer Audija je póndźelu wječor na awtodróze A 4 pola Połčnicy do sorny prasnył. Wón jědźeše na lěwej jězdni, jako zwěrjo awtodróhu přeprěči. Sorna při njezbožu zahiny. Na awće nasta 10 000 eurow škody.
Nowy wid na bliskowobchad
Priwatne poskitki za sobujěducych we wokrjesomaj Zhorjelc a Budyšin
Hamor (AK/SN). Zjawny bliskowobchad (ÖPNV) z busom a ćahom wobydlerjam na małych wotležanych městnach často njedosaha. Z móžnosćemi sobu jězdźenja, na př. z taksu ÖPNV a priwatnymi jězdźidłami hodźi so tomu wotpomhać. To je zaměr noweho projekta, kotryž wuwićowa towaršnosć Hornja Łužica-Delnja Šleska (ENO) z platformu primaplusoev.de zwoprawdźa. „Taksi ÖPNV ma jako wudospołnjenje słužić. Wón dowjeze pasažěrow ze wsow zaměrnje na zastanišćo a jich tam za dompuć zaso wotewza“, rjekny projektowa managerka Lisa Graen z ENO na minjenym posedźenju Hamorskeje gmejnskeje rady.
Projekt „Priwatne poskitki sobujězdźenja a zjawny wobchad“ (PriMa+ÖV) traje hižo wot nowembra 2023 a so kónči lětsa w oktobru. Do njeho stej wokrjesaj Zhorjelc a Budyšin zapřijatej. Jako projektowi partnerojo skutkuja Techniska uniwersita Darmstadt, Wysoka šula za nałožowanu wědomosć a wuměłstwo Göttingen kaž tež Interlink tzwr. Zwjazkowe ministerstwo za wobchad projekt spěchuje.
Schowane pomniki na kromje puća
Na zarjadowanju Budyskeho zwjazka archiwow je Eberhard Schmitt připosłucharjow njedawno na putace pućowanje sobu wzał. Jako domizniski slědźer wěnuje so wón swědkam zašłosće w Budyšinje, na kotrež zwjetša lědma štó dźiwa.
Budyšin (CS/SN). Wobdźělnicy zarjadowanja su tójšto pozadkowych informacijow dóstali. Tuž drje w přichodźe ze skedźbliwišim wóčkom po sprjewinym měsće póńdu.
Dźensa pak wšitke wot Eberharda Schmitta fotografowane objekty hižo njewobsteja. Druhe buchu na wšelkich městnach při twarskich dźěłach wuryte a na te wašnje za našich potomnikow zachowane.
Tafla při Hartmannowym domje při Hłownym torhošću je so na přikład zhubiła. Na njej bě napisane, kotre sławne wosobiny běchu swój čas w domskim, w kotrymž je dźensa imobilijowe předewzaće Hornig zaměstnjenje, přebywali. To běštaj mjez druhim pruski kral Friedrich Wulki (1712–1786) a Napoleon Bonaparte (1769–1821).
Porno tomu bu wopomnjenski kamjeń při dubje krala Alberta na Hrodźišku w lěće 1945 wuchowany a steji nětko zaso na swojim městnje.
Wokoło Hórčanskeje meje, kotraž wosrjedź wsy steješe, je minjeny ...
Rozsuda dla zludany
Krótkopowěsće (20.05.26)
Sorabija ma nowe předsydstwo
Lipsk. Towarstwo Sorabija Lipsk je na swojej wčerawšej hłownej zhromadźiznje nowe předsydstwo wuzwoliło. Cyril Mark skutkuje w přichodźe jako nowy předsyda, jeho městopředsydka je Leonie Wenclec. Za financy towarstwa je Catalina Wornarjec zamołwita. Studenća so nimo toho na to dojednachu, přiradu wutworić, kotraž ma nadawki koordinować. Přichodny wjeršk zarjadowanjow w Lipsku budźe mejemjetanje.
Podcast wo serbskej hudźbje
Budyšin. We wobłuku kampanje „Sorbisch? Na klar“ je wot wčerawšeho nowy rjad podcastow z titulom „Serbšćina – sound Łužicy. Kak hudźba serbšćinu znowa wožiwja“ přistupny. W rozmołwach ze štyrjomi hudźbnikami a hudźbnicami pokazaja, kak mnohostronska serbska hudźba w chórje, na jewišću, w probowym rumje abo w studiju je. W prěnim dźělu produkcije předstaja chór Lipu.
Astrocentrum: Styki do Pólskeje
