Bukecy (MK/SN). Nimale 40 ludźi je pjatk na wotewrjenje wustajeńcy wo drasće ewangelskich Serbow Budyskeho kraja do Bukečanskeho gmejnskeho zarjada přišło. Při zachodźe witaštej holcy w serbskej drasće hosći serbsce z chlěbom a selu. Steffen Kostorž je zarjadowanje na dudach hudźbnje wobrubił.

Fotograf Tilo Aé z Brandisa pola Lipska rozkładźe wopytowarjam, kak je tutón jónkrótny projekt z holcami a žonami Bukečanskeje wosady nastał a kak su jón w běhu jednoho lěta přewjedli. Składnostnje hodownych wikow wužiwaše sobotu syła ludźi móžnosć, sej wustajeńcu wobhladać. Na 18 fotach su tam wšelake warianty drasty zwobraznjene. W Bukecach chodźachu hač dosrjedź 19. lětstotka w drasće Serbow ewangelskeho kraja. Po tym so wona poněčim ze wšědneho žiwjenja zhubi a načasna moda so přesadźi. Hač do 30tych lět 20. lětstotka pak wustupowachu holcy a žony w swjedźenskej drasće hišće na kulturnych pro­gramach, chodźachu w njej na serbske swjedźenje a towarstwowe zjězdy.