Kulowc. Z parličkami na kartach a na serbskej narodnej drasće zaběraja so 26. februara we wjesnym towarstwowym domje w Kulowcu. Wot 17 do 19 hodź. móža so zajimcy w tym pospytować, kak so parlički tykaja a kak so z nimi kreatiwnje dźěła. Swójske parlički móža sej wobdźělnicy radlubje sobu přinjesć. Zarjadowanje organizuje motiwatorka za serbsku rěč w syći za serbsku rěč a regionalnu identitu ZARI Marija Šołćic. Pola njeje njech so zajimcy pod přizjewja. Dalše ­zarjadowanje ze samsnej temu wotměje so štwórtk, 5. měrca, wot 17 do 19 hodź. na samsnym městnje.

Zaso dźěłać započeć

Wojerecy (AK/SN). Wot Wojerowskeho zwěrjenca hač k zwjazkowej dróze B 97 nastanje nowy pućik. Naprawu w zwisku z twarskimi dźěłami w zwěrjencu je ­Wojerowska měšćanska rada wčera wobzamknyła. Za zwisk za pěškow a kolesowarjow je w hospodarskim planje 305 000 eurow zaplanowanych. Projekt je trěbny, dokelž w zwěrjencu nowe wobłuki za zwěrjata nastanu. Za to zwěrjenc tam, hdźež bě dotalny pućik, rozšěrja.

Wot Hrodoweho naměsta hač ke chódnikej podłu B 97 nastanje nětko 120 metrow dołhi nowy pućik. Za njón pak njetrjebaja žane štomy pušćeć abo kerki wutorhać. Twarske dźěła maja so w lěću přewjesć. Dokelž je naprawa dźěl měšćanskotwarskeho wuwićoweho koncepta, dóstanu za to spěchowanske srědki. Z nowym pućikom budźetej Wojerowske stare a nowe město přichodnje lěpje zwjazanej.

Pytaja swědkow

Smjerdźaca. Při wobchadnym njezbožu póndźelu rano pola Smjerdźaceje je dotal njeznata wosoba po wšěm zdaću z městna njezboža ćeknyła. Tam bě 22lětny ze swojim busom po statnej dróze S 92 do směra na Smjerdźacu po puću, jako jemu wosobowe awto wosrjedź puća napřećo přijědźe. Šofer busa so naprawo wuwiny, zo by zražce zadźěwał a zrazy při tym do wobchadneho znamjenja. Na zbožo w busu runje nichtó sobu jěł njeje. Wěcnu škodu trochuja na něhdźe tysac eurow. Zawinowar njezboža so zminy. Nětko pytaja swědkow, kotřiž móhli pokiwy k njezbožu abo k pytanemu wosobowemu awtej podać. Pokiwy přijimuja pod telefonowym čisłom 03578 3520.

Tójšto pjenjez zhubiła

Porchow. Z woporom wobšudnikow je so minjeny kónc tydźenja žona w Porchowje stała. Wona chcyše w interneće trjebane hrajki předać. Jako so pozdatni zajimcy e-mailnje přizjewichu, zdźěli wona jim swoje kontowe daty. Bórze na to Porchowčanka pytny, zo je něchtó z jeje konta 3 300 eurow wotzběhnył. Kriminalna słužba Budyskeho policajskeho rewěra pad nětko přepytuje.

Njeswačidło (JK/SN). Na prěnim posedźenju Njeswačanskeje gmejnskeje rady pod nawodom noweje wjesnjanostki Juliany Macalineje (njestronjanka) móžachu radźićelki a radźićeljo wjacore za gmejnu dobre naležnosće zrjadować. Najwažniši wobstatk dnjoweho porjada drje bě, jako wjesnjanostka přizjewi, zo je předwidźane, na posedźenju nowu a kompetentnu komornicu za gmejnje Njeswačidło a Bóšicy do jeje zastojnstwa powołać. Wot 1. měrca budźe Theresa Spichalla z Łahowa so wo financielne naležnosće wobeju gmejnow starać. Wona změje wužadacy nadawk, wosebje Njeswačansku gmejnu zaso na puć wurunanych hospodarskich poměrow dowjesć.

Prěnja wažna kročel budźe, nastajić naćisk za lětuši hospodarski plan gmejny. Pod wulkim aplawsom radźićelow přepoda wjesnjanostka nowej komornicy kwětki a witaše ju do jeje zastojnstwa. Při tym znowa wuzběhny, zo je dźěło młodeje žony zakład financow gmejny. Theresa Spichalla je hižo wjacore lěta sobudźěłaćerka gmejnskeho zarjadnistwa a je so wukmaniła na nazhonitu a kompetentnu fachowču za financy.