W hali zaspěwali
Policistaj na adwentničce pobyłoj
Nowe widejo widźeć
Chrósćicy. Nowe serbske hudźbne widejo kapały Horjany je wot dźensnišeho na YouTube-kanalu „Serbska hudźba – Sorbian music“ widźeć. Kaž Sonja Hejdušcyma z kapały zdźěli, zwjazuje hudźbne widejo „Hindraško“ tradiciju z modernu. Za swój projekt su starej serbskej ludowej spěwaj za wobsadku dujerskeje kapały aranžować dali a z tym spěwaj w modernym stilu dźensnišemu časej wotpowědujo wožiwili. Nastał je medley „Hindraško“ zdźěla w rytmje Balkana. Nimo nahrawanja noweho medleyja přez kapału Horjany w studiju w Bretnigu su k tomu widejo natočili. Awdijoprodukt so přez znate streamingowe słužby (na přikład spotify) šěrokej zjawnosći spřistupnja, wosebje tež młódšej generaciji. Kapała Horjany je tutón projekt za hajenje serbskeje rěče a serbskeho spěwa z podpěru wubědźowanja „simul+ čiń sobu“ zwoprawdźiła. Zakład medleyja stej skerje njeznatej ludowej spěwaj „Hindraško, ty synko mój“, po ludowym teksće a melodiji wobdźěłany wot Bjarnata Krawca, a „Šěrik, měrik bałdrijan“ na tekst Jana Lajnerta a melodiju Bjarnata Krawca.
Wustajeńcu podlěša
Adwentne woknješko
Policija (21.12.23)
Padušnicu lepili
Wojerecy. Sobudźěłaćer Wojerowskeje kupnicy při Kamjenskim kolenu je wutoru padušnicu lepił. Žona bě sej twory w hódnoće 250 eurow do toboły połožiła. Jako chcyše bjez zapłaćenja kupnicu wopušćić, ju sobudźěłaćer zadźerža a policiju informowaše. Kaž pozdźišo zwěsćichu, běše padušnica 50lětna Ukrainjanka. Po trěbnych policajskich naprawach žonu pušćichu a pad nětko dale přepytuja.
Inženjersku šulu wožiwja
Wot 2026 chcedźa w Běłej Wodźe młodych ludźi wukubłować
Běła Woda (AK/SN). Město Běła Woda chce bywšu inženjersku šulu za škleńčersku techniku saněrować a zaso ze žiwjenjom napjelnić. Kaž wyši měšćanosta Torsten Pötzsch (Klartext) na minjenym posedźenju měšćanskeje rady wuzběhny, móhli tam wot šulskeho lěta 2026/2027 zaso młodych ludźi wukubłować. Při tym mysla na powołanja fachoweho informatikarja, industrijneho keramikarja, chemikanta a wodźerja připrawow. Dohromady 200 wukubłanskich městnow ma nastać. „W měrcu 2024 chcemy twarsku próstwu zapodać. Klětu w druhim kwartalu maja so prěnje dźěła wupisać. W třećim kwartalu 2024 móhli twarić započeć“, rozłoži projektowa nawodnica z Drježdźanskeho planowanskeho běrowa Patricia Quosig.
Jónkrótny dohlad do socialnych stawiznow města
W Budyskim měšćanskim archiwje su nětko wosebity projekt wotzamknyli, w kotrymž běchu podłožki komornistwa sucho wurjedźili a archiwej wotpowědnje zapakowali.
Budyšin (SN/MWj). Po knihach komornistwa su so nětko tež wotpowědne podłožki, kotrež dochody a wudawki města w času wot 1635 hač do 1868 dokumentuja, do magacina Budyskeho měšćanskeho archiwa nawróćili. Podłožki su sucho wurjedźili a znowa zapakowali. Kaž měšćanske zarjadnistwo dale zdźěli, móža je slědźerjo a dalši zajimcy nětko zaso wužiwać.
Z „adwentnym ekspresom“ na wiki do Zhorjelca jěli
Łužiski klub za parne lokomotiwy (LDC) je minjenu sobotu „adwentny ekspres“ na Šleske božodźěsćowe wiki do Zhorjelca organizował. Ćah startowaše w Baruthu z historiskej lokomotiwu. W Choćebuzu pak lokomotiwnicy spěšnik Pressnitzoweje železnicy před ćah powěsnychu.
Jězba běše za jednu swójbu cyle wosebity podawk. Radehosojc swójba z Długow (Fleißdorf) je wagon we wosebitym ćahu rezerwowała, zo by přećelam a znatym tutu jězbu do Zhorjelca zmóžniła. Tež ćežko choremu synej Linje měło so hodowne přeće spjelnić. Dźewjećlětny je fan železnicy a so wjeseleše. Bohužel trjeba wón jězdny stoł. Lino ćerpi pod rědkej chorosću, při čimž so jeho myški zhubjeja a ma snadne žiwjenske wočakowanje. Steffen a Susann Radehosojc dyrbitaj za njeho nětko dom přetwarić dać, dokelž njemóže so hólčec hišće we nim ze stólcom pohibować. Nan Steffen měješe před krótkim operaciju a tak dlěši čas synej pomhać njemóže.
Krótkopowěsće (21.12.23)
Klinika w nowymaj rukomaj
Choćebuz. Klinikum Carla Thiema přewozmje kraj Braniborska. Tole rozsudźichu měšćanscy radźićeljo srjedu. Přičina změny mějićelstwa ma puć za wysokošulsku medicinu w chorowni rubać. Kraj chce nětko wjace hač dwě miliardźe eurow do wutwara kliniki inwestować a tak wjace hač 1000 nowych dźěłowych městnow wutworić.
W nowych medijach prezentne
Budyšin. Medijowy projekt LUCIJA je wutworiło skupinu, kotraž so z wuwiwanjom produktow za youtube- kaž tež instagram-kanal LUCIJE zaběra. Prěni produkt třoch šulerkow 12. lětnika Budyskeho Serbskeho gymnazija, kotrež pod nawodom Michelle Mikławškec dźěłaja, je youtube-wideo na temu sexting, kotryž je wot wčerawšeho online.
Skućićela nětko wobskoržili
