Budyšin (CS/SN). Raz za zawrjene durje pohladnyć, je za Budyšanow stajnje přiwabliwe. Tuž woni sobotu na Dnju architektury składnosć wužichu a sej twarnišćo na Pchalekowej čo. 20 do 26 wobhladachu. Bjezposrědnje pódla Serbskeho domu saněruje Budyska bydlenjotwarska towaršnosć (BWB) platowy twar z dopřewrótoweho časa kaž tež susodne twarjenje čo. 20, hdźež měješe něhdy Smolerjec kniharnja swój domicil.
Kaž bě widźeć, su twarscy dźěłaćerjo nutřkowne stareho twara hižo zwutorhali. Mjezysćěny su so zhubili, dokelž žanu nošnu funkciju nimaja. Wotstronjene su tohorunja kupjele, kotrež běchu něhdy jako cyłk zatwarili. Štóž je z woknom na zadni bok twarjenja pohladnył, je widźał, zo su prěnje dźěła za dwaj liftaj zmištrowane. Přichodni podružnicy dóstanu so do swojeho bydlenja wot lifta přez balkony, kotrež so tohorunja hišće přitwarja.