Žiwjenska kwalita Bukečanow so bórze zwyši

Bukecy (CS/SN). Ze symboliskim prěnim zarywom su wčera w Bukecach twarske předewzaće zahajili, kotrež ma wobydlerjam wjace žiwjenskeje kwality zaručeć. Spočatk meje započnu zwjazkowu dróhu B 6 wot hosćenca „Stary Fryc“ hač ke kromje wsy do směra na Lubij wutwarjeć. Za to hłownu dróhu přez wjes hač do kónca nowembra 2026 dospołnje zawru. Wobjězdka powjedźe po Wósporskej dróze. W tym zwisku přetwarja tohorunja Augusta Bebelowe naměsto wosrjedź wsy a parkowanišći při B 6 z Budyskeho směra. Přetwar parkowanišćow a naměsta jako srjedźišća zjawneho bliskowobchada ma 1,2 milionaj eurow płaćić. Za rozšěrjenje chódnikow je 800 000 eurow planowanych. Cyłkowna naprawa płaći 5,8 milionow eurow. Při wčerawšim prěnim zarywje su so wjesnjanosta Thomas Meltke (njestronjan), sakska ministerka za infrastrukturu Regina Kraushaar, zapósłanc Sakskeho krajneho sejma Marko Šiman (wobaj CDU), zastupjer Lasuv ­Sebastian Thiem, přirjadnica wokrjesa dr. Romy Reinisch a zastupjer twarskeje firmy Strabag gratu přimali.

Budyšin. Dźeń wuměłskeho rjemjesła wotměje so sobotu, 11. apryla, w Budyskim Serbskim muzeju. Wot 13 do 18 hodź. předstaja tam wosebite techniki stareho rjemjesła a ručneho dźěła. Mjez druhim demonstruja, kak hodźa so ple­ćene stólcy reparować, kak so z modlemi ćišći, kak so předźe, wušiwa a kak so jutrowne jejka wužrawaja. Na wšelakich stacijach móža to wopytowarjo sami wuspytać. Zarjadowanje přewjedu w kooperaciji ze Spěchowanskim towarstwom Serbskeho muzeja, ze Spěchowanskim kruhom za serbsku ludowu kulturu a ze Syću za serbsku rěč a regionalnu identitu Zari.

Njeswačidło (SN/MWj). Wot wotnošeneje drasty přez stare awtowe wobruče, wotpadki z domjacnosće a spěrawe wotpadki hač k zbytkam cigaretow bě na dnjach zběranja wotpadkow, kiž su so w měrcu w Budyskim wokrjesu přewjedli, wšitko pódla. Na projekće wobdźělichu so priwatne wosoby, towarstwa, šule, pěstowarnje, předewzaća kaž tež gmejny a města. Jón zwoprawdźichu w režiji přirodoweje centrale wokrjesa, kotraž ma swoje sydło w Njeswačidle.

Lětsa je so dohromady 111 iniciatiwow za to přizjewiło. Wone mobilizowachu něhdźe 2 000 wobydlerjow, kotřiž so na zběranju wotpadkow wobdźělichu. K přirunowanju: Loni zličichu 60 iniciatiwow, w lěće 2024 bě jich 30, zdźěli rěčnica přirodoweje centrale Sophia Haus­wald. „Byrnjež dny zběranja wotpadkow wulce wuspěšne byli, njesměmy přewidźeć, zo wjele ludźi swoje wotpadki dale prosće do přirody mjeta. Hdy bychu akciske dny tomu přinošowali, ludźom wuwědomić, zo je tole nam wšitkim na škodu, by to tohorunja wulki wuspěch był“, Sophia Hauswald praji. Wona so wšitkim wobdźělenym, iniciatoram a podpěraćelam dźakuje a so nadźija, zo so klětu znowa wobdźěla.

Čorny Chołmc (SN/MWj). „Mła samotnosće“ rěka titul lětušeje lěćneje produkcije stawizny wo Krabaće, kaž jednaćel Anton Fuchs zdźěli. Njedźelu, 12. apryla, wot 11 hodź. přewjedu na terenje Čornochołmčanskeho Krabatoweho młyna za to wulki casting za statistow a komparsow. To je mjeztym třeći dźěl wuspěšneje dźiwadłoweje produkcije w režiji Krabatoweho młyna. „Byrnjež so stawizna w tymle lěće tematisce ze samotnosću a ćmu zaběrała, je inscenacija tole žiwa wot mnohostronskosće a energije angažowaneho ludoweho ansambla“, praji Anton Fuchs.