Při pomniku rjedźa
Pančicy-Kukow. Předsydstwo Domowinskeje skupiny Pančicy-Kukow swojich čłonow prosy, zo bychu so w prawje bohatej ličbje na nalětnim rjedźenju wokoło pomnika Ćišinskeho w Lipju wobdźělili. Zhromadna akcija wotměje so štwórtk, 19. měrca, wot 17 hodź. Wotpowědny grat njech sej prošu kóždy sam sobu přinjese.
Nowy informaciski system
Budyšin. Z nowym wuhotowanjom prezentuje so wotnětka internetny informaciski system za wobydlerjow města Budyšina. Kaž měšćanske zarjadnistwo zdźěli, je wobsah samsny kaž dotal, wužiwanje pak je jednoriše. Wobzamknjenja měšćanskeje rady, wuběrkow a dalšich gremijow su přehladnje zestajane a tež zjawne předłohi tam wozjewjeja. Tuž namakaja zajimcy tam wšitke trěbne informacije. Přistup k informaciskemu systemej je z pomocu linka na internetowej stronje města móžny.
Wjazaja křižerske sekle
Změna na stanowanišću
Při Slěbornym jězoru we Łazowskej gmejnje maja noweho wotnajerja
Łaz (AK/SN). Turistiske připrawy na stanowanišću při Slěbornym jězoru pola Bjedrichec we Łazowskej gmejnje maja noweho wobhospodarjerja. Wjetšina gmejnskich radźićelow je na swojim zašłym posedźenju nowemu wotnajenskemu zrěčenju přihłosowała. Wone płaći za recepciju, za wobłukaj stanowanišća za trajnych hosći a tych na krótši čas, za přibrjóh z hrajkanišćom, sportowe nastroje, parkowanišćo a sanitarne připrawy. Nowy wobhospodowar budźe wot 1. apryla firma Stefan Menzel & Ringo Kloß z Wysokeje pola Łaza. Zrěčenje płaći 25 lět wot 2026 hač do 2051. Dotalny wotnajer bě wot lěta 2010 Falk Nowotnick z Mužakowa.
Stanowanišćo na južnym přibrjohu Slěborneho jězora ma něhdźe 200 městnow za trajnych stanowarjow a 60 za dnjowych hosći. Podłu geologiskeje wučbneje šćežki při jězoru leži wjace hač 80 błudźenkow z brunicowych jamow kołowokoło Łaza. Po tym zo je LMBV dźěle jězora saněrowała, móža so wopytowarjo při Bjedrichečanskim pobrjohu wot lětušeho zaso kupać.
Bywši šefredaktor rozprawjał
Rowno. Mjeztym hižo 15. raz je so minjenu sobotu na Rownjanskim Njepilic statoku serbske burske blido wotměło. Tónraz witachmy bywšeho šefredaktora Noweho Casnika Horsta Adama. Jeho rjane rozprawy z wosady a wo našich ludźoch jara rady čitamy. Ćim wćipniši běchmy, wjace z jeho žiwjenja zhonić a tež wo tym, kak swoje přinoški pisa. Derje, zo njeje so wot narunanskeho železniskeho wobchada wottrašić dał a puć z Choćebuza do Rownoho na so wzał.
Jara zajimawe běchu anekdoty Horsta Adama z časa jeho dźěćatstwa, kak bě z přećelemi do Slepoho na reje jězdźił a kajki bě jeho žiwjenski puć z Hornjeje do Delnjeje Łužicy. Dale rozprawješe wopytowarjam wo swojim powołanskim wuwiću po studiju žurnalistiki hač k zastojnstwu šefredaktora. Stajnje bě jeho kredo, zo chce sam dožiwić, wo čimž pisa a tak po móžnosći zmylkam zadźěwać. Po měnjenju Horsta Adama dźensa často čas za dokładnu rešeršu pobrachuje.
Wobydlerjo a wužiwarjo třoch hladarnjow starych ludźi w nošerstwje ...
Krótkopowěsće (17.03.26)
Serbja w koaliciskim zrěčenju
Podstupim. We wčera podpisanym koaliciskim zrěčenju SPD a CDU w Braniborskej wěnuje so wotrězk tež Serbam. Koalicija zwuraznja, zo su Serbja njeparujomny dźěl identity Braniborskeje. Tradicije Serbow a jich rěč su kulturne namrěwstwo kraja. Tole chce koalicija tež w přichodźe podpěrować. Zhromadnje ze Zwjazkom a Sakskej Braniborska Załožbu za serbski lud dale spušćomnje financuje. Hišće lětsa ma so wukubłanje wučerjow serbšćiny w Złym Komorowje zahajić.
Kóžde druhe hróšatko ze Sakskeje
Kamjenc. Sakscy ratarjo produkuja w Němskej něhdźe połojcu hrocha, wo tym informuje Krajny zarjad za statistiku w swojej aktualnej přehladce wo plahowanju zeleniny. 7 960 wot cyłkownje 16 484 tonow hrocha běchu loni w swobodnym staće žnjeli. Hladajo na ekologisku produkciju zeleniny w Sakskej pokazuje statistika: Podźěl płoninow za to je so porno 2024 wo 40 procentow na 828 hektarow zwyšił.
„Swoboda kiwa!“ w Budyšinje
Wo dožiwjenjach w USA
Wojerecy. Na swoje přichodne zarjadowanje w rjedźe „Rěčna swětłownja“ přeprošuje Domowinska župa „Handrij Zejler“ wšitkich zajimcow jutře, wutoru, w 16 hodź. do Domowinskeho doma na Drježdźanskej. Tam porěči bywši wučer a šulski nawoda Joachim Glücklich wo swojich dožiwjenjach w USA. Hesło jeho přednoška rěka „Won do swěta“. Zastup je darmotny. Organizatorojo župy nadźijeja so bohateho wobdźělenja.
Radźićeljo wuradźuja
Pančicy-Kukow. Přichodne zjawne posedźenje zaměroweho zwjazka Při Klóšterskej wodźe wotměje so jutře, wutoru, w 19 hodź. w twarjenju zarjadniskeho zwjazka na Póštowej w Pančicach-Kukowje. Zastupjerjo sobustawskich gmejnow Chrósćicy, Njebjelčicy, Pančicy-Kukow, Ralbicy-Róžant a Worklecy zaběraja so mjez druhim ze změnu wužiwanja plana ležownosćow. Zajimcy su wutrobnje witani.
W aprylu poskića dalše wodźenje
Spalowske žony so zešli
Policija (16.03.26)
Cigaretowy awtomat rozbuchnyli
Budyšin. Na Nowosólskej w Budyšinje su njeznaći w nocy na njedźelu cigaretowy awtomat rozbuchnyli. Swědkojo běchu tři wosoby wobkedźbowali, kiž so z wulkej tobołu wotsalichu. Policija pak wo njeskutku hakle hodźinu pozdźišo zhoni, jako běchu so skućićeljo dawno zminyli. Dźěle awtomata namaka policija nimale 20 metrow dale. Na nim nasta něhdźe 5 000 eurow škody. Dokelž sy tam jenož z kartu zapłaćić móhł, rubichu njeznaći jeničce cigarety, ale žane pjenjezy. Kelko cigaretow to bě, pak njeje znate.
Region móhł profitować
W naprašowanju „poměrnje sylny potencial za dwurěčnosć“ zwěsćili
Wojerecy (KD/SN). Kak posudźuja wobydlerjo Hornjeje a Delnjeje Łužicy swoje tuchwilne a přichodne žiwjenje, strukturnu změnu, atraktiwitu regiona a wuznam dwurěčnosće? Na tele a dalše prašenja wotmołwja kóžde lěto we wobłuku łužiskeho monitoringa tysac žonow a muži wot staroby 16 lět. Woni wobydlerstwo po starobje, splahu, bydlenju a kubłanskim niwowje reprezentatiwnje wotbłyšćuja, kaž dr. Jörg Heidig minjeny tydźeń na zarjadowanju Wojerowskeje ludoweje uniwersity rozłoži. Zhromadnje ze Stefanom Bischofom bě wón prašenja w nadawku Sakskeje agentury za strukturne wuwiće zdźěłał. Loni su Serbja w srjedźišću woprašowanja stali, tohodla bě Domowina na zestajenju naprašnika wobdźělena.
