W korčmach live-hudźba klinčała
Radźićeljo wuradźuja
Chrósćicy. Přichodne zjawne posedźenje Chróšćanskeje gmejnskeje rady wotměje so štwórtk, 8. meje, w 19 hodź. w tamnišim gmejnskim a kulturnym centrumje. Mjez druhim předstaja tam projekt spóznawanja hornjoserbšćiny. Dale póńdźe wo prašenje, kotre předewzaće ma šulerjow zakładneje šule na płuwansku wučbu wozyć.
Přeprošuja na wopomnjeće
Wojerecy. Na wopomnjenske zarjadowanje składnostnje wuswobodźenja wot nacionalsocializma přeprošuje štwórtk, 8. meje, město Wojerecy k wopomnišću na Bonhoefferowej. Holcy a hólcy Wojerowskeje wyšeje šule wuhotuja krótki program. Porěčitaj měšćanosta Mirko Pink a nawodnica šule Romy Stötzner. Zarjadowanje je zdobom zakónčenje politisko-historiskeho kubłanskeho projekta „Přećiwo zabyću“ w tymle šulskim lěće. Wopomnjenje započnje so w 13 hodź. Wšitcy zajimcy su wutrobnje přeprošeni.
Pčołkam pomhać
Lipa hojenska rostlina
Dźěći pomoluja zmija
Wjele poskitkow na lětušim Budyskim nalěću w Sprjewinym měsće
Budyšin (CS/SN). Tři jewišća a wjele kołowokoło – to je skrótka prajene lětuše Budyske nalěćo. Na jewišćach na Žitnych wikach, na Hłownym torhošću a na Mjasowych wikach wustupja wuměłcy najwšelakorišich hudźbnych žanrow. Nimo toho smědźa so lubowarjo elektroniskeje hudźby na wosebite reje na Butrowych wikach wjeselić. Dohromady postara so 50 programowych dypkow a 500 sobuskutkowacych wot 30. meje hač do 1. junija wo wjele zabawy, zdźělichu zamołwići tele dny na nowinskej rozmołwje.
Budyske nalěćo budźe swjedźeń za wšitke generacije. Njedźelu na Dnju dźěsća maja dźěći w srjedźišću stać. Na Žitnych wikach změja wosebity koncert za małych přihladowarjow. Na Bohatej hasy budźe klawn po puću a na Mjasowych wikach móžeš so šminkować dać. Tam změja tež trampolin a paslensku dróhu, kotruž organizuje zawod Alstom. Na Mjasowych wikach wotměja so njedźelu tež čaporowe wiki.
Nalětni swjedźeń wobohaćili
Ćisk (JT/SN). Ze serbskimi a němskimi basnjemi, pěsnjemi a rejemi kaž tež ze swojimi serbskimi drastami zahorichu holcy a hólcy Ćišćanskeho serbskeho dźěćaceho towarstwa minjeny kónc tydźenja w połhodźinskim programje přihladowarjow na nalětnim swjedźenju před Ćišćanskim statokom. Předewšěm předstajichu při tym aktiwity kołowokoło stajenja a mjetanja meje.
20 do 25 dźěći, mjez nimi štyrjo hólcy, zetkawaja so tydźensce k hrajkanju, paslenju a rejwanju w rumnosćach Ćišćanskeho wjesneho zarjadnistwa. W srjedźišću při tym steji, zo nawuknu jednore serbske słowa a pěsnje a zo so ze serbskimi nałožkami zaběraja. To je ćim wažniše, dokelž pochadźa najwjetši dźěl dźěći ze swójbow, hdźež doma serbsce njerěča. Předsydku towarstwa Annett Rößler podpěraja při tym Tina Lange, Nicole Strauch, Anne Seidel a Brunhilde Richter.
Minjene dny su so nahrawanja za pasion „Sćěhuj mje“ wotzamknyli. ...
Krótkopowěsće (06.05.25)
Milinarnja jako pomnik dźěła
Janšojcy. Janšojska milinarnja a briketowanja w Čornej Pumpje stej do lisćiny za pomnikoškit w Sakskej zapřijatej. Wonej matej wosebity wuznam za łužisku industrijowu kulturu. To zdźěli sakski krajny zarjad za pomnikoškit. Zdobom skedźbnjeja na modernizowanje a dalše wužiwanje připrawow tuteju pomnikow, kotrejž móhłoj tež transformaciji energijowych stejnišćow přinošować.
Pohłubšatej zhromadne dźěło
Budyšin. Na přeprošenje Serbskeho instituta w Choćebuzu přebywaja tam tuchwilu wědomostnicy ze Sewjerofriziskeho instituta. Hosći zajimuje slědźerske dźěło na polu sorabistiki w Choćebuzu a Budyšinje. Institutaj přeslědźujetej zwonkauniwersitnje kulturu, rěč a stawizny swojeju mjeńšinow a k jeje skrućenju a zdźerženju přinošujetej.
Nowy Casnik online składowany
„Rapsodie Lusacienne“ wulka překwapjenka była
Budyšin. W swojim 3. sinfoniskim koncerće w aktualnej sezonje tematizowaše Serbski ludowy ansambl Budyšin (SLA) njedawno tworjenje sławnych francoskich ekspresionistow w prěnjej połojcy 20. lětstotka. Jako jara hódnotnu wurywanku prezentowaše dirigentka Katharina Dickopf z wuběrnym solowym wiolinistom Ludwigom Blaserom a z orchestrom SLA „Rapsodie Lusacienne“ (Łužisku rapsodiju) Pariskeho komponista Marca Delmasa. Wot basnicy Marie de Vaux Phalipau na kulturu Łužiskich Serbow skedźbnjeny wubra wón w 1920tych lětach z „Pěsničkow Łužiskich Serbow“ J. A. Smolerja rjad melodijow a skomponowa elegantnu rapsodiju w stilu noweho myslenja. Tak stwori wón z motiwiki serbskich ludowych melodijow na hudźbnych barbach bohate a z tym skutkowne wuměłske wobrazy.
Wosebity nyšpor za bikerow
Čěska kapała zahudźi
Wojerecy. Srjedu, 7. meje, wotměje so we wobłuku lětušich Wojerowskich hudźbnych swjedźenskich dnjow koncert serbskich spěwow. Wot 19.30 hodź. zahudźi na hrodźe čěska kapała Lidová muzika z Chrástu. Wona wustupi z programom z albumow „Za čěskimi horami“ a „Weddings&Funerals“. Regionalne spěwy, zwjetša ze Smolerjoweje zběrki we wobdźěłanjach Vojtěcha Koubi a Jaroslava Krčeka, předstaja čěscy hudźbnicy srjedu a štwórtk tež na třoch Wojerowskich šulach, mjenujcy na spěchowanskej šuli, na Zejlerjowej zakładnej šuli a na Lessingowym gymnaziju.
Wotewru wustajeńcu
Budyšin. František Vydra a jeho wuměłske tworjenje stejitej w srjedźišću wustajeńcy „Lužice – má láska“, kotruž wotewru jutře, wutoru, w 17 hodź. w Budyskej Serbskej kulturnej informaciji. Wo hudźbne wobrubjenje postara so serbski spěwotwórc Bernd Pittkunings. Přehladka je hač do 31. julija přistupna.
