Kreatiwne recepty wuspytali
Tři žony za wosebity wólbny bój
Njeswačidło (SN/mb). Najebać prózdnu wólbnu cedlku w druhim kole wólbow wjesnjanosty w Njeswačidle njedźelu, 28. septembra, je so tola wólbny bój zahajił. To je zasłužba třoch žonow, kotrež zjawnje wo wolerjow wabja. Anett Pötschke ze Šešowa bu přez lisćinu „rjemjesło a přemysło“ jako gmejnska radźićelka wolena. Mišterka za wóčnu optiku z praksu w Rakecach a mobilom za optiku je našemu wječornikej zdobom informacije dalšeju kandidatkow sposrědkowała – cyle nowy to politiski stil. Silke Mickan-Ziesch z Njeswačidła dźěła jako hospodarka za strowotnistwo. Třeća w tutym zwjazku demokratkow je Juliane Mazalla z Łuha, swobodna rěčnica na kwasach a pohrjebach.
Spěchowanski kruh za serbsku ludowu kulturu je minjeny kónc ...
Chce na swoje serbske korjenje nawjazać (8)
Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Hanka Krawcowa je přeco hižo serbsce rěčeć chcyła.
Jako Johanna a jako Hanka sym w Hornjej Łužicy, w Delnim Wunjowje blisko Hodźija wotrostła. Nětko bydlu hižo wot lěta 1989 w Drježdźanach. Tehdy sym za wukubłanje na chorobnu sotru do Drježdźan šła. Pozdźišo złožich hišće studij za socialne dźěło/socialnu pedagogiku a dźěłach hač do lońšeho jako socialnowědomostnica na slědźerskim instituće Ewangelskeje wysokeje šule Drježdźany. Ćežišćo slědźenja bě přiswojenje pisomneje rěče a analfabetizm w Němskej. Tute slědźenje mi wuwědomi, kajke wužadanje ludźo zmištruja, hdyž něšto wuknu, štož so w jich žiwjenskim swěće njepraktikuje. Tuchwilu absolwuju sabatowe lěto, štož mi zmóžnja, so na projekće DOMOJ wobdźělić.
Talent na jewišću a papjerje
Po maturje najprjedy raz něšto druheho, je sej Celina Knopec mysliła. Tohodla 18lětna hižo wot spočatka měsaca redakciju Serbskich Nowin podpěruje. Dźeń wote dnja so wona tuž z Kozarc na puć do Budyšina nastaja. Maturowała je młodostna lětsa na Budyskim serbskim gymnaziju.
Do redakcije je wona přišła, „zo by dohlad do dźěła nowinarjow dóstała“. Předewšěm stara so Celina wo prezencu našeho wječornika na Instagramje a Facebooku. Tute dźěło ju wupjelnja. Přiwšěm pak so wona tež druhim temam wěnuje a je hižo někotryžkuli zajimawy přinošk nadźěłała. „Při tym sym nawuknyła, swój wobswět dokładnišo wobkedźbować“, 18lětna zwěsća.
Krótkopowěsće (18.09.25)
Wurjadnu „hłownu“ wotměli
Budyšin. Z formalnych přičin je Maćica Serbska wčera wurjadnu hłownu zhromadźiznu w Budyskim Serbskim domje wuhotowała. Jednohłósnje schwalichu čłonojo přiměrjeni wustawkow, kotrejž rjadujetej nadawki předsydstwa towarstwa a jeho reprezentancu w juristiskim zmysle. Po zhromadźiznje zahajichu sezonalny rjad Maćična akademija z přednoškom „Prěni lětdźesatk nakładnistwa Maćicy Serbskeje“ dr. Franca Šěna (čitajće wjace we wutornym wudaću SN).
Wutwar A4 hakle po 2040?
Drježdźany/Budyšin. Planowanje wutwara A4 wuchodnje Drježdźan je Zwjazk jeničce hač do Hermsdorfa přilubił. Dalše rozšěrjenje awtodróhi na tři jězdnje do kóždeho směra chce po prognozy wobchada 2040 pruwować. Tole wuchadźa z wotmołwy sakskeho knježerstwa na naprašowanje zapósłanca krajneho sejma Franka Peschela (AfD). Peschel sej wjac angažementa Sakskeje za Łužicu žada.
F-35 dale preferuja
Radźićeljo wuradźuja
Njebjelčicy. Přichodne posedźenje Njebjelčanskeje gmejnskeje rady je dźensa, srjedu, w 19 hodź. w gratowni Njebjelčanskeje wohnjoweje wobory. Mjez druhim předstaja připrawu, w kotrejž chcedźa wotpadki nachwilnje składować a wobdźěłać. Dale zaběraja so radźićeljo z twarskej próstwu za składowansku halu žita w Miłoćicach. Nimo toho chcedźa wobzamknyć, zo Njebjelčanska gmejna z towarstwa IDOL wustupi. Towarstwo spěchuje styki wobydlerjow do druhich krajow.
Z krajnym radu so rozmołwjeć
Róžant. Dalše rozmołwne koło z Budyskim krajnym radu Udom Witschasom (CDU) budźe jutře, štwórtk, w 17.30 hodź w sydarni Róžeńčanskeho gmejnskeho zarjadnistwa. Tam móža zajimcy na njedostatki skedźbnić a swoje prašenja wotbyć. Zarjadowanje měri so hłownje na wobydlerjow gmejnow zarjadniskeho zwjazka Při Klóšterskej wodźe. Přizjewjenje trěbne njeje.
Peter Orloff spěwa
Twarja měrjensku staciju
Při Klóšterskej wodźe zwěsća wysokosć a mnóstwo wody w rěce
Pančicy-Kukow (SN/MWj). Lětsa w meji su w Pančicach-Kukowje nowe wjesne srjedźišćo na městnje bywšeho hosćenca zjawnosći oficialnje přepodali. Runje hakle su so wobydlerjo na nowy napohlad zwučili, to rozpřestrěwa so tam hižo zaso wulke twarnišćo. Přijězd na areal přez móst je nachwilnje asfaltowany, při rěce wuhladaš tołste roły, bagry so tam a sem wjerća a wšudźe leža twaršćizny. Krajny zarjad za wobswět, ratarstwo a geologiju (LfULG) twari tam nowu měrjensku staciju pegela Klóšterskeje wody.
Na zamordowane Židowki spominali
Saněruja za předšulske dźěći
Dołho je so Wulkodubrawska gmejna wo nowotwar swojeje dźěćaceje kupy ze žłobikom, pěstowarnju a hortom prócowała. Ale bohužel podarmo. Nětko dźěćace kubłanišćo w mjeńšich kročelach ponowjeja.
Wulka Dubrawa (UM/SN). We Wulkodubrawskej dźěćacej kupje nětko předšulski wobłuk saněruja. „Nimo ponowjenja planuja tež wohnjoškitne naprawy a nowe sanitarne připrawy“, rěka we wupisanju nošerskeho towarstwa. Spěchowanskich wuměnjenjow dla dyrbja dźěła hižo kónc oktobra wotzamknyć.
W separatnym a wotdźělenym předšulskim wobłuku za čas twarskich dźěłow žane dźěći njehladaja. W tamnych wšo po zwučenym wašnju dale běži. Předšulski je jedyn ze šěsć wobłukow, z kotrychž dźěćaca kupa wobsteji. Nimo předšule maja wobłukaj za pěstowarnju, dwaj za hort a lěta 2013 ponowjeny dźěl za žłobik. Kompleks domow su w 1970tych lětach twarili. Wot toho časa jón bjez wuwzaća za hladanje dźěći wužiwaja.
