Budyšin. Na wšěch štyrjoch adwentnych njedźelach poskićuje Tachantska wosada swj. Pětra w Budyšinje stajnje w 15 hodź. „Pišćelowu hudźbu k non“, to rěka (hudźbne) modlenje popołdnju w třoch. Lětuše ćežišćo je hudźba serbskich komponistow, kotruž su serbscy organisća podali. Minjenu prěnju adwentnu njedźelu je młody ewangelski Serb Johannes Kral nowy hudźbny rjad zahajił. Z Hodźijskeje wosady pochadźacy je so spěšnje elitarnemu kruhej najlěpšich dorostowych organistow přidružił. W programowym łopjenje rěka, zo je wón mjez druhim hižo w Pětrowej cyrkwi w Romje kaž tež na Silbermannowych pišćelach w Drježdźanskej katedrali hrał. W swojim ródnym měsće zahra w tachantskej cyrkwi swj. Pětra nětko tohorunja na Kohlowym instrumenće, po tym zo bě to wo­spjet na wulkich Eulowych byrglach zady w ewangelskim dźělu cyrkwje činił.

Geigerzählera wuznamjenili

Wojerecy. We wobłuku spěwneho swjedźenja Hoyschrecke, kotryž wotmě so minjeny kónc tydźenja we Wojerowskej Kulturnej fabrice, wuznamjeni jury „wirtuozneho punkera ze serbskimi korjenjemi“ Paula Geigerzählera z mytom Hoyschrecke 2025. Po wotumje publikuma wobsadźi wón druhe městno po skupinje Traumvagabunden.

Twarja nowu čisćernju

Wochozy. Předewzaće Łužiska energija a milinarnje (LEAG) při Wochožanskej brunicowej jamje nowu čisćernju wody přihotuje. Připrawa ma stupacu dnownu wodu za ekosystem čisćić. Přichodny tydźeń chce LEAG zakładny kamjeń za nju połožić. Hižo klětu ma čisćernja dźěłać započeć, předewzaće wčera zdźěli.

Zamołwitosć wot 14 lět?

Bydlenski mobil bě pokradnjeny

Horni Wujězd. Wčera rano kontro­lowachu policisća na awtodróze A 4 ­pola Hornjeho Wujězda 23lětneho wodźerja bydlenskeho mobila, kotryž bě do směra na Zhorjelc po puću. Kaž so wukopa, bě čisło jězdźidła falšowane. Dale policisća zwěsćichu, zo bu awto ­sobotu do toho blisko Hildesheima ­pokradnjene. Litawskeho wodźerja nachwilnje zajachu. Wón steješe pod wliwom drogow. Wčera chcyše sudnik ­rozsudźić, hač tyknu 23lětneho do přepytowanskeje jatby.