W Nowym Měsće/Sprjewja su mějićeljo korčmy „K hamorej“ składnostnje 300. róčnicy wobstaća minjenu njedźelu na jubilejny koncert přeprosyli. Swjedźensce wupyšeny dwór bě hač na poslednje městno wobsadźeny.

Nowe Město/Sprjewja (JoS/SN). Wot balkona korčmy „K hamorej“ strowja tři hoberske slěborne balony z jubilejnej ličbu 300. Hižo připołdnju přichadźeja hosćo na swjedźensce wupyšeny dwór, hač­runjež je zazběh programa z orchestrom Łužiska brunica hakle za 15 hodź. připowědźeny. To pak njewadźi, wšako so čas při bjesadźe a čerstwje natočenym piwku spěšnje minje.

Pospochi přijimujetaj korčmarjec mandźelskaj Eberhard a Ruth Holz gratulacije k 300. jubilejej wobstaća korčmy. Poprawom wšak běštaj wobaj wo „žane dary“ prosyłoj – najebać to přepoda jim Bórkhamorčan Joachim Glücklich, ně­hdyši nawoda Serbskeje wyšeje šule w Ralbicach, wućišćanu předrozprawu Serbskich Nowin wo korčmje, inkluziwnje němskeho přełožka w dekoratiwnym ramiku. Korčmarjec dźowka Franciska Wels so wjeseli: „Tutón dar dóstanje na sćěnje w korčmje swoje čestne městno.“