Pěskecy (SN/MiR). Spočatk lěta hakle bě Pěskečan Křesćan Žur w swójbnym kruhu naspomnił, zo by lětuši 800. jubilej prěnjeho naspomnjenja wjeski Pěskecy dobra składnosć była jón z wjesnjanami a mnohimi hosćemi woswjećić. Zhromadnje z mandźelskej Sabinu pytaštaj za zwjazkarjemi. Tych nańdźeštaj mjez čłonami wjesneho kluba, dobrowólneje wohnjoweje wobory a sportoweho ­towarstwa. „To je w Pěskecach samo­zrozum­liwosć. Pomhamy sej mjez sobu bjez ­wulkeho prošenja“, tak Sabina Žurowa praji, „wšako to dobrej zhromadnosći w našej wjesce słuži, hdyž su wšitcy wjesnjenjo na zwoprawdźenju idejow a na wšelakich aktiwitach wobdźěleni.“ Tuž wabi třidnjowski swjedźeń při gratowni wosrjedź Pěskec z mnohimi překwapjenkami. Swjedźenski kónc tydźenja zahajejo wubědźuja so jutře, pjatk, wot 18.30 hodź. dobrowólne wohnjowe wobory z Pěskec a wokolnych wsow na sportnišću wsy.