Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kiž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Přichodny čas jich w našim wječorniku předstajimy. Marco Di Sarno chce so bjez pomocy serbsce rozmołwjeć móc.
(Domojnik, tak so wobdźělnicy rěčneho hnězda projekta Domoj mjenuja, předstaja sam sebje w formje interviewa.)
Štó sy a čehodla sy tu mjez nami?
M. Di Sarno: Rěkam Marco Di Sarno a sym po wokołopuću z Badensko-Württembergskeje přez Berlin do Budyšina přišoł. Mój luby nan je Neapelski hospodarski ćěkanc (tehdy rěkaše to hišće hóstny dźěłaćer), kiž je sej rjanu němsku blondinku namakał. (Ale běše poprawom skerje wona, kiž je jeho namakała.) W Berlinje sym staršiskemu přikładej slědował a w lěće 2022 z rjanej serbskej blondinku do jeje domizny přećahnył. Tuž sym dźensa prěni „Italošwab“ w serbskim kraju (druheho znajmjeńša hišće zeznał njejsym).
Čehodla w projekće DOMOJ sobu činiš?
