Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (64)

Kruwa je najzbožowniša, hdyž móže so cyły dźeń woměrje swojej najlubšej činitosći wěnować – žranju. Přerěznje 16 do 20 kilogramow picy to wšědnje je. Něhdźe 6 do 12 hodźin wob dźeń wona žerje a 8 do 14 hodźin žuwa (wiederkäuen) a wotpočuje, zo by picu prawje požiwała.

Tak móžeš hižo přez ryzy wobkedźbowanje přijeća picy kruwow zwěsćić, hač so jim derje dźe abo nic.

Bjez dźiwa tuž, zo rži burej alarmowacy zwónčk we wušomaj, hdyž skoćo raz bjezlóštnje před picu steji a nježuwa. Přičiny tajkeho zadźerženja su wšelake. Wot powšitkowneje infekcije přez bolosće cyle druhdźe hač k mylenjam metabolizma (Stoffwechselstörung) je wšitko móžne.

Njech dźe nam dźensa wo problem bjezposrědnje w klamje howjadow. Při tym hrajetej dwě bakteriji rozsudnu rólu, a wobě matej podobne mjeno actinobacillus a actinomyces.