Zaso hosćenc na Mnišoncu

Wjelećin. Nowi wobsedźerjo hosćenca na Mnišoncu witaja wot jutřišeho pjatka w 10 hodź. zaso prawidłownje wot štwórtka do póndźele hosći w bawdźe na horje. To nam Johannes Mahr, kotryž je zdobom jednaćel šamotownje we Wětrowje, na naprašowanje zdźěli. Wón je zhromadnje z wóčnym lěkarjom Stephanom Kretschmarjom a dalšim přećelom inwestował a dobry gastronomiski personal nawabił.

Hotel hižo njetrjebaja

Budyšin. Budyski wokrjes chce Sprjewiny hotel jako dom za požadarjow azyla zawrěć. Kónc oktobra wotnajenske zrěčenje z wobsedźerjom kónči. Krajnoradny zarjad wopodstatni zawrjenje domu ze spadowacymi ličbami ćěkancow a dosć kapacitami na druhim městnje. Cyłkownje je w Budyskim wokrjesu 1 700 městnow za požadarjow azyla přihotowanych. Z toho je něhdźe 650 městnow swobodnych.

Digitalna karta drastow Sakskeje

Zahrodkarjam najskerje dawno hižo w porstach swjerbi, wšako chcedźa skónčnje zaso na swojich rjadkach podźěłać. Něchtóžkuli je snano hižo radiski wusył abo buny tykał. Kak wšitko prawje sčiniš, wo tym móžeš so na dnju wotewrjeneho zahrodnistwa wobhonić. Na njón mjenujcy přichodny kónc tydźenja we wja­corych zahrodnistwach přeprošuja. Kaž w zašłych lětach změja tam znowa wulki wuběr najwšelakorišich rostlin, kotrež ­jenož na to čakaja, zo do zemje přińdu. Paleta wopřija zeleninowe rostliny, wšelake kwětki a kerki, ale tež štomy. Mjez nimi budu tež někotrežkuli nowosće, wo kotrychž chcedźa wopytowarjow informować. Marian Wjeńka

Něhdźe 500 wěriwych wobdźěli so wčera na dźaknej Božej mši křižerjow w Róžeńće, kotruž Ralbičanski farar, kanonik Šćěpan Delan, z dźesać koncelebrantami swjećeše. Mjez nimi běše generalny wikar Andreas Kutschke z Drježdźan. Kapłan Florian Mróz w swojim prědowanju křižerjow napominaše, zo měło to, štož su jutrońčku wozjewjeli, w nich skutkować a zo měli woni posoljo nadźije wostać – nic pak wótře, ale přeswědčiwje. Serbski rozhłós je kemše live wusyłał. Foto: Rafael Ledźbor

Nadawk planowanja w Hamoru najprjedy raz přepodać njemóža

Hamor (AK/SN). Awlu Hamorskeje šule tamniša gmejna tak saněrować a pře­twarić njemóže, kaž bě sej to předstajiła. Na zašłym posedźenju gmejnskeje rady nadawk za planowanske dźěła přepodać njemóžachu. Pjeć radźićelow bě přećiwo předłoze hłosowało, štyrjo so hłosa wzdachu. Tuž su namjet wotpokazali. ­Poprawom dyrbješe inženjerski běrow z Krušwicy za 50 000 eurow objekt, statiku a wohnjoškit planować.

„Hižo 2019 smy saněrowanje awle přihotowali“, rozłoži twarska nawodnica gmejny Cortina Kokles. „Při tym měještej so tež dwě rjadowniskej rumnosći wu­tworić. Za to bychmy nimale twarsku dowolnosć dóstali.“, wona doda. 2022 pak Zhorjelski wokrjes připowědźi, zo šulskej awli status pomnikoškita skića. Z tym wšitke plany najprjedy raz wotpočowachu. Pomnikoškit płaćeše za wobraz na zadnjej sćěny, třěchu, rjadowniskej rumnosći a za mobilnu sćěnu. „Awla bě za čas NDR eksperimentelny twar. Pomnikoškitej bě wažne, zo konstrukciju zachowaja“, praji Cortina Kokles. Gmejna chcyše 1,3 miliony eurow inwestować.