Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow ­prócuja. K tomu ­přinošować chce naša serija z pokiwami z weterinarneje ­mediciny. (71)

Dokelž so schorjenja wokoło požiwanja howjadow přeco zaso we wšědnym dnju pokazuja, sym tež dźensa padaj sobu přinjesła, hdźež so mylenje w požiwanskim systemje negatiwnje na cyłkownu strowotu howjada wuskutkuje.

Wobstatki picy howjadow su dźensniši dźeń wosebje pola dejkow derje wu­pytane. Zestawa picy wuskutkuje so mjenujcy na př. na mnóstwo produkowa­neho mloka abo tež na mnóstwo bělkowinow w mloku. Na domjacych polach a łukach žněja so přewažnje trawa, kukurica a soja za wotpowědnu silažu. Howjada, kotrež so jeno kormja, dóstanu zwjetša jenož silažu z trawy, syno abo zastaruja so přez cyłe lěto wonka na pastwje.

Na swjedźenju towarstwow talenty swojeje wsy wotkryli

Ćisk (JT/SN). Při kóždolětnym swjedźenju towarstwow w Ćisku ma stajnje druhe towarstwo nadawk program wuhotować. Lětsa měješe tole młodźinski klub ze swojimi 50 čłonami na starosći. Minjenu sobotu přeměnichu woni wjesny hosćenc na šarmantne hrajnišćo znateho telewizijneho wusyłanja „Supertalent“. Po programje wjedźeštaj Domenic Ludwig a Alexander Rodig. Jury přisłušachu Ronny McDonough, Lucy Tillich a Jim Lewa, kotřiž z wjele lóštom a žortom jako Bruce Darnell, Heidi Klum a Heino wustupowachu. Předewšěm komentary Ronnyja McDonougha, kotryž z Washingtona pochadźa a we wobłuku šulerskeje wuměny tuchwilu pola Schowtkec bydli, wuwabichu mjez hosćimi wjele smjeća. Ze swojim sympatiskim ameriskim akcentom wón hnydom na prominentneho Bruca Darnella dopominaše.

Nowa Wjeska. Dohodowne wjeselo knježeše minjenu sobotu na nawsy w Nowej Wjesce. Tam přichadźeše tójšto ludźi na tradicionalne adwentne wiki. Wopytowarjow wočakowachu wonjate chłóšćenki, horce napoje, dujerska hudźba a žadny hósć z dalokeho sewjera. Hižo popołdnju knježeše we wsy hołk a tołk. Wjeršk pak bě, jako rumpodich přińdźe, sej přeća najmłódšich wjesnjanow naposka a jim ze swojeho měcha mału překwapjenku wobradźi.

Wo hudźbne wobrubjenje postarachu so młodźi dujerjo, kotřiž ze swojimi instrumentami klasiske a moderne hodowne pěsnje zanjesechu. Jich zynki swjatočnu atmosferu hišće přisporjachu. Tež kulinariski poskitk bě mnohostronski. Tak móžachu hosćo runje tak bur­gery kaž praženu kołbasku abo słódke, ze šokoladu poćehnjene płody woptać. Njebě stajnje lochko, so za to jedne abo tamne rozsudźić.

Wosebje rjenje bě při lěhwowym ­wohenju, hdźež so Nowowješćenjo a jich hosćo ze šalku horceho wina w ruce zhrěchu. Adwentne wiki w Nowej Wjesce skićachu tež lětsa zaso poradźenu ­měšeńcu tradicije, wokřewjenja a zhro­- madnosće. Emma Młynkec

Dźěwin (AK/SN). Woteběraca ličba dźěći w Sakskej so wočiwidnje w pěstowar­njomaj Dźěwinskeje gmejny wuskut­kuje. Katja Schäfer, nawodnica pěstowarnje „Wroblace hnězdo“ w Dźěwinje, kotraž je w nošerstwje tamnišeje gmejny, tole na zašłym posedźenju gmejnskeje rady rozłoži. Wot dohromady 65 městnow je tuchwilu jenož 49 wobsadźenych. Přede­wšěm w žłobiku maja swobodne kapacity. Wot 14 městnow su tam jenož štyri wobsadźene. W pěstowarskej starobje maja 26 dźěći, ale 29 městnow. Samsna diferenca wobsteji w horće, hdźež maja 22 městnow a jenož 19 dźěći. „Prócu­jemy so wo kóžde dźěćo“, na­wodnica ­pěstowanje wuzběhny. Dźě­winske ku­błanišćo ma nimo toho tež personalne starosće. Lětsa bě tójšto kubłarkow chorych. Dwójce dyrbjachu ­swoje wote­wrjenske časy skrótšić. W februaru su ­pěstowarnju samo tydźeń zawrěli.