Swjedźeń swěčkow w hrodowym parku w Njeswačidle je stajnje zaso wjeršk w protyčce mnohich ludźi. Lětsa wužichu organizatorjo składnosć, zo bychu na swjedźenju architektonisku parličku wotkryli.

Njeswačidło (MČu/SN). Třeći swjedźeń swěčkow běchu minjenu sobotu w baroknym hrodźe w Njeswačidle zarjadowali a z tym mnohich wopytowarjow přiwabili. Nimo koncerta Salonowych filharmonikarjow z Lipska bě poswjećenje noweje wodoweje fontany z hudźbnym wobrubjenjom wosebity podawk w parku hroda. Ideju wodotryska bě Njeswačanska kolesowarska a pućowanska skupina loni při wulěće do Minakałskeho hrodu zrodźiła. Tam mjenujcy wuhladachu wodowu fontanu, kotraž w takće hudźby pryska. Poněčim zrawješe myslička: „To by tola tež něšto za Njeswači­dło było!“ Dokelž su wodotryski a wo­sebite fontany za zelenišća baroknych hrodow typiske, so tuta ideja perfektnje do hrodoweho parka hodźeše.