Klinikum „Łužiska jězorina“ poskitk městnow na fachowej šuli rozšěrił

Wojerecy (AK/SN). We Wojerowskim klinikumje „Łužiska jězorina“ su minjeny pjatk dalši zakład za wjace swójskeho mediciniskeho fachoweho dorosta połožili. „1. septembra móžemy naše třilětne wukubłanje na hladarku abo hladarja z cyłkownje 49 wukubłancami w dwěmaj rjadownjomaj zahajić. Telko požadarjow dotal hišće měli njejsmy“, nawodnica mediciniskeje powołanskeje fachoweje šule klinikuma Heike Kalkbrenner na poswjećenju nowych wukubłanskich rumnosćow na Lipowym puću 43 podšmórny.

Dohromady 200 000 eurow je pře­najer, předewzaće za management imobilijow VAE tzwr, za natwar noweje mediciniskeje powołanskeje fachoweje šule na cyłym poschodźe twarjenja inwestował. Za 100 000 eurow je klinikum sam potom rumnosće technisce wuhotował. Za wukubłanje zamołwići chcedźa ličbu wukubłanskich městnow dołhodobnje wot 50 na 150 zwyšić. Tuchwilni přichadźeja wukubłancy předewšěm z Wojerec a wokolnych gmejnow kaž tež z Grodka a ze Złeho Komorowa. Jich wuwučuje dohromady dźewjeć fachowych wučerjow.