Běła Woda (AK/SN). „Po lěće 1990 dyrbi naše město druhi raz wulku změnu strukturow zmištrować“, wuzběhny Dieter Lößner (CDU) na swjatočnosći składnostnje 90. róčnicy spožčenja měšćanskeho prawa minjeny štwórtk na měšćanskim torhošću. Lößner, kiž bě wot 1990 do 2001 měšćanosta Běłeje Wody, dopominaše so na prěnje lěta po pad­njenju murje, jako bě „w měšćanskim ­zarjadnistwje naraz šěsć decernatow a 20 hamtow, w kotrychž je wjace hač 1 000 ludźi dźěłało“. Porynsko-westfalske partnerske město Brühl je Běłej Wodźe tehdy z personalom a fachowej poradu poboku stało. Partnerstwo hač do dźensnišeho wobsteji. Zastupowaca měšćanostka města Brühl běše na swjatočnosć přichwatała a zwurazni w swojich postrownych słowach: „Měšćanske partnerstwa přisporjeja mjezsobne zrozumjenje a zadźěwaja njedorozumjenjam. Z tym přisporjeja zdobom swobodu, ­demokratiju a tolerancu w našim kraju.“