Wěriwi z cyłeho swěta w Róžeńće so schadźowali a swoju wěru swjećili

Róžant (MČu/SN). W krasnej wjesce Róžant su so minjeny kónc tydźenja wěriwi z cyłeho swěta schadźowali. Ze wšěch dźělow Němskeje, z Awstriskeje, Pólskeje, Čěskeje a samo z Indiskeje běchu na lětuši GiG-festiwal přichwatali. Zhromadnje su kołowokoło putniskeje cyrkwje swoju wěru swjećili.

Festiwal zahajichu pjatk z Božej mšu. Po tym pokazachu křesćanki film „Józef – wutroba nana“, kotryž skutkowanje swjateho Józefa – tež w dźensnišim času – předstaji. Tež sobotniši dźeń hosćo z Božej mšu zahajichu. Na to sćěhowaše inspirěrowacy přednošk pod hesłom „Bóh lubuje twoje ćěło“. Po tym móžachu so wobdźělnicy w najwšelakorišich dźěłarničkach wuspytać. Tak na přikład w spěwanju ze serbskim młodźinskim chórom pod nawodom Claudije Wirthoweje w projekće „Wunderkinder“ towarstwa Kaleb abo w dźěłarničce wo wuznaću wěry a stawiznach franciskanow.

Zaběraja so z prawicarstwom

Grodk. Braniborski minister za nutřkowne naležnosće René Wilke (njestronjan) zetka so jutře ze zastupjerjemi wjacorych łužiskich komunow. Ćežišćo wuradźowanjow je prawicarstwo, kotrež zda so na juhu Braniborskeje dale a bóle přiběrać. Tole připowědźi wčera Łužiske koło, kotrehož rěčnica je Grodkowska měšćanostka Christine Herntier (njestronjanka). Tež sakske komuny kaž Łaz a Wojerecy su we Łužiskim kole zastupjene.

Informacije nětko delnjoserbsce

Podstupim. Wot julija staji Braniborska wuběrane wukony zarjadnistwa na centralnym serwisowym portalu tež w delnjoserbšćinje k dispoziciji. Z tym zwjaz­kowy kraj k runostajenju Serbow a Němcow přinošuje. Z pomocu linka móžeš mjez druhim formular „Wukon za pomoc při hladanju w Bórkowach“ w delnjoserbskej rěči wupjelnić. Tež wšitke trěbne infor­macije za to su w delnjoserbšćinje zjimali.

Turizm putnikowanja přiběra

Budyšin (CS/SN). Organizatorojo staroměšćanskeho festiwala w Budyšinje, kotryž přewjedu wot 29. do 31. awgusta, su wčera na nowinarskej konferency w Rörscheidtowej bašće lětuši program předstajili. Festiwal, kotryž korjeni w festiwalu Stareje wodarnje, steji lětsa pod hesłom „Woda, wuměłstwo, swěca“. Mnohe twarjenja stareho města na festiwalnym ­kóncu tydźenja wuměłsce wobswětluja. Předsyda Budyskeho turistiskeho towarstwa Dietmar Stange wuzběhny, zo ma swjedźeń, kotryž mjeztym hižo sedmy raz swjeća, předewšěm zhromadnosć mjez Budyšanami přisporjeć.

Něhdźe 450 čestnohamtsce sobuskutkowacych, kotřiž dohromady 120 towarstwam přisłušeja, wuhotuje lětuši wobšěrny program. Přećeljo hudźby změja na swjedźenju runje tak swoje wjeselo, kaž mali wopytowarjo. Zajimawy poskitk za dźěći je bjezdwěla „Swjedźeń klanko­dźiwadła“, kotryž budźe w starym měsće Pod hrodom 48. W Lawskej galeriji na Nutřkownej lawskej móža dźěći molować a rysować. Najlěpše wobrazy chcedźa organizatorojo potom w nutřkoměšćanskich wukładnych woknach wustajić.

Budyšin. Pod hesłom „Ein Dom – Fünf Orgeln“ prezentuje cyrkwinskohudźbny direktor Michael Vetter jutře, srjedu, wubrane twórby mjez druhim Girolama Frescobaldija, Johanna Sebastiana Bacha, Jehana Alaina a Franza Liszta w Budyskej cyrkwi swj. Pětra. Wosebitosć koncerta je, zo zahraje Vetter na wšitkich pišćelach Božeho domu – dohromady je jich mjeztym pjeć. Rozdźělne zwukowe kajkosće spřistupnja organist z pomocu wariacijow na samsny tema. Zarjadowanje wotměje so we wobłuku ­Budyskeho pišćeloweho lěća a započnje so w 19.30 hodź. Zastup je darmotny, zarjadowacy Cyrkwinskohudźbny skutk Budyšin pak šćedriwe dary njewotpo­kazuje. Přichodnu srjedu je James Short z Dublina z hosćom rjadu, prjedy hač jón Michael ­Vetter po zwučenym wašnju němy film live přewodźejo pjatk, 29. awgusta, zakónči.

Předstaji zwukowe dokumenty