Krótkopowěsće (16.12.25)
Manufaktura hižo njeprodukuje
Drježdźany. Po 24 lětach su dźensa w škleńčanej manufakturje VW produkciju awtow zakónčili. Elektroawto modela ID.3 GTX bě poslednje ze 166 000 na kromje wulkeje zahrody w sakskej stolicy zhotowjenych wozydłow. Stejnišćo wostanje centrum za dodawanje awtow. W přichodźe chce so Drježdźanska Techniska uniwersita tu w kooperaciji z koncernom VW wo inowaciju starać.
Zaso „módry jazyk“ zwěsćili
Mišno. We wokrjesu Mišno su pola howjada tak mjenowanu chorosć módreho jazyka zwěsćili. To je wčera sakska ministerka za socialne, strowotu a towaršnostnu zhromadnosć Petra Köpping (SPD) zdźěliła. We wobkruhu 150 kilometrow płaća wobmjezowanja při wikowanju. Ministerka poruča, skót dokładnje wobkedźbować. Najlěpši škit je šćěpjenje, wone pak ma so na serotyp 8 měrić.
Přezmjezne dźěło počesćene
Čita z knihi Preußlera
Drježdźany. Serbja w Drježdźanach a dalši zajimcy su na dohodowne čitanje w sakskej stolicy přeprošeni. Srjedu, 17. decembra, čita Lubina Hajduk-Veljkovičowa z knihi Otfrieda Preußlera „Krabat a čorny mišter“, a to popołdnju wot 14.45 hodź. do 16.15 hodź na Wienskej dróze 48, rumnosć 003 w přizemju. Zajimcy su wutrobnje witani. Zwjazk serbskich wuměłcow čitanje podpěruje.
Porěča wo Žitnych wikach
Budyšin. Přichodne posedźenje Budyskeje měšćanskeje rady wotměje so srjedu, 17. decembra, w 16 hodź. w sukelnicy na Nutřkownej Lawskej. Mjez druhim póńdźe wo namjet frakcije Swobodnych wolerjow „Přichod za Budyšin“ wo nowym wuhotowanju Žitnych wikow a wo nowych wrotach při Bohatej wěži.
Poradźena premjera na nawsy
Adwentne kuzło w Radworju syły ludźi přiwabiło
Radwor (SN/BŠe). Dypkownje w třoch je so wčera kulturny program we wobłuku prěnjeho Adwentneho kuzła na Radworskej nawsy zahajił. Składnosć wužištej wjesnjanostka gmejny Madeleine Rynčowa a hłowna organizatorka zarjadowanja Raphaela Wićazowa za to, so wšitkim wobdźělenym iniciatiwam, towarstwam a swójbam za jich angažement dźakować. „Tu pokazamy dźensa, kak pisana naša gmejna je. Wona je dwurěčna, kulinariska, kreatiwna a kulturelna“, Raphaela Wićazowa wuzběhny. Na jewišću, kotrež su wjesnjenjo dźeń do toho we wobłuku akcije „Pyšny adwent“ Serbskeho rozhłosa rjenje wupyšili, wustupichu předšulske dźěći pěstowarnjow. Jich wšak bě jenož mała horstka, dokelž běchu mnohe chore. Publikum je sobu spěwajo mócnje podpěraše.
Wupyšene jězdźidła ludźi zwjeselili
Popołdnjo zhromadnosće dožiwili
Minjeny štwórtk wotměchu so na ležownosći Worklečanskeje pěstowarnje „K wódnemu mužej“ znowa małe, luboznje wupyšene adwentne wiki. Druhi raz běštej angažowana staršiska rada a team kubłarkow na wosebity swjedźeń přeprosyłoj. Cyłe kubłanišćo bě rjenje wupyšene. Kubłarki a kubłarjo, starši a staršiska rada běchu za to wjacore tydźenje paslili, dekoraciju přihotowali a planowali. Wuslědk běchu harmoniske wiki, kotrež wuprudźachu ćopłotu a zhromadnosć.
Wosebje wabješe wulki bifej, za kotryž běchu starši a pěstowarske skupiny tykanc, poprjancy, přikuski, horce wino a dźěćacy punš přihotowali. Na stejnišćach poskićachu swěčki, wudebjene škleńcy, hodowne kule, pječwo a druhe maličkosće.
Ideju prěni raz zwoprawdźili
Budyšin (CS/SN). Štož je na Hłownym torhošću w Budyšinje wulka jědla, to su na Póstowym naměsće lipy. Tež wone su w adwenće z Ochranowskimi hwězdami debjene. Minjeny kónc tydźenja pak bě cyłe Póstowe naměsto wupyšene. Budyske adwentne wiki darow mějachu premjeru. Wo tutej mysličce su zarjadowarjo hižo dlěje rozmyslowali. Nětko su ju zwoprawdźili, dokelž je wjele wobdźělnikow za jedyn postronk ćahnyło. Předewšěm běchu to turistiske towarstwo, nutřkoměšćanski management a Serbska kulturna informacija (SKI). Tež dalši wikowarjo z wokolnych hasow su k poradźenju přinošowali.
Sta ludźi poradźeny Adwentny spektakulum dožiwili
Dwacety raz su Kamjenčenjo lětsa, w lěće 800. róčnicy prěnjeho naspomnjenja města, swój Adwentny spektakulum woswjećili. Po tradiciji wuhotuja jón stajnje třećeho adwenta.
Kamjenc (BG/SN). Sta ludźi běchu minjeny kónc tydźenja w Kamjenskim nutřkownym měsće po puću, zo bychu tam kóždolětny adwentny spektakl ze srjedźowěkowskim flairom dožiwili.
Loni běše Roland Dantz hišće jako wyši měšćanosta 3,50 metrow dołhi wosušk nakrał. Wón je so njedawno na wuměnk podał a nětko jako wopytowar přihladowaše, kak jeho naslědnik, wyši měšćanosta Michael Preuß (njestronjan), na jewišću swjatočnje wosušk nakraje. Mjez přihladowarjemi běše tež čestny rumpodich Karli Mildner, kotryž hižo dlěje hač 15 lět jako wyši rumpodich na Kamjenskim Adwentnym spektakulumje słužbu wukonja.
Krótkopowěsće (15.12.25)
Poskitk derje přiwzali
Drježdźany. Něhdźe 25 serbskich dźěći bě so sobotu na poskitku towarstwa Stup dale wobdźěliło a pod nawodom Susan Budarjec w sakskej stolicy zhromadnje poprjančki pjekło. Wo tym towarstwo informuje. Po pječenju sej dźěći mjez sobu dariki wuměnichu a sej zhromadnje zaspěwachu.
Z ćahom direktnje do Pólskeje
Lipsk/ Wojerecy. Němska železnica ma nowy jězbny plan. Wot wčerawšeho płaća wjacore změny. Tak wobsteji wotnětka na přikład direktny zwisk z Lipska do Wrócławja a Krakówa. Po puću ćah pólskeje železnicy PKP tež we Wojerecach zastanje. Tónle zwisk poskićuja dwójce wob dźeń. Jězba z Wrócławja do Wojerec traje połdra hodźiny, z Krakówa do Wojerec pjeć a poł hodźiny. Do Lipska jědźe ćah połdra hodźiny dlěje.
Tumulty do parady hórnistwa
Swójbam přichilena politika wažna
Wotrow (SN). Swoju turu po pěstowarnjach je zapósłanča Sakskeho krajneho sejma Elaine Jenčec (CDU) štwórtk w swojim wólbnym wokrjesu pokročowała. Po tym zo bě hižo sydom pěstowarnjow a hortow wopytała, steještej tónraz serbskej pěstowarni w srjedźišću, mjenujcy kubłanišći we Wotrowje a w Njebjelčicach. Wobstajna wuměna z personalom na městnje je zapósłanči wosebje wažna, dokelž zmóžnja jej bjezposrědny dohlad do praksy.
W rozmołwach z wjednistwom domow, nošerjomaj (Serbske šulske towarstwo a Křesćansko-socialny kubłanski skutk) kaž tež zastupjerkami a zastupjerjemi komuny a staršich dźěše wo centralne temy kaž aktualne ličby dźěći w pěstowarnjach, wuznam serbskeje rěče, zachowanje rěčnych rumow, koncept pěstowarnjow a jich orientacija na cyrkwinskim lěće. Zarjadnišći matej jasne znamjo jónkrótnosće, kotrež region charakterizuje a zesylnja. We wobłuku wopyta přepoda Elaine Jenčec dźěćom zdobom mału překwapjenku.
Změja serbskeho stawnika
Město Kulow wostanje samostatny stawniski wobwod
Kulow (AK/SN). Wšitke stawniske naležnosće Kulowa a městu přisłušacych wsow maja so dale w Kulowskej radnicy rjadować. Město wostanje samostatny stawniski wobwod. Jednotliwe nadawki w tymle wobłuku zarjadnistwa mataj w přichodźe dwaj sobudźěłaćerjej spjelnjeć. Tole praji měšćanosta Markus Posch (CDU) srjedu na posedźenju měšćanskeje rady. Radźićeljo jednohłósnje wobzamknychu, Bjarnata Domašku z Kulowa wot 1. januara 2026 za stawnika města Kulowa powołać. Tuchwilu dźěła z Wotrowa pochadźacy Serb we wotrjedźe za porjad.
Dźěło stawnicy wukonjatej w Kulowje aktualnje Irene Noack a Peggy Ebert-Zschorlich. Jeju nadawki su mnohostronske. Paleta saha wot wěrowanjow hač k wjedźenju knihow, do kotrychž zapisuja porody, wěrowanja a zemrětych. „Minjene lěta mějachmy stajnje něhdźe 35 wěrowanjow“, měšćanosta podšmórny.
