Radźićeljo wuradźuja
Malešecy. Přichodne posedźenje Malešanskeje gmejnskeje rady wotměje so jutře, wutoru, w 19 hodź. w Malešanskim wjesnym towarstwowym domje. Na dnjowym porjedźe steji rozsud wo twarskich dźěłach za ponowjenje mosta w Barće kaž tež za přetwar busowych zastanišćow. Dale zaběraja so radźićeljo z móžnosćemi wěrowanja w Lichańskim hrodźe.
Štó chce šić nawuknyć?
Pančicy-Kukow. Kurs šića za započatkarjow wotměje so srjedu, 25. měrca, wot 18 do 20 hodź w klóštrje Marijina hwězda w Pančicach-Kukowje. Wobdźělnicy nawuknu zakłady šića a móža sej na kóncu prěni samozešity dźěl drasty abo druhi wudźěłk sobu domoj wzać. Mały wuběr płatow steji k dispoziciji, tohorunja šijawa. Štóž sam šijawu ma, móže ju sobu přinjesć. Wobdźělenje płaći 45 eurow. Zajimcy njech přizjewja so pod .
Policija (23.03.26)
W bydlenju so sušak palił
Budyšin. Wohnjowych wobornikow su sobotu wječor na Jerjowu w Budyšinje wołali. Tam bě so něhdźe w 20.30 hodź. w bydlenju sušak šatow zapalił. Po informacijach policije jednaše so wo techniski defekt. 48lětna wobydlerka woheń najprjedy sama podusy. Po tym z dźěsćomaj w starobje 12 a 14 lět kaž tež z nopawomaj bydlenje wopušći. Wohnjowi wobornicy zbytki wohenja zhašachu a dalšu nopawu z bydlenja wuchowachu. W chorowni bu swójba lěkarsce zastarana. Na zbožo hodźi so bydlenje dale wužiwać. Škoda wučinja něhdźe tysac eurow.
Jutrowne wiki znowa wabili
Wšitke tradicionalne techniki debjenja jejkow w Slepom předstajili
Slepo (JoS/SN). Hižo prjedy hač buchu jutrowne wiki w Slepom sobotu dopołdnja oficialnje zahajene, wopytowarjo do tamnišeho Serbskeho kulturneho centruma (SKC) přichadźachu. Debjerjo jejkow ani hišće swoje stejnišća natwarjene njemějachu. Po skónčenju wikow zličichu wčera cyłkownje 4 100 hosći. Z tym běchu Slepjanske jutrowne wiki znowa wopytowarski magnet.
Najpowabniša bě žurla SKC, hdźež wjace hač 30 debjerjow swoje filigrane wuměłstwo prezentowaše. Jim njemóžachu wopytowarjow jenož při dźěle přihladować, ale sej pola nich tež někotrežkuli debjenu žadnostku kupić. Dokelž běchu wšitke tradicionalne techniki debjenja serbskich jutrownych jejkow zastupjene, njebě scyła lochko, prawe jejko za sebje namakać. K zazběhej wustupichu sobotu dźěći Trjebinskeje pěstowarnje „Lutki“. Na woběmaj dnjomaj slědowachu dalše kulturne poskićenja, mjez druhim Slepjanskeho folklorneho ansambla.
Lajskich wuměłcow nawjedowała
Budyšin. Helga Graupner jako tekstilna wuměłča NDR a nawodnica tekstilnych kružkow tež we Łužicy bě tema „Kofeja w třoch“ minjenu srjedu w Serbskim muzeju. Něhdźe 20 zajimcow sćěhowaše wuwjedźenjam dr. Dagmar NeulandKitzerow a ludoweje wuměłče Petry Helbig z Berlina, kotrejž stej wo njej knihu wudałoj.
Wonej předstajištej žonu, kiž je tež w Serbach tójšto wuskutkowała, byrnjež dźensa hižo znata njebyła. Ludowědnikaj dr. Lotar Balko a Albrecht Langa staj jako ludowaj wuměłcaj slědźenje wo serbskej drasće nawjedowałoj. Zwisk mjez nimaj a wuběrnej tekstilnej fachowču nasta přez prof. Pawoła Neda. Wón w Lipsku slědźerski wotdźěl Centralneho domu za lajske wuměłstwo nawjedowaše. Helga Graupner publikowaše wo temje „Wušiwanki na serbskich narodnych drastach“ a poda w časopisu „Chorhoj měra“ pokiwy k ručnym dźěłam. Na žurli Serbskeho muzeja běchu štyri wulke skupinske dźěła wustajene, kiž su pod jeje nawodom nastali.
Swójby ze serbskich katolskich wosadow su wčera do Róžanta ...
Krótkopowěsće (23.03.26)
Dalšu dźěłarničku přewjedłoj
Budyšin. Mjeztym wosmy raz běštaj Lubina a Dušan Hajduk-Veljković na literarnu dźěłarničku prosyłoj, kotraž přewjedźe so minjenu sobotu w nošerstwje Załožby za serbski lud w Budyskim Serbskim domje. Tři wobdźělniče dźěłarnički zaběrachu so z dlěšej prozu resp. krótkoromanom. Za to běchu w přihotach swójski tekst a ekspozej zapodali. Na zakładźe rěčneje a wobsahoweje analyzy naćiski rozjimowachu a wobdźěłachu.
CDU staji krajneho radu
Baršć. We wokrjesu Sprjewja-Nysa bu kandidat CDU Martin Heusler wčera z 51,5 procentami hłosow wolerjow za krajneho radu wuzwoleny. Kandidatka AfD Christine Beyer jemu z 48,5 procentami snadnje podleža. W prěnim kole wólbow bě kandidatka AfD najwjac hłosow dóstała
Hłownu zhromadźiznu wotměli
Policija (20.03.26)
15lětna znjezbožiła
Łupoj. Wobchadne njezbožo je so srjedu we Łupoji w Radworskej gmejnje stało. 15lětna bě tam ze swojim mopedom do směra na Łomsk po puću. W lěwej křiwicy přijědźe młodostnej běłe wosobowe awto napřećo. Po wšěm zdaću jězdźidło dosć daloko na swojim boku njejědźeše, tak zo dyrbješe so mopedistka wuwinyć, zo by zražce zadźěwała. Při tym zajědźe na kromu dróhi, padny a so zrani. Běłe awto pak so wotsali.
Nócny měr mylił
Budyšin. W nocy na štwórtk je 67lětny na Budyskej Müntzerowej nócny měr susodow mylił. Wokoło połnocy wón wótře hudźbu hraješe. Jako policija přijědźe, so wón spjećowaše hudźbu mjelčo stajić a so zastojnikam wobaraše. Woni muža nachwilnje sputachu. Jako bě so wón změrował, jemu puta zaso wotewzachu, a susodźa móžachu dale spać.
Nowy plan za Łužisku halu
Energetiske saněrowanje wot lěta 2027 do 2030 předwidźane
Wojerecy (AK/SN). Wot klětušeho hač do lěta 2030 chcedźa we Wojerecach Łužisku halu energetisce wobšěrnje saněrować. Najwšelakoriše zarjadowanja maja w tym času přiwšěm dale móžne być. Kaž zamołwity projektowy manager měšćanskich hospodarskich zawodow (SWH) Roman Frost praji, chcedźa lětsa wšitko planować. Twarske dźěła zahaja w prěnim kwartalu 2027. Wone nimaja wjace hač 20 milionow eurow płaćić. 18 milionow eurow dóstanu z hornca za strukturnu změnu spěchowane, dwaj milionaj eurow přida SWH jako swójski podźěl. Zaměr je wob lěto štwórćinu wudawkow za milinu a tepjenje zalutować, zdźěli jednaćel Łužiskeje hale Dirk Rolka. Cyłkowny projekt a kak chcedźa jón zwoprawdźić, su srjedu nowinarjam předstajili.
Swójby so zetkaja
Radwor. Pod hesłom „Zhromadnosć, wuměna, zrozumjenje a podpěra“ wotměje so sobotu, 21. měrca, wot 15 do 17 hodź. na Radworskim dwórnišću zetkanje za swójby z dźěćimi, kotrež su zbrašene abo chronisce chore. Při kofeju a tykancu budźe chwile za měrne rozmołwy. Dźěći budu sej hrajkać a paslić móc. Zajimcy njech přizjewja so e-mailnje pod .
Debja jutrowne jejka
Slepo. Wjace hač 30 debjerjow jutrownych jejkow wobdźěli so sobotu a njedźelu na jutrownych wikach w Slepjanskim Serbskim kulturnym centrumje. Wo kulturne wobrubjenje staraja so dźěći Trjebinskeje pěstowarnje, Grodkowscy dujerscy muzikanća a Slepjanski folklorny ansambl. Přistupna budźe tohorunja wosebita wustajeńca Njeswačanskeje debjerki jejkow Sylviny Schilling.
Rěčna hodźina zapósłanče
