Pančicy-Kukow (SN/MWj). Gmejnska rada Pančic-Kukowa je na swojim posedźenju minjeny tydźeń lětuši hospodarski plan gmejny wobzamknyła. Dokelž dóstanu lětsa přidatne dochody z přemysłoweho dawka, móžachu swój plan wurunać. Wón předwidźi dochody a wudawki we wobjimje 4,7 milionow eurow.

Cyłkowna suma drje je dosć nahladna. Wona pak wopřijima tójšto pozicijow za běžne wudawki, kotrež so w žanych inwesticijach njejewja, kaž wjesnjanosta Markus Kreuz (CDU) rozłoži. Wokrjesny wotedawk Pančičanskeje gmejny je 900 000 eurow wysoki a zarjadniskemu zwjazkej Při Klóšterskej wodźe płaći gmejna 495 000 eurow za jeho nadawki. 260 000 eurow wudadźa za personal gmejny, 50 000 eurow za wudźeržowanje gmejnskich twarjenjow, 80 000 eurow za tepjenje „Šule Ćišinskeho“, 35 000 eurow za ćěriwo, kotrež trjeba twarski dwór, a 40 000 eurow za nadróžne wobswětlenje. Za gmejnski podźěl pěstowarnje w Pančicach-Kukowje nałožuja 515 000 eurow, za pěstowarnju we Wotrowje je to 168 000 eurow.

Jubilejny bal narodneje drasty w Ćisku wulki wothłós žnjał

Ćisk (JT/SN). Kóždej dwě lěće organizuje Ćišćanska serbska rejwanska skupina pod hesłom „Rejwanje zwjazuje“ bal narodneje drasty. Minjenu sobotu bě to mjeztym hižo jubilejny 10. drastowy bal.

Po tym zo běchu pory tradicionalnje do žurle zaćahnyli a zhromadnje polonezu zerejwali, dopominaše Gabriela Linakowa w swojej narěči serbsce a němsce na prěni drastowy bal w lěće 2006. Jenož mało hosći z Ćiska a wokoliny bě jón te­hdy wopytało. Slědowace lěta je ličba ­hosći runje tak stupała kaž ta wobdźě­lenych towarstwow. Mjeztym je bal wob­lubowany podawk za wšitkich lubowarjow narodneje drasty a za fanow dujerskeje hudźby. Bjez přizjewjenja je lědma swobodnych městnow.

Mjez mnohimi čestnymi hosćimi bě lětsa znowa Wojerowski měšćanosta Měrko Pink z mandźelskej Mariju. Gabriela Linakowa so wosebje wjeseleše, zo běchu wšitke regiony serbskeje narod­neje drasty Hornjeje a Delnjeje Łužicy ­zastupjene. „Narodna drasta je wažne kulturne herbstwo, dokelž wotbłyšćuje wona dźěl toho, dokal čłowjek słuša“, ­wona rjekny.

Šulerjo pola AfD w Berlinje

Wóslink. Na přeprošenje direktnje woleneho łužiskeho zapósłanca AfD w zwjazkowym sejmje, Karstena Hilse, su šulerjo 9. lětnika Wóslinčanskeje ewangelskeje šule dwaj dnjej w Berlinje pobyli. Wo tym je Hilse na Facebooku foto zhromadnje z předsydku AfD Alice Weidel wozjewił, na kotrymž su mjezwoča šulerjow njespóznajomne sčinili. Šula njeje na naprašowanje Sakskich Nowin wotmołwiła.

Serbja we wustawkach

Budyšin. Nowy turistiski zwjazk Hornja Łužica je minjeny pjatk sobustawsku zhromadźiznu wotměł, na kotrejž su wustawki zwjazka změnili. Zaměr zwjazka bu wo sćěhowacy pasus rozšěrjeny: „Zwjazk wobkedźbuje kulturnu a rěčnu mnohotnosć regiona, wosebje naležnosće serbskeho ludu, a spěchuje dwurěčnosć w zmysle Sakskeho serbskeho zakonja.“ Z tym wotpowěduje zwjazk próstwje Domowiny.

Počesća Joy Adamson

Worklecy (SN/jp). Na próstwu wjesneho towarstwa su so zašłu sobotu młodostni a wobydlerjo Worklec kaž tež čłonojo towarstwa samoho na Worklečanskej kupje zetkali a ležownosć za lětušu sezonu přihotowali. Hłowny zaměr bě nalětnje rjedźenje, zo by kupa za stajenje a mjetanje meje přihotowana była.

Za tutej wjerškaj změja lětsa mału ­nowosć, kotraž ma wjesnjanam dźěło wolóžić. Prěni raz njetrjebaja młodostni na kupje hižo dźěru za meju wuryć. Zhromadnje z gmejnskim zwjazkom CDU je wjesne towarstwo za to nowy ­stejak sponsorowało, kotryž je młodźina zaše tydźenje natwariła. Sobotnišu dźěłowu akciju za to wužiwachu, zo bychu meju za stajenje 30. apryla přihotowali. Do zdónka meje točachu dźěru a přičinichu železny šrub. Stejak běchu hižo w zašłosći wužiwali, jako steješe při prjedawšim małym wobchodźe wosrjedź wsy. Přetwara dla pak běchu stejak wottwarili. Minjene štyri lěta su na kupje dźěru za meju wuryli.