Lětuši rjad přednoškow zakónčili
Pod hesłom „Z Kamjenskich měšćanskich knihow a kelko Budyšina w nich tči“ je Budyski archiwowy zwjazk swój lětuši rjad přednoškow zakónčił. Referent bě z Lessingoweho města pochadźacy historikar Max Grund, kotryž tuchwilu na uniwersiće w Jenje promowěruje.
Krótkopowěsće (08.12.25)
Bobry smědźa we Łužicy wostać
Drježdźany. Drježdźanske zarjadniske sudnistwo je minjeny pjatk rozsudźiło, zo smětej dwě swójbje bobrow we Łužicy wostać. Zwěrjata njesmědźa so přesydlić abo zatřělić. Přirodoškitny zwjazk Zelena liga Sakska je sudnistwo w chwatnej próstwje prosył, zo wosebitu dowolnosć za přesydlenje bobrow do Francoskeje cofnje. Hatar z Chrjebje bě tule dowolnosć dóstał.
Rěča wo etaće 2027/2028
Smochćicy. Sakski financny minister Christian Piwarz (CDU) liči za dwójny etat 2027/2028 z ćežkimi jednanjemi. Wudawki su wo wjele wyše hač dochody. „W tutej situaciji su strukturelne a bolostne zasadne rozsudy trěbne“, rjekny wón dźensa do zahajenja dwudnjowskeje klawsury wo etaće w Smochćicach. Po tuchwilnym planje pobrachujetej w nowym dwójnym etaće hač do 4,2 miliardźe eurow, zo móhli wšitke wudawki w samsnym wobjimje kaž dotal dale njesć.
Stawizny z Jizerskich horow
Wobornikam wjace pjenjez
Čestnohamtske dźěło chcedźa lěpje zarunać
Worklecy (SN/MWj). Dobrowólni wohnjowi wobornicy w městach a gmejnach su wodnjo a w nocy přihotowani, druhim ludźom pomhać. Štóž ma při tym wodźace funkcije, ma prawo na pjenježne zarunanje. Wysokosć tutoho je we wotpowědnych wustawkach komunow zapisana. Hdys a hdys dyrbja so tele wustawki přiměrić. Tole su nětko we Worklečanskej gmejnje činili.
Adwentne wiki přeprošuja
Rakecy. Ze zwonjenjom zwonow Rakečanskeje cyrkwje chcedźa jutře w 14 hodź. tamniše adwentne wiki na wjesnym swjedźenišću zahajić. Wo kulturne poskitki postaraja so w běhu popołdnja pozawnowy chór, pěstowarske dźěći a chór žonow. W 16 hodź. wočakuja rumpodicha. Wot 18 hodź. su zajimcy na party do pincy přeprošeni. Přistupna budźe wustajeńca stawizniskeho towarstwa.
Kulow. Hižo w 13 hodź. započnu so jutře adwentne wiki w Kulowje. Tež tam wuhotuja wjacore cyłki kulturny program, mjez druhim chór hudźbneje šule z partnerskeho města Tanvald. W 14 hodź. zjawnje zdźěla, kotry nadawk ma měšćanosta lětsa spjelnić. Hač je to zdokonjał, zhonja zajimcy we 18.30 hodź. W Jakubecowym wustawje wustajeja drohoćinki z Kulowskeho farskeho archiwa.
Bart. Bartske dohodowne wiki wotměja so njedźelu wot 10 hodź. na torhošću. W 14 hodź. nakraje wjesnjanosta wosušk. Po tym přichwata rumpodich. Na předań poskića mjez druhim madźarske wino, adwentnu dekoraciju a speciality dźiwizny.
Jubilej zakónča w hospodźe
Adwentnička bě wčera lětuše poslednje zarjadowanje Domowinskeje ...
Kalender je tež wučbny material
Krótkopowěsće (05.12.25)
Generacija Němska tež w Sakskej
Budyšin. W Sakskej ma so w prěnich měsacach 2026 krajny zwjazk organizacije Generacija Němska załožić. To je Budyski měšćanski radźićel Lennard Scharpe na naprašowanje wobkrućił. Wón bu minjeny kónc tydźenja w Gießenje na załoženskej zhromadźiznje młodźinskeje organizacije AfD Generacija Němska jako społnomócnjeny za financy wuzwoleny.
Proces wusadźeny
Choćebuz. Proces přećiwo 42lětnemu klimowemu aktiwistej před Choćebuskim zarjadniskim sudnistwom bu wčera wusadźeny, dokelž bě jeho prawiznica schorjeła. Při zahajenju procesa pak je přiwšěm 20 aktiwistow před sudnistwom protestowało. 42lětny je wobskorženy, dokelž je so z dalšimi akterami před třomi lětami na ležownosć Janšojskeje brunicoweje milinarnje zadobył a připrawy blokował.
Klóšter nima srědk pře diabetes
Kak klinča hody?
Župa „Michał Hórnik“ do krajneje stolicy sej wulećała
Chrósćicy. 40 čłonow župy „Michał Hórnik“ wobdźěli so minjenu sobotu na wotměnjawej kubłanskej jězbje do Drježdźan. Dopołdnja wopytachu studijo MDR, hdźež Bogna Korjeńkowa a Roman Nuk hosći po studiju rozhłosa a telewizije wodźeštaj. Wobdźělnicy zhonichu něštožkuli zajimaweho wo produkciskich wotběhach, redakcionalnym dźěle a medijowych poskitkach sćelaka.
Po wobjedźe pokročowaše skupina ze swojim programom w Drježdźanskim Nowym měsće. Tam wobhladachu sej rumnosće serbskeje dnjoweje maćerje. Předsyda towarstwa Stup dale Krystof Cyž informowaše nadrobnje wo pedagogiskim dźěle kaž tež wo wuznamje towarstwa za serbske swójby w sakskej stolicy.
Wuklinčeć dachu dźeń dundajo po adwentnych wikach na Hłownej dróze, doniž so zaso na dompuć do Chrósćic njepodachu. Kathrin Młynkowa
Wustajeja fota wo drasće
Bukecy. Składnostnje adwentnych wikow w Bukecach wotewru pjatk, 5. decembra, w 17.30 hodź. w Bukečanskim gmejnskim zarjadnistwje na Karla Marxowej čo. 16-17 fotowu wustajeńcu wo drasće ewangelskich Serbow Budyskeho kraja. Za to je so fotograf Tilo Aé z Brandisa dwójce z Bukečanskej drastowej skupinu na fotoshooting zetkał. Wustajeńca budźe poł lěta w gmejnskim zarjadnistwje widźeć.
Do dźiwadła na kofej a tykanc
Sulšecy. Němsko-Serbske ludowe dźiwadło předstaji njedźelu, 7. decembra, aktualnu inscenaciju „Won do swěta“ w Sulšečanskim Kulturnym domje. Hra tematizuje stawizny serbskich wupućowarjow, kotřiž su w Americe, Africe abo Awstralskej za nowej domiznu pytali. Předstajenje započnje so w 17 hodź., zastup płaći 15 resp. potuńšeny 9 eurow. Hižo wot 15 hodź. poskićuja za přidatny popłatk adwentny kofej a tykanc. Zajimcy njech skazaja sej swačinu hač do jutřišeho pjatka pak telefonisce pod čo. 03591 584225, pak z mailku na .
Dujerska hudźba zaklinči
