W Njeswačidle čuja so wot zjawneho bliskowobchada zanjechani

Njeswačidło (JK/SN). Jako čłonojo Njeswačanskeje gmejnskeje rady na swojim minjenym posedźenju wo dalšim na­dróžnym wobswětlenju a wobswětlenju markantnych zjawnych twarjenjow wuradźowachu, wujewi so dalši chutny problem gmejny. Před dlěšim časom bě Budyski wokrjes znowa rjadował busowe čary. Wulki dźěl z nich je dotal bjezporočny, ale su tež čary, kotrež swój woprawdźity zaměr njespjelnjeja. Wosebje bolostnje začuwaja to w Njeswačanskej gmejnje, w Njeswačidle samym kaž tež wosebje w Šešowje. Jenož někotre busy přez wobě wsy jězdźa. Chcedźa-li z hinašim busom jěć, dyrbja wobydlerjo pěši hač k zwjazkowej dróze B 96 k tamnišim zastanišćam hić. Zwjetša je to rano zahe abo nawječor. Puće hač k B 96 pak njejsu hustodosć ani wobswětlene, a hdyž potom jenož wobmjezowany čas.

Wojerecy (SiR/SN). Po měsće dundać, hwězdy ličić a dobyć – pod tymle hesłom přeprošuje marketingowe towarstwo Wojerowski region swójbow na wosebitu akciju, kotruž hišće hač do kónca lěta pod mjenom „#WHY!NACHT“ přewjedu. Z kampanju chcedźa domjacym wikowarjam a přemysłownikam wjace kedźbnosće wěnować a wobydlerjow kaž tež wopytowarjow na nich skedźbnjeć. Za to wobstarachu zelene Ochranowske hwězdy, kotrež nětko w mnohich wukładnych woknach wisaja, rozłoži sobudźěłaćerka marketingoweho towarstwa Anja Hillmann.

Štóž chce so na dobyćerskej akciji wobdźělić, móže so hač do 31. decembra w starym a nowym měsće na puć podać a wšitke zelene hwězdy we wukładnych woknach zličić. We wšitkich wobdźělenych wobchodach maja wosebite karty, kotrež dyrbiš wupjelnić a na nich prawu ličbu zelenych hwězdow nakřižować. „Wobdźělene předewzaća spóznaja wobydlerjo a wopytowarjo na nalěpku z hesłom „#WHY!NACHT““, praji hospodarski spěchowar města Robert Böhme.

Město Wojerecy chce dalši projekt we wobłuku změny strukturow zwoprawdźić. W nowym měsće inwestuja ně­hdźe dźewjeć milionow eurow do kulturneho domu OSSI.

Wojerecy (AK/SN). Dźěćacy a młodźinski kulturny dom OSSI we Wojerecach ma so z forumom za wšitke generacije stać a mjeno „Nikolai Ostrowski“ nosyć. Za njón je měšćanska rada wčera koncept wužiwanja a wobhospodarjenja wobzamknyła. Nimo toho přepodachu Wojerowskemu inženjerskemu běrowej nadawk za dalše planowanje. Projekt ma něhdźe dźewjeć milionow eurow płaćić. Z toho dóstanu wjace hač wosom milionow eurow spěchowanja z hornca za změnu strukturow. Město same ma 770 000 eurow financować.

Nimo Regionalneho běrowa za kubłanje, demokratiju a žiwjenske perspektiwy (RAA) a rejowanskeje šule Hartwig, kotrejž twarjenje nětko hižo wužiwatej, budźe Astrocentrum Łužica (DZA) nowy partner. Wón chce planetarij a slědźerski centrum zaměstnić. DZA płaći wob lěto 20 000 eurow podruže a chce nimo toho projekty we wobjimje 15 000 eurow wob lěto podpěrować.