Dźesać porow młodźiny a wosom porow dźěći je njedźelu při ...
Krótkopowěsće (11.05.26)
Jednaćelka wuznamjenjena
Podstupim. Hižo štwórć lětstotka počesćuje Braniborska wusahowacy angažement za žiwu europsku mysl z Europskim wopismom. Mjez lětušimi 14 wuznamjenjenymi, kotrymž su dokument 8. meje přepodali, je jednaćelka Łužiskeho festiwala Maria Schulz. Ju wuznamjenichu za jeje kulturne dźěło, kiž zwjazuje, hranicy přewinje a regionej widźomnosć jako europski rum zetkawanja spožča.
Přistajeni protestowali
Čorna Pumpa. Přistajeni energijoweho koncerna LEAG su minjeny pjatk w Čornej Pumpje přećiwo planam zwjazkoweho hospodarskeho ministerstwa protestowali. Woni měnja, zo je wupisanje nowych płunowych milinarnjow njesprawne, dokelž jeničce zapadne kraje z toho profituja. Dotal je njewěste, hač smě LEAG w Čornej Pumpje nowu płunowu milinarnju natwarić.
Rěče mjeńšinow škitać
Ekonom so do debatow měša
Budyšin. Njedźela bjez awta, limit spěšnosće abo statne zasahnjenje do wikow – lědma druhi ekonom so tak zrozumliwje do aktualnych towaršnostnopolitiskich debatow měša kaž Marcel Fratzscher. Dźensa wječor w 19 hodź. porěči wón pod titlom „Technologija, globalizacija a polarizacija – kónc demokratije?“ we wobłuku Budyskich narěčow w Budyskej tachantskej cyrkwi.
Na swjedźeń do muzeja
Wojerecy. We Wojerowskim měšćanskim muzeju swjeća njedźelu wot 14 do 18 hodź. Dźeń maćerje. Wo dobru naladu stara so wokalna skupina Kontrapunkt kaž tež Wojerowske karnewalowe towarstwo.
Tango Sensations w muzeju
Budyšin. Sobotu, 9. meje, prezentujetaj Lysandre Donoso (bandoneon) a Friedemann Wuttke (klasiska gitara) w 19.30 hodź. w Budyskim Serbskim muzeju program „Tango Sensations“. Wonaj wěnujetaj so předewšěm twórbam komponista Astora Piazzolla, kotryž je tango do mjezynarodnych koncertnych žurlow wjedł a swójsku načasnu formu wuměłstwa stworił.
Měr jako tema koncerta
W Jaworje su wobydlerjo lětsa dźesaty króć po wozrodźenju ...
Nimale 30 družin chlěba a całtow
Na prěnich Budyskich chlěbowych wikach so Worklečanska pjekarnja wobdźěliła
Budyšin (MČ/SN). Wóń čerstweho chlěba je wutoru syły ludźi do Budyskeho wikowanišća ECE přiwabiła. 5. meje, na dnju chlěba, su pjekarscy mištrojo z regiona ze swojimi sobudźěłaćerjemi pokazali, kak bohaty poskitk tohole pječwa je. Prěni króć su so ze swójskimi wudźěłkami na centralnym wikowanišću sprjewineho města prezentowali. Tole su mnozy wopytowarjo wužili. W cyłku su předewzaća hač do 30 družin chlěba a całtow napjekli a slědnym hubam poručeli. Wiki chlěba su so lětsa prěni króć wotměli, byrnjež pruwowanje najlěpšich družin chlěba kaž tež wosuška hižo dlěje do protyki nakupowanskeho centruma na Žitnych wikach zapisane było. Iniciatiwu za prěnje chlěbowe wiki je centerowy management wuwił. Budyske pjekarske zjednoćenstwo je poskitk a šansu wužiło, rjemjesło pječenja zjawnje sylnić. Aktualnje přisłuša tudyšemu zjednoćenstwu 36 pjekarnjow, spočatk 1990tych lět bě jich hišće wjace hač 80.
Policija (08.05.26)
Statny škit přepytuje
Budyšin. W Nadźanecach na Krakečanskej dróze su zastojnicy policije srjedu popołdnju muža němskeho pochada lepili. 48lětny kolesowar pokazowaše kolesujo zakazanu gestu a je wjacore wuprajenja přećiwo wustawje formulował. Statny škit nětko pad přepytuje.
Simson pokradnyli
Kamjenc. Na Čornym puću w Kamjencu su paduši tele dny z kólnje moped marki Simson w hódnoće něhdźe 1 500 eurow pokradnyli. Wěcna škoda nastała njeje. Kriminalna policija slědźi.
Krótkopowěsće (08.05.26)
Njedźelu w Zhorjelcu wola
Zhorjelc. Wobydlerjo Zhorjelca wola zajutřišim noweho wyšeho měšćanostu. Tuchwilny wyši měšćanosta Octavian Ursu (CDU) wospjet k wólbam nastupi. Jeho najsylniši kontrahent drje je Sebastian Wippel (AfD). Na wólbnej lisćinje stejitaj dale Sabine Christian (Lěwica) a Hagen Jeschke (njestronjan). Jelizo žadyn z kandidatow njedźelu 50 procentow hłosow wolerjow njedóstanje, zarjaduja 31. meje druhi wólbny přechod..
Köpping: Měr a swobodu škitać
Drježdźany. Sakska socialna ministerka Petra Köpping (SPD) skedźbni składnostnje dźensnišeho dnja wuswobodźenja wot nacionalsocializma, zo njedopomina 8. meja jenož na wjace hač 60 milionow woporow, ale zo nam zdobom wuwědomja, zo njejsu měr, swoboda a čłowjeske prawa samozrozumliwosć. Trjebamy angažement a solidaritu kóždeho jednotliwca, zo bychmy je škitali.
Woheń w Čěskej Šwicy zhašany
Na jubilejne mejemjetanje
Pančicy-Kukow. Kino za dźěći je jutře w 17 hodź. prěni wjeršk 35. mejemjetanja w Pančicach-Kukowje. Wječor je party z DJjomaj. Sobotu w 15 hodź. je zhromadna swačina a w 16 hodź. mejemjetanje dźěći a młodostnych. Wot 20 hodź. budźetaj mejski kral a kralowna na swjedźenišću a wopytowarjow wočakuja program młodźiny a reje. Po rańšim piwku njedźelu, w 11 hodź z Chróšćanskimi muzikantami a wobjedom předstaji wohnjowa wobora zabawny program. K swačinje wustupja dźěći Šule Ćišinskeho a po tym rejwanska skupina Łužiska rapsodija. Zastup je wšitke dny darmotny.
Na 30. Božu mšu
Horni Wujězd. Boža mša składnostnje 30. jubileja Hornjowujězdźanskeje awtodróhoweje cyrkwje budźe jutře, 8. meje w 17 hodź. Kemše wobrubi policajski orchester. Ewangelsko-lutherska wosada Podroždź-Horni Wujězd přeprošuje wopytowarjo po tym na zakusk a bjesadu.
Policija bydlenja přepytała
W Małym Wjelkowje je policija wčera rano wjacore ležownosće přepytała, kisty ze sprayjom a tukom našła a jězdźidle wotwlekła. Jednu wosobu su sobu wzali. Při přepytowanju wuhladachu wjacore jězdźidła ze značkami, pochadźace z mnohich kónčin Sakskeje. Susodźa zastojnikam zdźělichu, zo su tam bydlacy ludźo často na bliskim štyristronskim statoku přebywali, z kotrehož bě wóń konopje čuć. Foto: Jens Kaczmarek
Policija (07.05.26)
Za dźěći błyskali
Budyšin. Wot 20. apryla hač do 3. meje je Zhorjelska policajska direkcija 42 kontrolow spěšnosće we wokrjesomaj Zhorjelc a Budyšin pod hesłom „Błyskać za dźěći“ přewjedła. Zastojnicy kontrolowachu dodźerženje spěšnosće před žłobikami, pěstowarnjemi a zakładnymi šulemi. Prěni tydźeń běchu jim dźěći poboku, kotrež su 278 jězdźidłow kontrolowali. 190 zelenych kartow su wone za přikładne zadźerženje wudźělili, 74 žołtych pak dóstachu přespěšnje jěducy. Druhi tydźeń akcije zastojnicy 648 šoferow kontrolowachu. 58 běchu přespěšni. Jedyn šofer je 38 kilometrow na hodźinu přespěšny był a ma nětko 260 eurow pjenježneje pokuty zapłaćić. Zdobom njesmě měsac jězdźidło wodźić a dóstanje dypkaj w Flensburgskej kartaji.
