Što waše dźěći abo wnučki sobotu nawječor a wječor činja? Su doma a změja chwile za swjaty wopyt z wukraja? Chceće něšto wosebiteho dožiwić? Tuž přizjewće a přihotujće so na wopyt čěskeho­ Mikławša, čerta a jandźela!

Tutón nastawk je poprawom ryzy wabjenje. Čěske towarstwo přećelow Serbow přihotuje lětsa prěni raz swjatomikławšowu wobradźenku w Serbach. Po našim měnjenju móže to rjane dožiwjenje za dźěći być, dokelž eksistuja wočiwidne rozdźěle mjez tym, na kotre wašnje swjaty Mikławš ludźi w Sakskej a na kotre w Čěskej wopytuje. W Sakskej přichadźa sam, w Čěskej pak ma přeco přewodnikow: čerta a jandźela (abo wjacorych čertow a jandźelow). Kóždeho dźěsća so tuta trójka wopraša, hač bě cyłe lěto pěkne (nadawk swjateho Mikławša) abo hač je staršeju hněwało (to ma čert zwěsćić). Dźěćo Mikławšej tež něšto zaspěwa abo přednjese baseń. Potom dóstanje darik wot jandźela. Serbskim dźěćom přinjesemy čěske oblatki a cokorki sobu.

Na fachowej wuměnje w Berlinje

Berlin. Sobudźěłaćerjo Serbskeje centralneje biblioteki a Serbskeho kulturneho archiwa při Serbskim instituće su tele dny archiw a biblioteku Berlinskeho Židowskeho muzeja wopytali. Zajimowachu so za zběrki, projekty digitalizacije a nazhonjenja z přećahom muzeja před dźesać lětami. Serbska centralna biblioteka a Serbski kulturny archiw matej na Lawski areal přećahnyć, ručež budźe natwarjeny.

Prawicarjo klub nadpadnyli

Choćebuz. Prawicarjo su kónc tydźenja młodźinski klub „Chekov“ w Choćebuzu napadnyli a na sćěnach parole kaž „Cottbus bleibt deutsch“ a hrónčka přećiwo žonam a queernym ludźom zawostajili. Do kluba tež serbscy młodostni rady chodźa. Rěčnica kluba Carolin Andres praji, zo njedadźa so zatrašić. Při akciji wobškodźichu skućićeljo nasćěnowe wobrazy młodostnych, kotrež mnohotnosć symbolizuja.

Zjězd budźi kontrowersu