Wojerecy (KD/SN). Zwoprawdźenje hospodarskeho strukturneho koncepta we Wojerecach wuskutkuje so mjez druhim na tamnišu přiradu za serbske naležnosće. Kaž měšćanscy radźićeljo wutoru wobzamknychu, ma so přirada wot klětušeho jenož hišće štyri razy wob lěto schadźować město dotal dwanaće razow. Na te wašnje maja so tak mjenowane posedźenske pjenjezy zalutować. Za to pak smě gremij wot 2026 jědnaće město dotal dźewjeć čłonow měć.

Dalša lutowanska naprawa we wobłuku hospodarskeho strukturneho koncepta je, zo matej so přirada za zbrašenych a přirada za seniorow do jednoho cyłka zjednoćić. Dotal měješe kóždy z tejule gremijow dźewjeć čłonow a je so jědnaće razow wob lěto zetkał. Wot klětušeho změja za wobě temje jenož hišće jednu přiradu. Ta ma po woli měšćanskeje rady jědnaće čłonow měć a so kóždej dwaj měsacaj na wuradźowanje zetkać. Frakciji CDU a SPD chcyštej z wosebitym namjetom docpěć, zo so přiradźe hakle w nowej legislaturnej dobje zjednoćitej, kotraž so 2029 započnje. To pak wjetšina radźićelow wotpokaza.