Wobšěrne saněrowanje tunla pod Limasom nimale zakónčene

Zhorjelc (AK/SN). Tunl na awtodróze A 4 pod Limasom pola Zhorjelca budu šoferojo wot 16. januara zaso dospołnje wužiwać móc. „Hač na małe zapozdźenja smy časowy plan derje dodźerželi. Poslednje dźěła bórze zakónčimy“, praji Markus Bräuer wot awtodróhoweje towaršnosće. Nastupajo wudawki za ponowjenje tunla su plan tróšku překročili. Planowanych bě 54 milionow eurow. Na kóncu wudadźa 57,8 milionow eurow.

Staw techniskich připrawow tunla a wěstota njewotpowědowaštej hižo dźensnišim žadanjam. Loni w aprylu započachu sewjernu rołu do směra na Drježdźany saněrować, štož traješe hač do lětušeho februara. Wot měrca ponowichu južnu rołu do směra na Zhorjelc. Wot 12. hač do 14. decembra tunl hišće raz dospołnje zawru. 14. decembra připołdnju pak budźe južna roła zaso swobodna. W sewjernej poběhnje wobchad po jednej čarje. Wot 16. januara tež tam žane haćenja wjace njebudu.