Budyšin (CS/SN). Hižo dlěši čas je so Budyski pjekarski mišter Martin Bäns z mysličku zaběrał, wosušk ze žonopom napjec. Po tym zo bě loni najwšelakoriše eksperimenty zakónčił, je so wón nětko ze žonopowym wosuškom do zjawnosće zwěrił. Mišter sam je z wuslědkom spokojom a wčera na woptanje přeprošeni nowinarjo běchu to tež. „Hdyž njewěš, zo je tu žonop nutřka, to njepytnješ“, běchu sej přezjedni. Trochu intensiwniši słód rózynkoweho wosuška žněješe dobry wothłós. Martin Bäns wobhladuje swój žonopowy wosušk tež jako pósłanca ­Budyšina. Pječwo móžeš internetnje na stronje „Sächsische Genussmanufaktur“ skazać. W Budyšinje poskićuja jón w žonopowej manufakturje na Mjasowych wikach a w měšćanskej dźěłarni na Kamjentnej dróze čo.15.

Při zhotowjenju swojeho wosebiteho wosuška dyrbješe Martin Bäns wobkedźbować, zo ma so podźěl mloka pomjeńšić a zo so wosušk předołho njepječe. Najprjedy chcyše pjekar žonopowe symješka na wosušk sypać. Tule ideju pak naposledk spušći. Tež w ćěsće žane tajke symješka njejsu.