Žórła wotkrywać a stawizny pisać
Lejno (MDź/SN). Župa „Michał Hórnik“ Kamjenc je wutoru wjesnych chronikarjow do Lejnjanskeho hosćenca přeprosyła. Po lońšim wozrodźenju koła bě to jeho druhe zetkanje, rozłoži županka Diana Wowčerjowa. Hosćo běchu Anna Měrćinowa, Marhata Deleńkowa a Wito Bejmak ze Serbskeho instituta. Pod hesłom „Žórła namakać a stawizny pisać“ předstajichu woni Serbsku centralnu biblioteku, Serbski kulturny archiw a dalše žórła, z kotrychž móža chronikarjo při swojim dźěle čerpać.
Krótkopowěsće (16.04.26)
LaSuB: Hrjehor „super reagował“
Slepo. W zwisku z pozdatnje pornografiskim materialom w projektnym tydźenju wyšeje šule w Slepom (SN su rozprawjeli) je nawoda kubłanišća Jan Hrjehor „super reagował“. To wobkrući rěčnik krajneho zarjada za šulu a kubłanje (LaSuB) Clemens Arndt wčera w telewiziji MDR. Hrjehor je projekt hnydom přetorhnył a prawje jednał, tak rěčnik přisłušneho krajneho zarjada.
Kamjenje na kolijach
Wojerecy. Železniska čara mjez Wojerecami a Niskej bě wčera popołdnju nachwilnje zawrjena. Přičina toho bě awtomatiske borzdźenje ćaha, dokelž něšto na kolijach ležeše. Kaž so wukopa, běchu to kamjenje. Policija je slědy zawěsćiła a pad přepytuje, wšako su njeznaći strašnje do wobchada zapřimnyli. Ćah je po krótkej přestawce dale jěł.
Jónkrótne myto za namakanku
Nětko stawniske wěrowanja móžne
Rědkeho ptačka fotografował
Z krajnym radu rěčeć
Policija (15.04.26)
Awto do busa zrazyło
Łupjanska Dubrawka. Wobchadne njezbožo, na kotrymž bě bus wobdźěleny, je so póndźelu popołdnju we Łupjanskej Dubrawce w Radworskej gmejnje stało. Bus bě tam na kromje puća zastał. To pak bě 45lětny wodźer wosoboweho awta po wšěm zdaću přewidźał a zrazy do busa. 58lětny wodźer busa so snadnje zrani. Jeho dowjezechu do chorownje. Na jězdźidłomaj nasta dohromady něhdźe 25 000 eurow škody.
Gmejna so sudnisce wobara
We Łazu wobsteja na swojim rozsudźe wo wužiwanskim zrěčenju
Łaz (AK/SN). Łazowska gmejna so přećiwo nachwilnemu postajenju energijoweho zastaraćela enviaM na Lipšćanskim krajnym sudnistwje wobara. Gmejnska rada je wčera jednohłósnje rozsudźiła, so při tym wot Drježdźanskeje prawizniskeje kenclije zastupować dać. Pozadk je, zo chce gmejna za čas wot 2023 hač do 2042 z Wojerowskimi zastaranskimi zawodami (VBH) nowe koncesiske zrěčenje wotzamknyć. Tole bě gmejnska rada w juniju 2024 rozsudźiła. Konkurent enviaM rozsud njeakceptuje. „Njemóžachmy pak žane zmylki z našeje strony zwěsćić“, rjekny Łazowski wjesnjanosta Thomas Leberecht na posedźenju gmejnskeje rady.
Chcedźa wobydlerjam bliscy być
Koslow (JK/SN). Towarstwowy dom „K žorawjej“ w Koslowje bě wčera nimale hač na poslednje městno wobsadźeny, tajki wulki bě zajim za posedźenje Njeswačanskeje gmejnskeje rady, kotraž tam wčera wječor prěni raz wuradźowaše. Wjesnjanostka Juliane Macalina (njestronjanka) chce posedźenja gmejnskeje rady we wšelakich wjeskach gmejny z dobrym wašnjom dźěła komunalneho parlamenta sčinić. Tak móža wobydlerjam bliscy być a jich naležnosće po móžnosći hnydom na městnje rozrisać. W Koslowje witaše wjesnjanostka wčera něhdźe dwaceći wjesnjanow na posedźenje.
