Droždźij (CS/SN). Nazymski běrnjacy swjedźeń w Droždźiju (Drehsa) je móhłrjec tajny tip, za kotryž dyrbiš hišće lědma wabić. Tež minjenu njedźelu móžachu najebać pochmurjene wjedro zaso syły wopytowarjow w małej wsy mjez Buke­cami a Wósporkom witać. Tamniše domizniske towarstwo, kotrež ma mjeztym wjele rutiny w organizaciji tutoho swjedźenja, bě so hromadźe z něhdźe 150 wjesnjanami wo bjezporočny wotběh zarjadowanja postarało. Organizowali běchu na přikład wosebity serwis młodostnych: Tući dowjezechu kupcej kupjeny měch běrnow z karu na něšto stow metrow zdalene parkowanišćo k awtu. Tež přijězd a wotjězd mnohich hosći organizatorojo tak rjadowachu, zo so wobchad njekopješe.