Film wo swjedźenskim ćahu składnostnje 800. jubileja w Chrósćicach předstajeny

Chrósćicy (MČu/SN). Njepřestawajcy přichadźachu Chróšćenjo minjeny pjatk popołdnju na žurlu swojeje „Jednoty“. Jako wjesnjanosta Marko Kliman dźakne zarjadowanje za sobuskutkowacych na wulkim swjedźenju składnostnje 800. róčnicy prěnjeho naspomnjenja Chróšćanskeje gmejny a wosady zahaji, běše jich dohromady 500 ludźi, kotřiž chcychu hišće raz zhromadnje na wjeršk lěća a lěta spominać. Katharina Jurkowa, regionalna rěčnica Domowiny za teritorij župy „Michał Hórnik“, kotrejž gmejna Chrósćicy přisłuša, dźakowaše so wšitkim sobuskutkowacym za jich njesprócniwe dźěło, mjez druhim tež Michałej Cyžej, nawodźe Budyskeho studija Lucija, kiž běše ze swojimi sobudźěłaćerjemi dokumentarny film wo swjedźenju stworił. Dokumentaciju wo swjedźenskim ćahu pozdźišo pokazachu. Přitomnym běše to wulkotna składnosć, swjedźeń z pomocu krasnych wobrazow a filmowych sekwencow kaž tež informatiwnych komentarow hišće raz sobu dožiwić.