Nowy hort ma z drjewa nastać
Dom za 110 dźěći chcedźa klětu pódla šule twarić započeć
Róžant (JK/SN). Napjeće su čłonojo gmejnskeje rady Ralbicy-Róžant na swojim wčerawšim posedźenju předstajenje projekta noweho Ralbičanskeho horta pódla šule wočakowali. Frank Wiemann z Kamjenskeho inženjerskeho běrowa pdw jim předewzaće rozkładowaše. Twar budźe dospołnje z drjewa. To je alternatiwa k spočatnje planowanemu přetwarej něhdyšeje pěstowarnje. Dwaj milionaj eurow ma gmejna za to maksimalnje k dispoziciji. W domje změje cyłkownje 110 dźěći městno. Wulke a swětłe rumnosće maja so na wšelake wašnja wužiwać hodźeć. We wšitkich rumnosćach budźe tepjenje w špundowanju zatwarjene. Trěbnu ćopłotu za to produkuje ćopłotna klumpa, kotruž ćěrja z milinu na třěše instalowaneje fotowoltaikoweje připrawy.
Na kermušku
Chrósćicy. Na wosadnu kermušku su młodostni a dorosćeni dźensa, pjatk, do Hórnikoweho domu w Chrósćicach přeprošeni. W 20 hodź. zahaja wječor z Božej mšu a přiwzaćom do wosadneje młodźiny. Po tym, něhdźe wot 21 hodź. budu reje ze skupinu SerBeat. Zastup płaći pjeć eurow.
Chcedźa ryby wułójić
Běła Hora. Z Młynskeho hata w Běłej Horje (Belgern) chcedźa jutře, sobotu, wot 10 do 17 hodź. ryby wułójić. Změja tam delikatny poskitk přihotowany. Na předań budu čerstwa a kurjena ryba, soljanka a pražena ryba. A tež wo dalše přikuski, zabawu a hudźbu so Škodźic swójba stara. Wšitcy zajimcy su pod hesłom „Swjećće rady z nami!“ cyle wutrobnje přeprošeni.
Na interaktiwny přednošk
Bart. Přichodnu wutoru, 28. oktobra, w 19 hodź. wotměje so w gratowni wohnjoweje wobory w Barće na Hłownej 18 interaktiwny přednošk z dr. Christianu Piniekowej. Z tym zahaji wona rjad pod hesłom „Pisana serbskosć“. Jónu wob měsac chcedźa podobne přednoški we wšelakich wsach mjez Malešecami a Bukecami poskićeć, zdźěli syć za serbsku rěč a regionalnu identitu ZARI.
Nazymske wěncy paslić
Rěčnišćo murje dla přepołoža
Pančicy-Kukow (SN/MWj). Na twarnišću připrawy, kiž w Pančicach-Kukowje pegel Klóšterskeje wody měri, dyrbja rěčnišćo trochu přepołožić. Tole zdźěli wjesnjanosta Markus Kreuz wčera na posedźenju gmejnskeje rady. Hdźež je něhdy hosćenc stał, ma rěčnišćo něhdźe meter wotstawka wot murje při Róžeńčanskej dróze dóstać. Přičina je, zo woda murju dźeń a bóle wupłoka, tak zo móhła so wona raz sypnyć. Tohodla ma tam skłonina z kamjenjow nastać, kotraž rěku wot murje zdźěli. Plany wobsteja samo na sebi hižo wot toho časa, zo su před lětami w Pančicach-Kukowje nowy móst nad Klóšterskej wodu natwarili. Nětko je potajkim zwoprawdźeja. W zwisku z pegel měrjacej připrawu budźe tam zaso mosćik, kiž smědźa tež wobydlerjo a hosćo wužiwać.
Kaž Markus Kreuz wčera dale zdźěli, so w decembru znowa adwentnička wuměnkarjow gmejny Pančicy-Kukow wotměje. Za nju pytaja darićelow, kotrychž podpěra je dale witana. „Dary pak njejsu wuměnjenje za to, zo adwentničku přewjedźemy. Wona so na kóždy pad wotměje“, wjesnjanosta wčera podšmórny.
Serbsku protyku wo kwasach prezentowali
Nowoslicy (SN/MiR). Protyka je w Serbach hižo lětdźesatki najbóle čitany ćišćany produkt, kotrež Ludowe nakładnistwo Domowina wudawa. To tež klětu hinak njebudźe. Jednaćel LND Syman Pětr Cyž witaše wčera wječor mnohich zajimcow do wjesneho zetkawanišća w Nowoslicach. Serbska protyka na lěto 2026 wěnuje so wabjacej temje „Serbski kwas“. Jědnaće přinoškow rysuje kwasowanje w dawnych a dźensnišich časach w Serbach kaž tež w susodnymaj Čěskej a Pólskej. Janina Mikławškowa, kotraž bě wudaće jako lektorka LND přewodźała, redaktora Pětra Šołtu na spočatku překwapi. Wón měješe wowcku za křińčki formować, tak kaž to Raphaela Wićazowa w swojim přinošku wopisuje. Njech je přeradźene, zo je so serbskemu protykarjej wowcka z butry derje radźiła. Tola nic jenož kwasowanje čitarja puta, sej dožiwjenja a mysle pisacych wotkryć. Pjeć awtorow čitaše ze swójskich tekstow abo so k temje swojeho přinoška wupraji. Přidatnje pokazane fota pohłubšichu zaćišće wopytowarjow. Juliana Kaulfürstowa předstaji z awdio-přikładami, kak su ludźo něhdy w Slepjanskich kónčinach kwasowali.
Krótkopowěsće (24.10.25)
Akademija zahaji semester
Budyšin. 17. Budysku akademiju wuhotujetej město Budyšin a campus Dualneje wysokeje šule. Mjez pjeć poskitkami, kotrež spočatk nowembra zahaja, budźe klětu 13. apryla přednošk wo Mari Grólmusec. Historikarka a nawodnica wopomnišća na Mnichowskim naměsće w Drježdźanach dr. Birgit Sack rysuje žonu mjez wědomosću, politiku a spjećowanjom.
Mjez sobu so nadpadnyłoj
Drježdźany. W Budyskim wokrjesu namakanej mortwej wjelčicy njebuštej zatřělenej. Kaž Sakski krajny zarjad za wobswět, ratarstwo a geologiju w Drježdźanach zdźěli, stej zwěrjeći na přirodne wašnje zahinyłoj. Jako přičinu mjenuje zarjad rozestajenja a bój mjez młodymaj zwěrjećomaj. Berlinski Leibnitzowy institut bě kadawraj přepytował.
Mjenje pěstowarnjow
W bibliotece modele twarić
Na spočatki dźiwadła spominali
Nowotwar NSLDź před 50 lětami w srjedźišću literarneho dopołdnja
Budyšin (CS/SN). Wo nastaću noweho dźiwadła na Budyskej Seminarskej so wjele legendow powěda. Mjeztym je tomu 50 lět, zo w twarjenju dźiwadło hraja. We wobłuku zarjadowanja „Literatura dopołdnja“ su minjenu njedźelu podawki wokoło wottorhanja stareho domu na Žitnych wikach a natwara noweho domu hišće raz wobswětlili. Šefdramaturgowka Eveline Günther citowaše wotpowědne wurězki z lěta 2013 wušłeje knihi Michała Lorenca wo stawiznach dźiwadła a dźiwadźelnik Marian Bulank pohnuwaše publikum ze žiwjenskimi dopomnjenkami Jana Kindermanna k smějkotanju.
Wo dźěle policije rozprawjałoj
Pančicy-Kukow (SN/MWj). W gmejnach zarjadniskeho zwjazka Při Klóšterskej wodźe stawa so wjele mjenje kriminalnych deliktow hač w druhich kónčinach Zhorjelskeje policajskeje direkcije. Tohodla móža ludźo tule poměrnje wěsće žiwi być. Tole rjekny wobydlerski policist André Kober wčera na zarjadowanju Domowinskeje skupiny Pančicy-Kukow. Hromadźe ze swojej kolegowku Silke Čornakowej z Kamjenskeho policajskeho rewěra porěča wón wo swojim wšědnym dźěle a tež wo aktualnych strachach, kotrež ludźom hroža.
Wobrazy a hudźba cyłk tworiłoj
Budyšin (CRM/SN). We wuměłstwowej galeriji Budissin na Hrodowskej su njedawno dalšu wustajeńcu wotewrěli. Z Lipska pochadźacy a tam skutkowacy 36lětny moler a grafikar Christian Bode běše tudyšej galeriji wjace hač třiceći swojich mjeńšich eksponatow za hač do 20. nowembra trajacu přehladku k dispoziciji stajił. Wěcywustojna kuratorka Jana Böhme witaše něhdźe 30 jara zajimowanych hosći a poprosy Marie Bode wo hódnoćace słowa. Wona estetiku swojeho mandźelskeho bliže rozjasni. Christian Bode je w Hildesheimje a Lipsku tworjace wuměłstwo studował a swójski horicont w Finskej kaž tež w dalokej Chinje rozšěrił. Tak njepohibuja so wustajene wobrazy jenož w napjatosći mjez wobkedźbowanjom reality a fantaziju, ale tohorunja mjez swobodu (wuměłstwa) a zamjezowanjom. Z tym tworja wone wjazmo mjez zašłosću a (trěbnym) skokom do njewěstoty, kotraž dźě so nam dźeń wote dnja wotwěra. Rěčnica pak tež wuswětli, kajki pozitiwny wid ma wuměłc na žony a kak wón swój empatiski wid do portretow zapřija.
