Budyšin. Sekcija hudźba Maćicy Serbskeje přeprošuje na dalše zarjadowanje. Štwórtk, 5. februara, w 19 hodź. předstaji w sydarni čo. 106 Budyskeho Serbskeho domu filmowu dokumentaciju serbskich ludowych rejow. Wšitcy zajimcy su wutrobnje přeprošeni.

Radźićeljo wuradźuja

Róžant. Přichodne posedźenje gmejnskeje rady Ralbicy-Róžant wotměje so štwórtk, 5. februara, we 18.30 hodź. w Róžeńčanskej gmejnskej sydarni. Mjez druhim póńdźe wo to, kotre stejišćo gmejna zabjerje, hdyž dóńdu próstwy ­inwestorow wo twar fotowoltaikowych připrawow na gmejnskich ležownosćach.

Chrósćicy. Tohorunja štwórtk, ale w 19 hodź., zeńdźe so Chróšćanska gmejnska rada w gmejnskim a kulturnym centrumje. Tam chcedźa mjez druhim hospodarski plan za lěto 2026 předstajić a wo nim diskutować.

Worklecy. Tež Worklečanska gmejnska rada zeńdźe so štwórtk, 5. februara, w 19 hodź., a to w horće „K wódnemu mužej“. Radźićeljo chcedźa dalše nadawki we wobłuku saněrowanja wyšeje šule „Michał Hórnik“ rozdawać. Tónraz póńdźe wo suchotwar a wo zatwar durjow.

Njestrózbeho na e-scooteru lepili

Kamjenc. Při wobchadnej kontroli na Njeswačanskej dróze w Kamjencu su zastojnicy tamnišeho policajskeho rewěra mjez druhim 42lětneho na e-scooteru přepruwowali. Dźiwneho zadźerženja dla testowachu jeho na drogi. Test na amfetaminy bě pozitiwny.

W Čornym Chołmcu su z pokiwow a namjetow wopytowarjow wuknyli

Čorny Chołmc (SN/MiR). „W kurjawje samoty“ rěka lětuša inscenacija w rjedźe Krabatoweje powěsće, kotruž Kulturny centrum Krabatowy młyn w Čornym Chołmcu přihotuje. Kaž nowinska rěčnica Susann Wuško zdźěli, su za to regionalne předewzaće Kreevo tzwr z Noweje łuki zdobyli, kotrež so wo knihowanje zastupnych lisćikow stara. „Smy přispomnjenja a namjety wopytowarjow z lońšeho lěta přewzali“, rjekny jednaćel kulturneho centruma Anton Fuchs, „změjemy přidatne rjadowanje ze serwerom, kiž ma wulki nawal wopytowarjow na online-portalu wodźić.“ ­Loni běše naprašowanje porno před­chadźacemu lětu wo 250 procentow stupało. Lětsa dalše stopnjowanje wo połsta procentow wočakuja.

Radwor (SN/MkWj). Na dźěłapołne lěto zhladowali su spěwarki a spěwarjo Radworskeho chóra Meja na swojej hłownej zhromadźiznje minjeny štwórtk w swojim domicilu „Słodenku“. Předsyda Daniel Henich je cyłu sep terminow naličił, kotrež su čłonojo loni swěru zmištrowali.

Wusahowace zarjadowanja běchu sobuskutkowanje we wulkim chórje składnostnje swjedźenskeho tydźenja „800 lět Malešecy“. Dalše wjerški běchu lětni ­koncert při wosadnej cyrkwi kónc awgusta z 240 wopytowarjemi a ze skupinu „Wólbernosće“ jako hósć kaž tež nalětni koncert na žurli Serbskeho domu w Budyšinje z dobrym wothłosom.

Na wuspěšnej premjerje „Adwent na dworach“ na Radworskej nawsy je Meja tohorunja sobu skutkowała a tak prezencu serbskeje rěče zaručiła. Předsyda chóra dźakowaše so w swojej rozprawje wuraznje dirigentej Pětrej Cyžej za swěrny, mjeztym dobrych 20 lět trajacy hudźbny nawod kaž tež Lubinje Žurowej, kotraž ­jeho zastupuje, hdyž je trjeba. Dźakowali pak su so tež Monice Wenclowej za swědomite rjadowanje financow.