Herbert Krječmar dobył
Njeswačidło. Třeći lětuši škotowy turněr serbskich seniorow je wutoru w Njeswačidle Herbert Krječmar z 2 928 dypkami dobył. Druhe městno wobsadźi Wolfgang Kühn (2 758), třeće Manfred Hörauf (2 485). Cyłkowne hódnoćenje nawjeduje Herbert Krječmar.
Zhromadnje spěwać
Budyšin. Zwjazk serbskich spěwarskich towarstwow (ZSST) přeprošuje na dalše zhromadne spěwanje. Wone wotměje so wutoru, 7. apryla, we 18 hodź. w chórowej rumnosći Serbskeho ludoweho ansambla.
Pochoduja za měr
Kamjenc. Měrowej zwjazkaj z Kamjenca a Budyšina namołwjatej ludźi, so jutrownu póndźelu, 6. apryla, wot 15 do 17 hodź. na demonstraciji za měr, wotbrónjenje a zrozumjenje mjez ludami wobdźělić. Wona zahaji so na Kamjenskim torhošću před radnicu, hdźež porěči wyši měšćanosta Michael Preuß. Po tym poćahnu zhromadnje hač k wopomnišću w Knježim dole.
Hosćency jutry połnje wobsadźene
Za něšto dnjow swjećimy jutry. Křesćanski swjedźeń woznamjenja kónc 40 dnjow trajaceho póstneho časa. Tuž so wokoło jutrow při jědźi njelutuje. Štóž chce jutrońčku ze swójbu abo z přećelemi w hosćencu powobjedować, ma skerje hubjene šansy, něhdźe městno dóstać, kaž małe naprašowanje wunjese.
Budyšin (SN/jp). Na wosebitych dnjach sej rady něšto wosebiteho popřeješ. Tohodla něchtóžkuli jutry w hosćencu wobjeduje, zo by sej doma dźěło zalutował. Štóž pak dotal hišće žane městno rezerwował njeje, ma pola serbskich hosćencarjow lědma šansu, městno dóstać.
Dinarjec swójba z Nowoslic je před sydom tydźenjemi za swój jutrowny poskitk wabić započała. Po štyrjoch tydźenjach běchu blida w swjedźenskej bróžni wobsadźene a wuknihowane. Tam poskića njedźelu na bufeće howjaze mjaso a jazyk, nukl kaž tež jehnjo. K tomu syda čerstwy hromak, čerwjeny kał a pisana zeleninowa měšeńca. Ale tež wegetariarojo njebudu hłód tradać dyrbjeć.
Telefonowe dušepastyrstwo Hornjeje Łužicy je krótko do jutrow na ...
W Ralbičanskej Šołćic pjekarni su sobudźěłaćerjo tele dny ...
Krótkopowěsće (02.04.26)
Brunicu dlěje wudobywać?
Drježdźany/Berlin. Sakski ministerski prezident Michael Kretschmer je so namjetej zwjazkoweho kanclera Friedricha Merza (wobaj CDU) přizamknył, brunicu tež po lěće 2038 wudobywać, budźe-li to trjeba. Dotal je planowane, zo potom poslednja łužiska wuhlowa milinarnja w Hamorje dźěłać přestanje. Zawodna rada LEAG priwilegowanje milinarnjow na juhu a zapadźe Němskeje kritizuje.
Dwurěčne pomjenowanje
Budyšin. Zwjazk 90/Zelenych we wokrjesu Budyšin je na swojej njedawnej hłownej zhromadźiznje wobzamknył, zo so wotnětka ‚Kreisverband Bautzen-Budyšin‘ mjenuje. Dokelž je serbšćina w Sakskej wosebje škitana a němčinje po zakonju runohódna, je dwurěčne pomjenowanje konsekwentny krok.
55 próstwow wo spěchowanje
Hdyž so kruwa w hródźi zwjeze
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (77)
Jónu zazwoni dźeń do patoržicy wobsedźer kruwow na mnje a rysowaše mi rozpjeršeny, zo je jeho najstarša kruwa ćeliła (kalben), ale njemóže wjace stanyć a što budźe nětko z ćelatkom ... Změrowach jeho a podach so na puć. Na małym statoku mje wobsedźer hižo wočakowaše. Cyle zmotany mi rjekny, zo drje to ničo wjace njebudźe. Přepytowach zwěrjo. Napadnej běštej lódzymnej wuši. Tež dalše indicije so k wobrazej chorosće hodźachu. „Jasny pad“, prajich, „Kruwa ćerpi pod ,mlokowej zymicu (Milchfieber)‘. Dóstanje kalcium a potom zaso steji.“ Direktnje přez žiłu dach infuziju z kalciumom pomału do kreje. Terapija njebě hišće cyle dokónčena, a hižo so kruwa zběhny. Wobsedźer njemóžeše so dodźiwać a bě pře wšu měru zbožowny.
Šulerjo kmótřiske całty pjekli
Nadobo bus tola po wsy jědźe
Twarnišćo na zwjazkowej dróze B 156 stara so wo paradoksne połoženje
Brězynka (UM/SN). Wot apryla 2024 wobydlerjo Brězynki (Briesing) w Malešanskej gmejnje wo to wojuja, zo přińdu wjesne dźěći wěsće na busowe zastanišćo. Wot toho časa mjenujcy dyrbja wone poprawom zwjazkowu dróhu B 156 z jeje wjele wobchadom přeprěčić, zo móhli do šulskeho busa zalězć. Do toho bě so bus blisko přijězda do wsy zawróćił, tak zo njetrjebachu dźěći přez puć. Po jutrownych prózdninach 2024 pak tole hižo móžno njebě, pječa wěstoty wobchada dla. Na to mjez druhim namjetowachu, zo móhł bus koło po Brězynce jěć, prjedy hač do směra na Delnju Hórku dale jědźe. „Nam pak stajnje rjeknychu, zo to móžno njeje“, rozprawja Heiko Kasper, kiž słuša w Brězynce k staršim, kotrychž dźěći su w šulskej starobje. Runje to pak so nětko wšědny dźeń stawa. Wot toho časa, zo w susodnym Čelchowje (Zschillichau) B 156 wutwarja, jědźe bus koło po Brězynce. Blisko B 156 su samo nachwilne zastanišćo natwarili.
W bibliotece sej symjo wupožčić
Budyšin (SN/MWj). Zo móžeš sej w bibliotekach knihi, časopisy a druhe medije wupožčować, je powšitkownje znate. W Budyskej měšćanskej bibliotece maja wotnětka přidatny serwis. Pod hesłom „Symjo sej wupožčić – mnohotnosć žnjeć“ móža sej zahrodkarjo tam pisany wuběr wužitnych rostlin wotkryć.
Kaž měšćanske zarjadnistwo w nowinskej informaciji zdźěli, maja w bibliotece bohaty wuběr symjenja k dispoziciji. Mjez druhim su to tomaty „Pink Bumble Bee“, buny „Kentucky Wonder“, hroch „Kleine Rheinländerin“, čerwjena rěpa „Forono“ abo solotej „Maikönigin“. Symjenja najwšelakorišich kwětkow poskitk wudospołnjeja. Zaměr projekta je, stare družiny kulturnych rostlin zachować a tak mnohotnosć w našich zahrodach spěchować. Zdobom chce akcija wjeselo při zaběrje w zahrodce zesylnić a wuměnu mjez zahrodkarjemi přisporjeć.
Při jězoru sezonu zahajili
Hamor (AK/SN). ). Při Bjerwałdskim jězoru su dźensa, 1. apryla, nowu wodosportowu sezonu zahajili. Zdobom je tam wot dźensnišeho turistiska informacija zaso wo srjedy hač do njedźele wot 10 do 16 hodź. wočinjena. „Infrastrukturne připrawy přestajimy takrjec wot zymskeho na lětni čas, mjez druhim zjawne nuzniki, płuwace mosćiki a parkowanišća“, praji Hamorski wjesnjanosta Hendryk Balko.
W zašłym času mějachu při jězoru wospjet problem wandalizma. Mjez druhim su njeznaći tam nalěpki zawostajili a grafitije mórali. Gmejna nětko móžnosće widejoweho wobstražowanja pruwuje. Pasažěrska łódź „Bärwalder Seelust“ poskićuje nimo temowych jězbow wotnětka tež kołojězby. Wone započnu so w Klětnjanskim přistawje. Jězbny plan kaž tež wšitke wosebite jězby nadeńdu zajimcy internetnje pod . Po słowach Hamorskeho wjesnjanosty chce gmejna Bjerwałdski jězor dale zaměrnje zwičnjeć, a to předewšěm po digitalnym puću. Kaž z informacijow Sakskeho statistiskeho krajneho zarjada wuchadźa, docpěchu loni z něšto wjace hač 60 000 přenocowanjemi znowa rekord. W lěće 2024 bě jich cyłkownje 57 000 přenocowanjow.
