Njebjelčanska gmejna styki z gmejnomaj w Madźarskej a Beninje zakónči

Njebjelčicy (JK/SN). Njebjelčanska gmejnska rada je wjesnjanostu k wupowědźenju partnerskeju zrěčenjow z gmejnomaj w Madźarskej a w Beninje społnomócniła. Gmejna wudźeržuje partnerske styki ze štyrjomi gmejnami we wukraju. Nimo pólskeho Namysłowa a čěskeho Hlučina stej to gmejna Ladánybene w Madźarskej a Ouidah w Beninje. Ke gmejnomaj w Pólskej a Čěskej njeje po słowach wjesnjanosty Andreja Bulanka (njestronjan) předaloko a styki hodźa so poměrnje derje pěstować. Wjetše ćeže ma gmejna, wobsahi partnerskeju zrěčenjow z tamnymaj gmejnomaj dodźeržeć, štož je tež wjetšeje zdalenosće dla z wjace prócu a dźěłom zwjazane.