Budyšin (CRM/SN). We wuměłstwowej galeriji Budissin na Hrodowskej su njedawno dalšu wustajeńcu wotewrěli. Z Lipska pochadźacy a tam skutkowacy 36lětny moler a grafikar Christian Bode běše tudyšej galeriji wjace hač třiceći swojich mjeńšich eksponatow za hač do 20. nowembra trajacu přehladku k dispoziciji stajił. Wěcywustojna kuratorka Jana Böhme witaše něhdźe 30 jara zajimowanych hosći a poprosy Marie Bode wo hódnoćace słowa. Wona estetiku swojeho mandźelskeho bliže rozjasni. Christian Bode je w Hildesheimje a Lipsku tworjace wuměłstwo studował a swójski horicont w Finskej kaž tež w dalokej Chinje rozšěrił. Tak njepohibuja so wustajene wobrazy jenož w napjatosći mjez wobkedźbowanjom reality a fantaziju, ale tohorunja mjez swobodu (wuměłstwa) a zamjezowanjom. Z tym tworja wone wjazmo mjez zašłosću a (trěbnym) skokom do njewěstoty, kotraž dźě so nam dźeń wote dnja wotwěra. Rěčnica pak tež wuswětli, kajki pozitiwny wid ma wuměłc na žony a kak wón swój empatiski wid do portretow zapřija.