Nowoslicy (SN/MiR). Protyka je w Serbach hižo lětdźesatki najbóle čitany ćišćany produkt, kotrež Ludowe nakładnistwo Domowina wudawa. To tež klětu hinak njebudźe. Jednaćel LND Syman Pětr Cyž witaše wčera wječor mnohich zajimcow do wjesneho zetkawanišća w Nowoslicach. Serbska protyka na lěto 2026 wěnuje so wabjacej temje „Serbski kwas“. Jědnaće přinoškow rysuje kwasowanje w dawnych a dźensnišich časach w Serbach kaž tež w susodnymaj Čěskej a Pólskej. Janina Mikławškowa, kotraž bě wudaće jako lektorka LND přewodźała, redaktora Pětra Šołtu na spočatku překwapi. Wón měješe wowcku za křińčki formować, tak kaž to Raphaela Wićazowa w swojim přinošku wopisuje. Njech je přeradźene, zo je so serbskemu protykarjej wowcka z butry derje radźiła. Tola nic jenož kwasowanje čitarja puta, sej dožiwjenja a mysle pisacych wotkryć. Pjeć awtorow čitaše ze swójskich tekstow abo so k temje swojeho přinoška wupraji. Přidatnje pokazane fota pohłubšichu zaćišće wopytowarjow. Juliana Kaulfürstowa předstaji z awdio-přikładami, kak su ludźo něhdy w Slepjanskich kónčinach kwasowali.