Policija (25.11.25)
Při jězoru awto pokradnyli
Bjezdowy. Wulět do łužiskeje jězoriny měješe njedźelu za wobsedźerja wosoboweho awta typa Škoda Kodiaq njepřijomne sćěhi. Wokoło 14 hodź. bě wón jězdźidło na parkowanišću při Parcowskim jězoru wotstajił. Jako so tam krótko do 16 hodź. zaso nawróći, bě Škoda w hódnoće něhdźe 35 000 eurow fuk. Za nim kaž tež za paduchami policija nětko pyta.
Awto z barbu namórali
Běła Woda. Njemało stróžił je so wobsedźer awta njedźelu rano w Běłej Wodźe. Jeho jězdźidło běchu njeznaći w nocy z běłej barbu namórali. Kaž policija zdźěli, wučinja wěcna škoda něhdźe 1 000 eurow. Běłowodźanska kriminalna słužba pad přepytuje.
Hdźež muka a wolij nastaštej
We Łazu přihotuja wosebitu adwentnu wustajeńcu
Łaz (AK/SN). Młyny najwšelakorišeho razu su něhdy na mnohich městnach do kulturneje krajiny Hornjeje Łužicy słušeli. Dokelž je so najwjetši dźěl z nich mjeztym zhubił abo dokelž buchu přetwarjene, chce je spěchowanske towarstwo Domu Zejlerja a Smolerja we Łazu w swojej lětušej adwentnej wustajeńcy do srjedźišća stajić. „Młyny podłu Małeje Sprjewje. Wot Roholnja hač do Hermanec“ rěka přehladka, kotruž prěnju adwentnu njedźelu, 30. nowembra, w 14.30 hodź. we Łazu wotewru.
K njej přinošował je Jürgen Křižank z Roholnja. Jeho nan je jako posledni młynk tamniši młyn wjedł. „Hač do 1960 je wón zorno na muku mlěł, pozdźišo dźěłaše jenož hišće picu za swinje a konje“, so 72lětny dopomina. 1985 su Mału Sprjewju brunicy dla přepołožili, tak zo młynska hrjebja wusakny. Tak so tež 350lětne stawizny młyna skónčichu. Za wustajeńcu je Jürgen Křižank mišterske wopismo swojeho nana, wšelki grat, wahu, karu, z kotrejž su měchi wozyli, a druhe wěcy přewostajił.
Wobrazy z emocionalnej hłubokosću
Budyšin (CS/SN). Štó žno rady na sudnistwo dźe? W twarjenju Budyskeho sudnistwa na Lessingowej móžeš tuchwilu znajmjeńša bjezstarostnje zastupić, zajimuješ-li so za wuměłstwo. Ilustratorka a wjelelětna knižna wuhotowarka Ludoweho nakładnistwa Domowina Isa Bryccyna tam pod hesłom „Wčera, dźensa, jutře“ swoje wobrazy wustaja. Při wotewrjenju přehladki minjeny tydźeń je so basnica Róža Domašcyna na swoje wašnje z dźěłami Isy Bryccyneje rozestajała. „Wona zamóže do słowow splesć, štož móžu ja jenož z wobrazami pokazać“, Isa Bryccyna swoju lawdatorku chwaleše. Wona čuješe so zrozumjena. Mjez druhim bě Róža Domašcyna rjeknyła: „Chceš-li wuměłstwo tworić, dyrbiš swobodny a ze sobu přezjedny być. Wuměłča ma wobrazy we hłowje a ruka je wuwjedźe.“
Cyłoněmski dźeń předčitanja su minjeny tydźeń we Wojerecach z ...
Krótkopowěsće (25.11.25)
Wulke slědźenišćo za Budyšin
Budyšin/Berlin. Wuspěch za krajneho radu Uda Witschasa (CDU): Slědźenišćo za inowatiwne twarstwo, kotrež bě we wubědźowanju Astrocentrumej podležało, přińdźe tola do Łužicy: Zwjazk, Sakska a Durinska su so wčera dojednali, zo budźetej sydło nošerja a jednaćelnja w Budyšinje. Sakska ministerka za infrastrukturu a wuwiće kraja Regina Kraushaar (CDU) dźakowaše so Witschasej a připowědźi 100 milionow eurow za infrastrukturu slědźenja w Budyšinje.
Zeleni: Wjac za serbšćinu činić!
Drježdźany. Frakcija Zelenych w Sakskim krajnym sejmje sej w aktualnym namjeće žada, zo Sakska dalše winowatosće Europskeje charty za regionalne a mjeńšinowe rěče zwoprawdźi. To potrjechi nimo kubłanja a zarjadnistwa tež hospodarske a socialne žiwjenje. We wopodstatnjenju rěka, zo so stabilizowanje serbšćiny dotal poradźiło njeje.
Přikładne přezmjezne dźěło
Moderne melodije Serbow požadane
Choćebuz. Pod titulom „Hudźba našeho časa“ wotmě so njedawno zakónčacy koncert Choćebuskeje hudźbneje nazymy 2025 w koncertowni campusa Braniborskeje techniskeje uniwersity Choćebuz-Zły Komorow (BTU). W jara derje pjelnjenej žurli poskićichu docenća, absolwenća a studenća studijneho směra instrumentalneje a spěwneje pedagogiki zajimawy repertoire němskich kaž tež serbskeju komponistow klasiskeje moderny. Mjez wopytowarjemi běchu komponistaj Frank Petzold a Jan Cyž kaž tež wudowa Detlefa Kobjele Marija Kobjelina. Wšěch třoch nawoda kóždolětneho koncertneho ewenta a moderator wječora, hudźbny wědomostnik a komponist Bernd Weinreich wosebje witaše.
Hudźbna poezija w Serbskim muzeju
Kedźbu, škotowarjo!
Městno dźaka a próstwy
Pomnik swjateju Cyrila a Metoda před 25 lětami poswjećili
Stróžišćo (SN/MWj). Na wyšinje blisko Stróžišća je Towarstwo Cyrila a Metoda (TCM) na swjedźenju Chrysta Krala w lěće 2000 milenijowy pomnik postajiło. Wjetšej hač člowjek staj tam patronaj Europy, swjataj Cyril a Metod předstajenaj. Z tym běchu katolscy Serbja tehdy swój dźak za 2000 lět křesćanstwa w Europje zwuraznili. Wot toho časa su so při pomniku njeličomne nutrnosće a zarjadowanja najwšelakorišeho razu wotměli. Tam nimoducy putnicy po Jakubowym puću wužiwaja dźakowni składnosć, zo bychu powotpočnyli, wodychnyli a do kraja hladali. Wuchodźowacy tam runje tak rady pozastawaja kaž kolesowarjo. Lěta, kotrež pomnik mjeztym steji, běchu spomóžne, zwurazni předsyda TCM Cyril Hančik na wosebitym nyšporje, na kotryž bě towarstwo njedźelu k pomnikej wyše Smochćic přeprosyło. Serbscy wěriwi z mnohich wosadow spominachu z fararjomaj Benom Jakubašom z Radworja a Geratom Wornarjom z Baćonja na poswjećenje pomnika před runje 25 lětami.
Fachowcy dale nuznje trěbni
Wojerecy (AK/SN). W Sakskej budźe we wobłuku hladanja hač do lěta 2030 něhdźe 5 000 fachowcow pobrachować. Swobodny stat měł dale intensiwnje za tele powołanje wabić. Předewšěm we wjesnych kónčinach su hladarjo nuznje trěbni. Tutón nastork je statna ministerka za socialne a strowotu Petra Köpping (SPD) njedawno we Wojerecach dóstała. Tam wopyta medicinsku powołansku fachowu šulu a geriatrisku staciju klinikuma „Łužiska jězorina“.
