W hosćencu so paliło

Běła Woda. Wšo druhe hač měrna bě 1. meja za wohnjowych wobornikow w Běłej Wodźe. Pjatk rano wołachu jich k hašenju na Berlinsku dróhu. Tam sapachu płomjenja z třěchi twarjenja, w kotrymž je hosćenc zaměstnjeny. Woheń poča so na susodny dom rozpřestrěwać. Kameradojo ewakuowachu šěsć woby­dlerjow z twarjenja. Hašenja dla dyrbjachu Berlinsku dróhu nachwilnje zawrěć. Něhdźe 140 wohnjowych wobornikow bě zasadźenych. Jich podpěrachu pomocnicy Techniskeho pomocneho skutka. Hašenje traješe hač do pózdnich wječornych hodźin.

Dźěći a młodostni z wotměnjawym programom wjesnjanow zabawjeli

Radwor (SN/BŠe). Najebać dołhi kónc ­tydźenja měješe młodźina w Radworju zašłe dny ruce połnej dźěła. Štwórtk su na chodojtypalenju zastaranje wjesnjanow přewzali. Hižo sobotu wječor přeprosychu wobydlerjow znowa na nato­čenje piwa. Twarskich dźěłow dla, kotrež so dźensa na dróze dr. Marje Grólmusec w Radworju zahaja, dyrbješe Radworska meja lětsa hižo spočatk meje padnyć. Zdypkom w 15 hodź. Wulkodubrawscy dujerjo wčerawše popołdnjo na nawsy zahajichu. Za kulturny program bě tónkróć serbska katolska pěstowarnja wsy zamołwita. Dźěći, kiž lětsa a klětu do šule zastupja, zaspěwachu spěwy a přednje­sechu hrónčka. Kubłarka Claudia Hej­dušcyna wšitke dźěći do programa za­přiješe a je publikumej předstaji. Hudźo na instrumentach je chowancy horta podpěrachu.

Z přewodom hudźby skupiny Jankahanka ćehnješe po tym dźesać porow młodostnych na swjedźenišćo. Za lětuše mejemjetanje běchu nowu choreografiju nazwučowali, při čimž klasiske elementy znatych serbskich rejow zapřijachu.

Něhdźe 30 dźěći Serbskeje zakładneje šule Budyšin a zakładneje šule w čěskim Polevsku wobdźěli so tydźenja na wosebitym němsko-serbsko-čěskim hudźbnym a rěčnym projekće. Pod hesłom „Hudźba a rěč“ dožiwichu w Chołmje (Kollm) tři pozbudźowace dny połne kreatiwity, wćipnosće a interkulturneho zetkawanja.

Zhromadnje z kreatiwnymi twarcam instrumentow, fachowcom za pišćele a beatbox kaž tež z nazhonitymi rěč­nymi animaterami zanurichu so dźěći hrajkajo do swěta nowych wurazow. Z recyclingowych materialijow nastachu hudźbne nastroje, kiž šulerki a šulerjo hnydom wuspytachu, kombinowachu a předstajichu. Při zhromadnym hudźenju, beatboxingu z pišćelemi a při ryt­miskich hrach bě spěšnje jasne: Hudźba njetrjeba zhromadnych wokablow, zo by zwjazowała. Cyle připódla dźěći němčinu, serbšćinu a čěšćinu nałožowachu – a to smějo so, kleskajo a spěwajo.

Kulow (MKo/SN). W Kulowje přihotuja energetiske saněrowanje třěchi małeje sportownje w šulskim kompleksu. Wuběrk měšćanskeje rady je planowanskemu běrowej Gumpert z Brěžkow nadawk dał, planowanski proces zahajić. Nadawk ma wobjim něhdźe 93 000 eurow. Sportowa hala wobsteji z betonowych dźělow, kiž maja wosebitu formu. Zwjetša maja wone jenož minimalnu chiba scyła žanu ćopłotnu izolaciju. Saněrowanje třěchi drje budźe jedyn z prěnich projektow, ­kotrež chce Kulow ze srědkow spěchowanskeho programa Zwjazka a krajow „Žiwe centrumy – zachowanje a wuwiće měšćanskich a wjesnych jadrow“ fi­nancować. Loni nazymu bě město při­zwolenje dóstało, zo smě w běhu 15 lět z tohole programa srědki wotwołać.