Wotewru přehladku wo jězoru
Čas fotow na papjerje je nimo
Wobrazy za wupokaz nětko w zarjadniskim zwjazku digitalnje nastawaja
Pančicy-Kukow (SN/MWj). Za nowy personalny wupokaz abo pućowanski pas trjebaš hižo wot meje digitalny wobraz. Tón je dotal fotograf zhotowił. Wot njeho sy QR-code dóstał, z kotrymž móžeše přizjewjernja w komunalnym zarjadnistwje wobraz přewzać. We wuwzaćnych padach sy dokument tež z wućišćanym wobrazom skazać móhł. Tónle přechodny čas pak je nětko nimo - znajmjeńša w zarjadniskim zwjazku Při Klóšterskej wodźe w Pančicach-Kukowje. Tam dóstachu minjeny tydźeń nastroj, z kotrymž wobydlerja hnydom na městnje fotografuja.
Hosćenc ma noweho lubuška
Posłužowacy roboter Erwin wuwabja mjez wopytowarjemi hosćenca „Wichowski dwór“ tójšto wjesela. Zo pak su sej tajkeho pomocnika wobstarali ma chutny pozadk.
Wichowy (UM/SN). Team pinčnikow a pinčnicow w hosćencu „Wichowski dwór“ we Wichowje (Weicha) blisko Wósporka ma noweho kolegu. Wón je poměrnje mały a słucha na mjeno Erwin. Z wobrotniwymi pohibami nosy skazane jědźe a napoje k blidam a so z hosćimi rady tež raz skrótka rozmołwja, ale stajnje ze samsnymi słowami. Wosebje wažny pak je Erwinej přiklesk. Přetož štož wón zdokonja, sej zawěrno připóznaće zasłuža. Erwin dźě njeje serwisowy sobudźěłaćer kaž kóždy druhi, ale roboter. Hdyž so Erwin k blidam w hosćencu podawa, je Anja Kleint stajnje w bliskosći. Roboter transportuje talerje a škleńcy mjenujcy jenož hač k blidu. „Hosćo pak sej skazane wěcy sami brać njetrjebaja“, nawodnica serwisa we „Wichowskim dworje“ rozłožuje. „Nic jenož dźěći, ale tež mnozy dorosćeni so wjesela, hdyž Erwin wokoło róžka přijědźe, a chcedźa, zo wón jich posłužuje“, wona rozprawja. Mnozy so z pomocnym pinčnikom tež fotografuja.
Pod horcymi temperaturami, kajkež je předewšěm srjedu dožiwichmy ...
Krótkopowěsće (04.07.25)
Wowčerjowa nowa dirigentka
Njebjelčicy. Njebjelčanski cyrkwinski chór změje po lěćnej přestawce nowu dirigentku. Zastojnstwo přewozmje w septembrje nachwilnje Hanka Wowčerjowa z Kozarc. Młoda žona je wučerstwo za předmjet hudźba studowała a hižo wjacore chóry dirigowała, mjez nimi chóraj „Šule Ćišinskeho“ a Serbskeho gymnazija kaž tež studentski chór.
Pomocnicy tež z druhich městow
Altenburg. Na bywšim wojerskim zwučowanišću Gohrischheide w Mišnjanskim wokrjesu wohnjowe wobory dale přećiwo wohenjej wojuja. Techniski pomocny skutk mjez druhim ze zwjazkow Budyšin, Kamjenc a Drježdźan je tohorunja na městnje. W změnach tam płomjenja hašeja.
Wjace ćahow za wuchodnu Saksku
Pytanje za korjenjemi abo přidatne lěto na gymnaziju?
Čehodla dwójce do 10. lětnika chodźić a 600 kilometrow wot doma zdalena bydlić? Leńka Meyerec je to zašłe šulske lěto činiła. Ma serbsku mać a němskeho nana a bydli z bratromaj a sotru w Münsteru.
Minjene šulske lěto pak je w Budyšinje w internaće přebywała a na Serbskim gymnaziju do šule chodźiła. Zajimawy bě za nju rozdźěl mjez šulomaj. Nimo koncepta šule bě wězo rěč rozsudna. Leńka je doma wot maćerje serbsce nawuknyła. Na prózdninskich kursach rěčneho centruma WITAJ je so tohorunja wobdźěliła, ale tutu „domjacu“ serbšćinu nětko w šuli nałožować, to bě hišće raz wulki krok. Serbsce pisać bě za nju tola wužadanje, runje tak kaž wurazy wosebje w přirodowědnych předmjetach. Ale Leńka je to wulkotnje zmištrowała.
Spušćomnje swoje nadawki spjelniła
Policija (03.07.25)
Bjez zawěsćenja jězdźił
Budyšin. Zo trjebaš za jězdźenje z e-scooterom winowatostne zawěsćenje, wě nětko tež 63lětny muž w Budyšinje. Jeho zadźerža policija póndźelu wječor na Drježdźanskej dróze w Budyšinje. Płaćiwe zawěsćenje muž njeměješe. Tohodla jemu zastojnicy dalšu jězbu zakazachu. Nimo toho změje 63lětny pjenježnu pokutu płaćić.
Starši dyrbja wjace płaćić
Rakečanska gmejna přinoški za pěstowarnju zwyšiła
Rakecy (JK/SN). Cyłu kopicu je Rakečanska gmejnska rada na swojim poslednim posedźenju do lětnjeje přestawki wobzamknyła. Zdźěla běchu to tež njelube, za mnohich wobydlerjow z dźěćimi samo bolostne, ale přiwšěm trěbne rozsudy.
Po wjacorych lětach, w kotrychž su so zwyšenju popłatka za dźěćace dnjowe přebywanišća wuwinyli, njemóžachu radźićeljo nětko wjace trěbny rozsud wobeńć. Tak dojednachu so po dosć kontrowersnej diskusiji na to, zo popłatk za žłobikowe městno wot 255 na 295 eurow, za pěstowarske městno wot 140 na 165 eurow a za městno w horće wot 80 na 90 eurow zwyša. To su zdźěla jara čućiwe zwyšenja, ale kaž wjesnjanosta Swen Nowotny (CDU) rjekny, nic najwyše. W někotrych susodnych gmejnach su popłatki hišće wyše, zdźěla hižo wjace hač 300 eurow. To pak nima Rakečanske nowe popłatki złahodźić. Dokelž statnu podpěru za wobhospodarjenje dźěćacych dnjowych přebywanišćow w přichodnych lětach zniža, chcedźa wjesnjanosća Budyskeho wokrjesa zhromadnje wo tym wuradźować, kak so naprawam sakskeho knježerstwa wobaraja.
