Budyšin (SN). Konflikt w Budyskej radnicy budźi tele dny znowa kedźbnosć. Wyši měšćanosta sprjewineho města Karsten Vogt (CDU) bě sej žadał, 30 połnych dźěłowych městnow kubłarjow a kubłarkow šmórnyć, štož by faktisce rěkało, pjećinje přistajenych w měšćanskich pěstowarnjach wupowědźić. Nětko su so potrjecheni w zjawnym lisće na čłonow měšćanskeje rady wobroćili. „Hižo měsacy so ličby a pruwowanske rozprawy tam a sem suwaja. Dźe wo procentowe dypki, wobličenja, ale nichtó njerěči z nami, kiž mamy wšědnje zamołwitosć, waše dźěći a wnučki zastarać. Naše dźěło zasłuža sej respekt a njeje žana tunja posłužba“, w nim rěka.