Wojerecy (KD/SN). Powědkowe figury kaž Krabat, lutki abo wódny muž maja we Wojerowskim Łužiskim centru dawno hižo swoje městno. Wo to starataj so mjez druhim pjekar Clemens Brězan, ­kotryž swoju kofejownju Mysticus a pjekarske předawanišćo wotpowědnje wuhotuje, a centerowa managerka Made­leine Matschke.

Nětko maja tam nowe postawy. Zmija a lutkaj bě pólski drjeworězbar Sylwester Chłodźinski zhotowił. Nimo toho su we Łužiskim centru wotnětka nasćěnowe wobrazy Slepjanskeho wuměłca Jörga Tauscha a powědkowy štom widźeć. Štóž do nakupowanišća přichadźa, wšitko to wuhlada. Krok po kroku mystiske po­stawy samo hłós dóstawaja, tak zo móža serbsce a němsce wo sebi powědać, ­Madeleine Matschke rozłožuje. Tule ideju zwoprawdźa rěčna motiwatorka Maria Šołćic.