Domizniski muzej w Njeswačidle wabi z nowej přehladku
Njeswačidło (SN/MWj). Runja druhim muzejam wuhotuja tež w Njeswačanskim domizniskim muzeju pódla wjesneho hosćenca stajnje w dohodownym času wosebitu wustajeńcu. Lětuša je cyłkownje 57. přehladka, kotruž w muzeju wot časa jeho wotewrjenja pokazuja. Wona wěnuje so hrajkam z časa NDR a modelowym železnicam. Z wabjenskeho plakata zajimc zhoni, zo pokazuja čłonki a čłonojo Towarstwa přećelow kultury a domizny zajimawostki ze swojich zběrkow. Tele zběrki zdadźa so jara wobšěrne, přetož paleta wustajenych eksponatow je dosć šěroka, kaž móže so zajimowany wopytowar sam přeswědčić.
