We Łazu přihotuja wosebitu adwentnu wustajeńcu

Łaz (AK/SN). Młyny najwšelakorišeho ­razu su něhdy na mnohich městnach ­do kulturneje krajiny Hornjeje Łužicy słu­šeli. Dokelž je so najwjetši dźěl z nich mjeztym zhubił abo dokelž buchu přetwarjene, chce je spěchowanske towarstwo Domu Zejlerja a Smolerja we Łazu w swojej lětušej adwentnej wustajeńcy do srjedźišća stajić. „Młyny podłu Małeje Sprjewje. Wot Roholnja hač do Her­manec“ rěka přehladka, kotruž prěnju adwentnu njedźelu, 30. nowembra, w 14.30 hodź. we Łazu wotewru.

K njej přinošował je Jürgen Křižank z Roholnja. Jeho nan je jako posledni młynk tamniši młyn wjedł. „Hač do 1960 je wón zorno na muku mlěł, pozdźišo dźěłaše jenož hišće picu za swinje a konje“, so 72lětny dopomina. 1985 su Mału Sprjewju brunicy dla přepołožili, tak zo młynska hrjebja wusakny. Tak so tež 350lětne stawizny młyna skónčichu. Za wustajeńcu je Jürgen Křižank mišterske wopismo swojeho nana, wšelki grat, ­wahu, karu, z kotrejž su měchi wozyli, a druhe wěcy přewostajił.