Pomjenowanje je rozsudne
Najwšelakoriše móžnosće spěchowanja towarstwow rozjimali
Pěskecy (SN/MWj). Towarstwa, iniciatiwy a jednotliwcy w serbskich a dwurěčnych gmejnach maja za swoje předewzaća, projekty a zarjadowanja tójšto spěchowanskich móžnosćow. Wuměnjenje je, zo wotpowěduja projekty spěchowanskim směrnicam a zo su próstwy prawje sformulowane. To je dopóznaće wčerawšeho wječora w Pěskečanskim sportowym domje. Tam je Njebjelčanska gmejna na wobydlersku zhromadźiznu přeprosyła, zo by towarstwa a jednotliwcow wo móžnosćach financielneje podpěry informowała. Přetož bjez towarstwow njeje aktiwneho wjesneho žiwjenja, kaž wjesnjanosta André Bulank spočatnje rjekny.
W Münsteru jutrowne jejka debili
Na žurli wosady swj. Mikławša w Münsteru-Wolbeku su sobotu, 7. měrca, serbske jutrowne jejka debili. Katja Meyerowa a Feliks Brojer, w Münsteru bydlacaj Serbaj, staj na předstajenje tradicije přeprosyłoj. Dohromady 22 wosobow je přeprošenje slědowało, mjez nimi bě pjeć dźěći.
Na spočatku předstajištaj přednošowarjej wšitke serbske techniki debjenja jejkow. Feliks Brojer koncentrowaše so na wužrawanje a škrabanje a Katja Meyerowa předstaji wóskowanje a bosěrowanje jejkow. Jako přikład a za inspiraciju běštaj swójske debjene jejka sobu přinjesłoj. Tež dźěłowy grat a tradicionalne mustry móžachu sej zajimcy wobhladać. Po tym smědźachu sami jejka debić, a to pak w technice škrabanja abo w bosěrowanju. Referentaj dźěštaj wot blida k blidu, poradźowaštaj kreatiwnych a jim při dźěle pomhaštaj. Při tym wuwi so tójšto rozmołwow wo Serbach a jich tradicijach. Na dalšim blidźe běchu za přestawku zymne napoje, kofej a słódny tykanc přihotowane. Tykanc bě Leńka Meyerec napjekła. Wona so tohorunja na zarjadowanju wobdźěli a staraše so wo dźěći.
Hospodarski plan ma za měsac stać
Njeswačanska gmejnska rada dźěła na nastajenju lětušeho hospodarskeho plana. Na swojim wčerawšim posedźenju zhonichu wot komornicy za to najnowše ličby.
Njeswačidło (JK/SN). To bě wčera wječor najskerje najkrótše zjawne posedźenje gmejnskeje rady, kotrež je so hdy w Njeswačanskej radnicy wotměło. Po wosom mjeńšinach bě wšo, štož smědźeše zjawnosć zhonić, wotbyte. Zajim wobydlerjow wšak přewulki njebě. Mjeztym zo w zašłosći zdźěla stólcy w sydarni dosahali njeběchu, běštej wčera jeničce dwě wobydlerce přitomnej, kotrejž ničo konkretneho na wutrobje njeměještej. Tak wusměrichu so radźićeljo na swoje naležnosće, kotrež přewobšěrne njeběchu.
Šoferojo trjebaja w Budyšinje nětko wjele sćerpnosće a sylne ...
Krótkopowěsće (11.03.26)
Kak dale ze Schadowanku?
Choćebuz. Předsydstwo župy Delnja Łužica je so wčera na swojim posedźenju dale z móžnymi změnami župnych wustawkow zaběrało. Konkretny namjet pak dźěłowa skupina dotal předpołožiła njeje. Dalša tema rozmołwy bě přichod delnjoserbskeje Schadowanki. Tole ze zdźělenki regionalneje rěčnicy Heike Apeltoweje wuchadźa. Zastupjerka Załožby za serbski lud je župu w tym zwisku wo podpěru prosyła.
Železnicarjo z wutrobu
Budyšin. Dokelž běchu jej loni w Trilexu w nuzy spěšnje pomhali, je młoda žona třoch sobudźěłaćerjow železniskeho předewzaća Länderbahn, kotraž Trilex wudźeržuje, za zwjazkowe myto „Železnicar z wutrobu“ namjetowała. Podawki w zwisku z randalěrowacym sobujěducym su pola njeje psychiski šok zawinowali. Ze swojim wobhladniwym postupowanjom su železnicarjo situaciju žony skutkownje polěpšili.
Zwoprawdźa jónkrótny projekt
Policija (10.03.26)
Pytaja swědkow
Budyšin. Policija pyta swědkow, kotřiž su sobotu w 15 hodź. na parkowanišću Budyskeje kupnicy Kaufland bijeńcu wobkedźbowali. Dotal njeznatej wosobje stej tam 55lětneho muža biłoj. Muž so při tym snadnje zrani a dyrbješe so lěkarsce zastarać dać. Skućićelej wopušćištaj městnosć do směra na skatowanišćo. Pokiwy přijimuja pod telefonowym čisłom 03591 3560.
Hdyž stej gmejnje ruce wjazanej
Hospodarske ćeže so na dalše naležnosće wuskutkuja
Njebjelčicy (JK/SN). Na minjenym posedźenju Njebjelčanskeje gmejnskeje rady dnjowy porjad předwidźeše, dwě wažnej wobzamknjeni gmejnskeje rady ze zašłych lět zběhnyć. To potrjechi wobzamknjeni za nastajenje twarskeju planow za Serbske Pazlicy a Njebjelčicy. Wosebje nastupajo twarske ležownosće „Za cyrkwinskej šćežku“ w Serbskich Pazlicach bě so gmejna wjacore lěta wo to prócowała, je medijam přizamknyć a zajimcam za přijomnu płaćiznu poskićeć, zo móhli sej tam swójski dom natwarić. Hospodarskich a financnych přičin dla pak gmejna tute předewzaće zwoprawdźić njezamó. Tuchwilu tež za tym njewupada, zo budźe w blišim času zaso kmana, tajke projekty zwoprawdźić. Samsne płaći za projekt w Njebjelčicach „Zapadnje Jěžowskeho puća“.
W internaće plincy pjekli
Někotři wobydlerjo internata Budyskeho Serbskeho gymnazija su so minjeny štwórtk zetkali, zo bychu zhromadnje plincy pjekli. Cyły dom za słódnym ćěstom wonješe, štož mnohich šulerjow přiwabi.
Jejka za ćěsto smy wuduli. Chcychmy je za wóskowanje jutrownych jejkow wužiwać. W horcej pónoji z butru abo wolijom potom jedyn plinc po druhim napječechmy. Při tym dźěłachmy kaž w pjekarni. Zo bychu so złoto-brune plincy spěšnišo na nas smjeli, měješe kóždy swój nadawk. Plincy z nazhonjenjom a z wosebitej techniku – je do powětra mjetajo – wobroćachmy.
Prěnja škla ćěsta bě bórze prózdna, tuž změšachmy hnydom dalšu šklu a po tym samo hišće třeću, zo móhli cyły internat nasyćić. Knjez Pöpel dyrbješe dwójce nakupować hić, dokelž přidawki tak spěšnje přetrjebachmy. Hotowy plinc z pónoje hnydom na taler połožichmy, zo móhli jón šulerjo ćopły a čerstwy jěsć. Wulki nawal šulerjow do kuchnje k tomu wjedźeše, zo na kóncu ani jenički plinc wyše njezwosta.
Łužica ze serbskeje perspektiwy
Wojerecy. Wuznamej serbskeje kultury za Łužicu wěnuje so Hrodowa rozmołwa jutře, srjedu, wot 18 hodź. we Wojerowskim hrodźe. Pod hesłom „Łužica ze serbskeje perspektiwy“ předstaji dr. Jörg Heidig aktualny łužiski monitor. Studija złožuje so na reprezentatiwne naprašowanje a rysuje realistiski wobraz towaršnosće we Łužicy. Loni běštej serbska kultura a serbska rěč wosebitej ćežišći naprašowanja. Wuslědki a dopóznaća z naprašowanja prezentuja we wobłuku rozmołwy.
Radźićeljo wuradźuja
Radwor. Přichodne posedźenje Radworskeje gmejnskeje rady wotměje so jutře, srjedu, we 18.30 hodź. w schadźowarni Radworskeje gmejny. Mjez druhim póńdźe wo twarske dźěła na Grólmusowej w Radworju a wo wužiwanje srědkow z tak mjenowaneho Sakskeho fondsa.
Přehladka grafikow widźeć
Prózdnjeńcy chcedźa ponowić
Hamor (AK/SN). Pod škitom pomnikow stejace a kulturnohistorisce hódnotne prózdnjeńcy w Bjerwałdskim hrodowym parku maja so bórze ponowić. Zdobom maja so pućiki wokoło prózdnjeńcow do porjadka stajić. Za to so Hamorska gmejna zasadźuje. Gmejnscy radźićeljo su wčera jednohłósnje wobzamknyli, projekt zwoprawdźić. Tole ma dohromady 207 000 eurow płaćić. Gmejna zapłaći z toho něhdźe 52 000 eurow, potajkim štwórćinu cyłkownych wudawkow. 75 procentow dóstanu z programa za wuwiće witalnych wjesnych srjedźišćow spěchowane.
Kaž twarska nawodnica gmejny Cortina Kokles rozłoži, nastachu prózdnjeńcy w lětomaj 1922/1923 na tak mjenowanej prózdnjeńcowej kupje. Wone běchu wobstatk bywšeho hrodoweho parka. Tón chcedźa nětko za zjawnosć atraktiwniši sčinić a w tym zwisku tež prózdnjeńcy ponowić. Pomnikoškitny zarjad je hižo před njecyłym lětom zelenu swěcu za to dał.
