Domowina je spočatk apryla we Wulkich Zdźarach rěčny projekt DOMOJ zahajiła. To je intensiwny kurs serbšćiny, kotryž dźewjeć měsacow traje. Dohromady dwanaće wobdźělnikow wuknje zhromadnje w tak mjenowanym rěčnym hnězdźe. Woni so w našim wječorniku předstajeja. Jana Šlechtová z Budyšina měni, zo je so na prawy dyrdomdej podała.

Rěkam Jana Šlechtová a we Łužicy bydlu hižo wosme lěto. Za mój přećah do Budyšina su bjezdwěla Chróšćanscy muzikanća zamołwići, kiž běchu před něhdźe dźesać lětami do Štětí (Čěska) na hudźbny festiwal přijěli. Tam sym so něšto dnjow jako přewodnica wo nich starała. Su mje wuzwolili, kapału „z Němskeje“ přewodźeć, ale cyły kónc tydźenja njejsmy ani němske słowo rěčeli. Na to jědźech husćišo do Budyšina na wopyt, doniž njenasta z lubosće k hudźbje serbskeje kapały rjane mandźelstwo a šikwanej dźěsći Hanka a Józef. Młódši syn Józef chodźi do serbskeje pěstowarnje a naša Hanka je wot lětušeho šulerka w 1. lětniku A-rjadownje w Budyšinje. Na to sym jara horda­.