Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (66)
W Němskej dźerža ludźo něhdźe 16 milionow kóčkow. Něhdźe třećina z nich bydli z druhimi kóčkami pod jednej třěchu.
W domjacnosći, hdźež wjacore kóčki hromadźe bydla, njeje harmoniske žiwjenje stajnje garantowane. Kaž w swójbje wuwiwaja so tež w skupinje wjacorych kóčkow prjedy abo pozdźišo konflikty. Čim wjace kóčkow je, ćim husćišo dochadźa k zwadam. Tute pokazaja so na přikład w tym, zo nadběhowar cyłu chwilu na druhu kóčku wudźěra, na nju korči abo syči. Ale tež hotowe bijeńcy mjez kóčkami móža so wuwiwać. Jedna-li so wo rědki abo jónkrótny fenomen, njeje trjeba so starosćić. Kopja-li so pady abo zhubi so kóčka samo dlěši čas, dokelž so domoj njezwěri, je zakročenje wobsedźerja trěbne.
Husto tča přičiny w boju wo resursy, na přikład je-li přemało pitnych nopaškow, picy, móžnosćow k spanju abo móžnosćow k schowanju.
