Jan Rucha wabi hudźbne skupiny na „Tiny-Desk“

Budyšin (CeK/SN). 19lětny Jan Rucha ze Zdźěry absolwuje tuchwilu swoje wukubłanje na medijoweho technikarja pola firmy, kotraž MDR přisłuša. Tola swoja rozpalitosć słuša cyle swójskemu hudźbnemu projektej: znatemu US-podcastej „Tiny-Desk Concerts“. „Je fascinowace, hdyž wuměłcy bjez wulkeho jewišća w małym rumje wustupuja“, Jan wujasni.

„Małe jewišćo za serbskich hudźbnikow“ – runje to chce wón tež w Budyšinje docpěć. Za to je wón z Michałom Cyžom­ ze studija Lucija rěčał, kiž jemu techniku k dispoziciji staješe. Tež Kamjentny dom bě hnydom zahorjeny a poskića jemu so hodźacu městnosć za zwoprawdźenje swojeje ideje. Nětko pobrachowaše jenož hišće band: Ze skupinu „Die Baumschule“ zahaji swoju prěnju epizodu – nahrawali su spěw „Ein Elefant für dich“ wot skupiny „Wir sind Helden“. Cyle jednore pak to njebě: „Na prěnim terminje je technika wupadnyła. Dalše wužadanje běše, zo dyrbjach dwanaće ludźi naraz koordinować“, so Jan dopomina. Tuž trjebachu zaso nowy termin za nahrawanje a na tutym so skónčnje wšo bjez problemow poradźi.