Budyšin (SN/bn). Pod hesłom „Mato Kosyk – serbski Amerikanaŕ“ wotmě so wčera w Budyskim Serbskim muzeju dalše zarjadowanje rjadu Kofej w třoch. Kurator institucije dr. Jędrzej Soliński powita mału horstku hosći a podšmórny, zo „njeje tónle format na frekwencu wusměrjeny. Ručež so jenički zajimc namaka, jón wuhotujemy.“ Biografiju sobu najwuznamnišeho delnjoserbskeho basnika skrótka zjimajo poda wón přehlad tworićelskich fazow, kotrychž wupłód je najebać hač do štwórć lětstotka trajacych přestawkow dosć wobšěrny – w Ludowym nakładnistwje Domowina wušłe „Spise“ wopřijeja dźesać zwjazkow z dohromady něhdźe 4 000 stronami. Najwažniši nastork, so pjera přimać, běchu Kosykej próstwy mjez druhim Bogumiła Šwjele a Arnošta Muki ze zaměrom, jeho lyriku antologisce wudawać. Dalši faktor, kotryž poeziju Kosyka bytostnje wobwliwowaše, je po słowach Solińskeho naposledk „tragiski žiwjenski puć z Błótow do Ameriki wu­pućowaneho a tam po poł kontinenće pućowaceho Serba“, kiž w „nowym swěće“ jenož jenički raz tamneho Łužičana zetka – „nažel“ hornjoserbskeho.