Radwor (BHR/SN). Prawidłownje přeprošuje Radworski chór „Meja“ na přednoški do swojeje proboweje rumnosće do „Słodeńka“. Wčera steješe tema „Z Łužicy k hwězdam“ w srjedźišću.
Referent bě 27lětny fyzikar Jan Winša z Drježdźan. Wón skutkuje na tamnišej Techniskej uniwersiće, ke kotrejž słuša tež Astrocentrum Łužica (DZA). Třiceći hosći słuchaše na wuwjedźenja rodźeneho Lubičana, kotryž bě hakle před sydom lětami serbšćinu wuknyć započinał. Njehladajo na to přednošowaše wón wo fachowej temje z wulkej ličbu specielnych wurazow w serbšćinje, štož wuwabi wulku chwalbu publikuma. Hač informacije wo zakładnym natwarje swětnišća, hač wo wottam pochadźacych prudźenjach a móžnosćach jich měrjenja – wšitko je wón w dobrej serbšćinje přednjesł. Druhi dźěl přednoška wěnowaše so aktualnemu stawej natwara DZA a předewzaćam přichodnych lět.
